போர் வீரர்களின் நினைவை போற்றும் பூங்கா(Anthem Veterans Memorial Park)

படைவீரர்கள் நினவு சின்னம்

அரிசோனாவில் வரலாற்று சிறப்பு மிக்க நினைவு சின்னம் உள்ள  இந்த இடத்திற்கு  மாலை நேரம் போய் இருந்தோம்.

புரட்சிகர  தேசபக்தர்கள் அமெரிக்க  சுதந்திரத்திற்கு பாடு பட்ட ஆண்கள், மற்றும் பெண்களின் தியாகத்தை போற்ற  நினைவூட்ட அமைக்கப்பட்டு இருக்கிறது இந்த நினைவுச்சின்னம்.

1775- 1783 ல்  சுதந்திர புதிய தேசத்தை   உருவாக்க   போராடியவர்கள்.  250 வது ஆண்டு நிறைவை முன்னிட்டு அமெரிக்கப் புரட்சியின்  ஓகோட்டில்லோ அத்தியாயம்  மகள்களால் வழங்கப்பட்டது.

நவம்பர் மாதம் சரியாக 11.11 மணிக்கு   நடைபாதை வட்டத்தின்  குறுக்கே நீண்ட  நிழலை உண்டு பண்ணுமாம்.

தேசத்தை பாதுகாக்க  பணியாற்றிய , தியாகம் செய்த  துணிச்சலான அமெரிக்க  ராணுவ வீரர்களை என்றென்றும் நினைவில் வைத்து இருக்க நினைவு சின்னம்.

  இந்த நினவுச் சின்னத்தின் ஐந்து தூண்களும்  நவம்பர் மாதம் 11 ம் தேதி அன்று  சரியாக 11.11மணிக்கு நடைபாதை வட்டத்தின் குறுக்கே நீண்ட நிழலை  படர செய்யும்.

 சூரியனின் கதிர்கள் ஐந்து தூண்களின்  நீள்வட்டங்கள் வழியாக அமெரிக்காவின் கிரேட் சீல் என்ற  மொசைக் மீது சூரிய ஒளி முழுமையாக பரவி  ஒளிர செய்கிறது.  இது  போரில் கலந்து கொண்டு  தியாகம் செய்த ஆண்களுக்கும், பெண்களுக்கும்   சிறப்பான அஞ்சலி செலுத்துவது போல  உள்ளது.

வரலாற்று தலம் 2011 இல் கட்டப்படடு இருக்கிறது இந்த நினைவு சின்னம்

ஐந்து தூண்களும் ஐக்கிய மாகாணங்களின்  இராணுவத்தின் ஐந்து பிரிவுகளின் ஒற்றுமையை  சொல்கிறது

தூண்களை  சுற்றி இப்படி அழகான மலர் தோட்டம் அமைத்து இருக்கிறார்கள்.

செயற்கை ஓடைகளை அமைத்து இருக்கிறார்கள்.  அதில் அழகான வாத்துகள் நீந்தி களிப்பதை கண்டுமகிழ்ந்தோம்.  மாலை நேரம்   போய் இருந்தோம். முயல்கள் நிறைய குட்டி குட்டியாக இருந்தது, ஆனால் ஒரு குட்டி முயல் மட்டும் தான் படம் எடுக்க சிக்கியது. பூங்காவில்  பார்த்த காட்சிகள் இந்த பதிவில்.

ரயிலில் போய் கொண்டே ஓடையில் நீந்தும் வாத்துகளை பார்க்கலாம். நாங்கள் 6 மணிக்கு மேல்தான் பூங்கா வந்தோம் அதனால்  ரயிலை பார்க்கவில்லை. 

சிலர் ஓடைகளில் மீன் பிடித்து கொண்டு இருந்தார்கள், பிடித்து பின் அதிலே விட்டுவிடுவார்கள். சும்மா பொழுது போக்கு.

சிலர் அழகான  நாய்களுடன்  நடைப்பயிற்சி செய்தார்கள். கோடை காலத்துக்கு   நன்றாக இருக்கும் இங்கு வந்தால்.

கற்களை போட்டு சின்ன   அருவி போல    அமைத்து இருக்கிறார்கள். 

என்ன பேசிக் கொள்கிறது நேரம் ஆகி விட்டது கரை ஏற வேண்டும் என்று சொல்கிறதோ

தனிமையும் இனிமைதான்

ஏறுங்க ஏறுங்க  மேலே!

எங்கள் பக்கத்தில் வந்த போது அலைபேசியில் எடுத்த படங்கள். உணவு கொடுக்க கூடாது என்று போட்டு இருக்கிறார்கள் சிலர் கொடுப்பார்கள் போல அதனால் பக்கத்தில் வந்து எங்களை பார்த்தது.

 

சின்ன வாத்து எப்படி தலைகீழாக  சாகஸம் செய்கிறது  என்று பாருங்கள்.    மிக சிறிய  காணொளிதான் மூன்று முறை  முங்கி எந்திரிக்கும்.

பசுமையான புல்வெளி கண்ணுக்கு குளிர்ச்சி

மரங்கள் வரிசையாக நிழல் பரப்பி கொண்டு பார்க்கவே அழகு

https://www.youtube.com/watch?v=PblTlsFDC4Q

சின்ன காணொளிதான்

நீந்தி கொண்டு இருக்கும்  வாத்துகள் நாயை பார்த்தவுடன் பயந்து ஒரே இடத்தில் கூடுவது பார்க்கலாம்.

மாலை சிற்றுண்டி செய்து கொண்டு வந்தாள் மருமகள். அதை அங்கு வைத்து உண்ட போது  இளமைக்கால நினைவுகள்  வந்தது. சினிமா பார்க்கபோனாலும், பார்க்  போனாலும் அம்மா வீட்டிலிருந்து தின்பண்டங்கள் எடுத்து வருவார்கள்.

தியேட்டரில் விற்கும் முறுக்கு, பாப்கார்ன் வாங்குவது இல்லை.

 

நாங்கள் எங்கள் குழந்தைகளுக்கு வீட்டிலிருந்து கொண்டு போனாலும் சினிமா தியேட்டரில் விற்கும் கோன்ஐஸ்கிரீம் வாங்கி சாப்பிடுவார்கள்.

இந்த பூங்காவில் எதுவும் கிடைக்காது நாம் தான் கொண்டு போக வேண்டும்.

 பூங்கா அடுத்த பதிவிலும் தொடரும்.   

வாழ்க வையகம்! வாழ்க வையகம்! வாழ்க வளமுடன்!

----------------------------------------------------------------------------------------------------