தோட்டத்திற்கு வந்த தேனீக்கள்

 

இரண்டு நாள் முன்பு மாலை வேளை மகன் "அம்மா வாங்க, வாங்க, நம்ம தோட்டத்து மரத்தில் தேனீ கூடு கட்டி விட்டது என்றான்" எனக்கு ஆச்சரியம் !  "மாலை நடைபயிற்சி தோட்டத்தில் செய்தேன் அப்போது அந்த மரத்தில் உள்ள குருவிகளை படம் எடுத்தேன் பார்க்கவில்லையே ! என்றேன். "இப்போது தான் நான் மாடி பால்கனியில் நிற்கும் போது பார்த்தேன் கும்பலாக பறந்து வந்து அமர்ந்தது என்றான்."

காமிராவை எடுத்து வாங்க வந்து ஜூம் செய்து பாருங்கள் என்றான்

குருவிகளை காணோம் மரத்தில், தேன் சிட்டு மட்டும் பயமில்லாமல் மரத்தை சுற்றி வந்து பார்த்து கொண்டு இருந்தது தேனீயை.

மதுரை தபால் தந்தி நகர்    வீட்டில் ஜன்னல் அருகே கூடு கட்டி இருந்தது பெரிதாக முன்பு . அப்போது தேனீ கூட்டை அப்புறபடுத்துபவர்களுக்கு போன் செய்த போது அவர்கள் வயலுக்கு மருத்து அடிக்கும் கருவி போல கொண்டு வந்து 

ஒரு மருந்தை அதில் ஊற்றி தேன் கூட்டின் மீது அடித்தார்கள். நான் பதறி போய் "அய்யோ செத்துவிடுமே! " என்று கத்தி விட்டேன், "இல்லையம்மா சாகாது மயக்கம் வந்து கீழே விழுந்து விடும்" . அப்புறம் கூட்டை எடுத்து எறிந்து விடலாம் என்றார்.

அது போல இங்கும் கூப்பிடலாம் என்று பேசி கொண்டு இருந்த போது மருமகள் ஒரு நாள் பார்ப்போம், வெகு தூரத்திலிருந்து பறந்து வரும் போது ஓய்வு எடுக்க தங்குமாம். அப்புறம் மீண்டும் உணவு நிறைய கிடைக்கும் இடம் தேடி செல்லும் என்றாள்.

அது போல ஒரு நாள் காத்து இருந்தது நல்லதாக போய் விட்டது. முதல் நாள் மாலை   வந்த நேரம்  போலவே மறுநாள் மாலை   பறந்து போய் விட்டன அனைத்தும். எனக்கு தான் பறந்து போவதை பார்க்க முடியவில்லையே என்று ஏமாற்றம். மகன் கும்பலாக பறந்து வந்ததை பார்த்தான்.

 நான் மீண்டும் பறப்பதை பார்க்க எட்டி எட்டி சிறிது நேரத்திற்கு ஒரு முறை தோட்டத்தை கவனித்து கொண்டு இருந்தேன், அப்படியும் பார்க்க முடியவில்லை. மாலை இரண்டு மூன்று தேனீக்கள் கூட்டை சுற்றிக் கொண்டு இருந்தது. உள்ளே வந்தவுடன் பறந்து போய் இருக்கிறது.

மிகவும்  வியப்பாக இருந்தது. ராணி தேனீ ஒய்வு எடுக்க சொன்னால் ஓய்வு எடுத்து பறக்க கட்டளையிட்டால் பறப்பதும் எவ்வளவு சரியாக நடக்கிறது என்ற வியப்பு. ராணி தேனீயின் கட்டளைக்கு கீழ் படியும் கட்டுபாடு  வியப்பை தருகிறது. பாடத்தில் படித்தது வேலைக்கார தேனீக்கள்,  ஆண் தேனீக்கள், ராணி தேனீக்கள் என்று நினைவுக்கு வந்தது.

இப்படிதான் தேனீக்கள் அமர்ந்து கொண்டு இருக்கிறது

படம் - கூகுள் நன்றி.

//இடம்பெயர முதலில் ஓர் இடத்தை வேவுபார்க்கும் வேலைக்காரத்தேனீ உகந்த இடத்தை நடந்து அளக்கிறது. அதற்கு முன் பலவித இடங்களைத் தேர்ந்தெடுக்கிறது. பிறகே அதனை அளக்கிறது. அத்தகவல்களைப் பிற வேலைக்காரத்தேனீக்களின் குழுவிடம் நடனம் மூலம் தெரிவிக்கிறது. அவை பறந்து சென்று, புதிய இடத்தைக் கண்டுணர்ந்து, கூட்டிலுள்ள பிற தேனிக்களிடம் நடனம் மூலம் தெரிவிக்கிறது.

இறுதியாகக் கூட்டிலுள்ள பல்லாயிரக்கணக்கான தேனீக்கள் ஒருசில நிமிடங்களில் புதிய இடத்திற்கு இடம் பெயர்ந்து விடுகிறது. இத்தகைய துல்லியமான இடம் பெயர்ப்பு நிகழ்வு நடனம் மூலமே நிகழ்கிறது.//

விக்கிபீடியாவில் படித்த பின் தெரிந்தது  ஒரு சில நிமிடங்களில் புதிய இடத்தை நோக்கி இடம் பெயர்ந்து விடுவது. அதனால்தான் என்னால் பார்க்க முடியவில்லை.

//தேனீக்கள் தாவரங்களின் இனப்பெருக்கத்திற்கு உதவும் மகரந்தச்சேர்க்கையில் முக்கியமான பங்களிப்பை வழங்குவதால், மனிதர்களின் உணவுச் சங்கிலி யில் தேனீக்கள் முக்கிய பங்கை ஆற்றுகின்றன. எனவே, தேனீக்களின் அழிவு பலவகை பயிர்கள், பழவகைகள் உற்பத்தியில் வீழ்ச்சியை ஏற்படுத்தும் என்பதனால், இது மிகவும் அவதானத்தில் கொள்ள வேண்டிய பிரச்சனைகளில் ஒன்றாக கருதப்படுகின்றது.//

இறைவனின் படைப்பில் அற்புதங்கள் . தேனீக்கள் இல்லையென்றால்  இந்த உலகம் இல்லை. நிறைய உயிரினங்கள் நாம் வாழ உதவி கொண்டு இருக்கிறது.

வாழ்க வையகம்! வாழ்க வையகம்! வாழ்க வளமுடன்!

-----------------------------------------------------------------------------------------------------