ஞாயிறு உலாக்கள்

 

இந்த மாதம்  அரிசோனா ஊர் முழுவதும்  மஞ்சள் பூ பூத்த மரங்களை பார்க்க முடிந்தது.  வானத்தின் நீலமும், வெண்மேகமும் மஞ்சள் பூக்களும் பார்க்கவே அழகு.

இந்த மரம் அரிசோனாவின் மாநில மரம். இதன் பேர் "பாலோ வெர்டே"  மார்ச்  பிற்பகுதியில்  பூக்கள் பூக்க ஆரம்பிக்கும் , மே வரை அழகாய் பூத்து குலுங்கும். 

மருமகளுடன் காரில் பயணிக்கும் போது எடுத்த படங்கள்.

பேரனை பாட்டு வகுப்புக்கு கொண்டு விட போகும் போது  வீதியின் இரண்டு பக்கமும் இந்த மரங்கள் இருந்தன, பார்க்கவே அழகாய் இருந்தது.

எங்கும் மஞ்சள் வண்ணம்

குறைந்த தண்ணீர் போதுமாம் இந்த மரம் வளர. நிலத்தடி நீரை உறிஞ்சு   சேமித்து தண்டுகளில் வைத்துக் கொள்ளுமாம். திடீர் வெள்ளம் வந்தால் தாக்குபிடிக்குமாம் இந்த  மரம். 

பாட்டு டீச்சர் வீட்டு முன் அழகாய்   நிழல் தந்து கொண்டு இருந்தது. அந்த கல்லில் அமர்ந்து இருப்போருக்கு பூ சொரிதலும் செய்து மகிழ வைக்கும் மரம். ஆனால் சிலருக்கு இந்த பூ  ஒவ்வாமையை உண்டு செய்யுமாம். இந்த மரத்தின் அடியில் எல்லாம் மஞ்சள் கம்பளம் விரித்தார் போல காணப்பட்டது.

வறட்சி காலங்களில்  இலைகளை உதிர்த்து விடுகிறது. தண்டு பகுதி, கிளைகள் பச்சையாக இருக்கும் அவை ஒளிசேர்க்கை செய்ய உதவுகிறதாம். 

நண்பர் வீட்டில் பூத்துக்குலுங்கும் ரோஜா பூக்கள்

ஞாயிறு மகனின் நண்பர் வீட்டுக்கு போய் இருந்தோம். அவர்கள் எங்களை மதிய உணவு  சாப்பிட அழைத்து இருந்தார்கள். இங்கு எல்லோரும்  நண்பர்களின் பெற்றோர்கள் வந்தால் அழைத்து  உபசரித்து மகிழ்வார்கள்.

நிறைய பறவைகள் அவர்கள் வீட்டுத்தோட்டத்திற்கு வந்தது . காமிரா கொண்டு போகவில்லை அதனால் எடுக்க முடியவில்லை பறவைகளை. இந்த தங்கபுஷ்ப மரத்தில் ஒரு கருப்பு குருவி வந்து அமர்ந்தது, அலைபேசியில் எடுத்தேன்.

கொஞ்சம் தெரிகிறது உற்றுப்பார்த்தால். உங்களுக்கு தெரிகிறதா என்று சொல்லுங்கள்.

விருந்துக்கு தயாராக இருக்கும் உணவுகள்

அவர்கள் வீட்டில் சுவையான  உணவு தந்தார்கள். சவ்சவ் கூட்டு, பீன்ஸ் காரட் பொரியல், உருளை கறி, வடை, அப்பளம், இரண்டு விதமான ஊறுகாய் இனிப்பும், காரமும்  இருந்தது. சேமியா பால் பாயாசம்.  சாம்பார், மோர் குழம்பு, ரசம். என்று செய்து இருந்தார்கள் வத்தல் குழம்பு செய்யவில்லை என்று வேறு வருத்தப்பட்டார்கள். 

உங்களுக்கு என்று காரம் இல்லாமல் சமைத்து இருக்கிறோம் என்றார்கள். அன்பாய்   உரையாடி மகிழ்ந்து மாலை வீட்டுக்கு வந்தோம்.

சென்ற மாதம் ஒரு ஞாயிறு நண்பரின் மகள் நடன அரங்கேற்றம் செய்தார். அதற்கு போய் இருந்தோம். நடன அரங்கம் மிக அழகாய் இருந்தது.

நன்றாக ஆடினார்.

நடனம் சொல்லி கொடுத்தவர் பத்மஸ்ரீ  சுதா ராணி ரகுபதி அவர்களிடம் படித்தவராம்.

வாசலில் வரவேற்பு அலங்காரம். வருபவர்களுக்கு முல்லைச்சரம் கொடுத்தார்கள்.

நடன நிகழ்ச்சிக்கு வருபவர்களை வரவேற்கும் அம்மாவுடன்

நடன நிகழ்ச்சிக்கு வருபவர்களை வரவேற்று நடன அரங்கத்திற்கு  போக சொல்ல வாசலில் ஒரு வெள்ளைக்கார  அம்மா அழகாய் புடவை கட்டி வரவேற்றார். அவர் அரங்கத்தின் பாதுகாவலர் பொறுப்பிலும் இருந்தார்.அவரை நான் புகழ்ந்தேன்,  அவர் கட்டியிருந்த புடவை கலர் எனக்கு பிடிக்கும்.

 பிஸ்கட் கலர் என்று என்  அம்மா சொல்வார்கள். அம்மாவின் நினைவு வந்தது.   

அவர் என் புடவை நன்றாக இருப்பதாய் சொன்னார். அவரை மட்டும் நான் படம்  எடுத்தேன், அவர் என்னையும் நிற்க சொன்னார், பேரன்  இருவரையும்  எடுத்தான். அவர் புன்னகை அழகு. தலையில் முல்லை சரம் சூடி இருந்தார்.

நடன அரங்கேற்றம் பார்க்க வந்தவர்களுக்கு சுவையான  உணவும் கொடுத்தார்கள் இனிப்புடன்.

 ஞாயிறு உலா  மகிழ்வாய் போனது.

வாழ்க வையகம்! வாழ்க வையகம் வாழ்க வளமுடன்!

----------------------------------------------------------------------------------------------------