மலரும் நினைவுகளை தந்த வாழைக்காய் அப்பளம்

வாழைக்காய் அப்பளம்

எங்கள் ப்ளாக் ஸ்ரீராம்  

திங்கள் பதிவுக்கு சமையல் குறிப்பு கேட்டார்கள்

கீதா அக்கா சொல்லி இருப்பது போல உங்களிடமிருந்து கட்டாயம் ஒரு சமையல் குறிப்பு உடனேஎதிர்பார்க்கலாமா? பேராசை எனக்கு!

//உற்சாக மன நிலையில் உணவு சமைத்தபோது படம் எடுத்து குழந்தைகளுக்கு அனுப்புவேன்.//

என்ற என் பின்னூட்டத்தில் போட்டதை வைத்தே என்னை எழுத வைத்து விட்டார் ஸ்ரீராம்.

//இங்கிருக்கும் குழந்தைகளுக்கும் அனுப்பலாமே....! தயிர் சாதம் கூட வித்தியாசமாக செய்திருந்தால் அதைக்கூட அனுப்பலாம். நீங்களோ புகைப்படங்கள் எடுப்பதிலும் மன்னி!//

இப்படி வேறு   கூடை நிறைய ஐஸ் வைத்தால் எழுதாமல் இருக்க முடியுமா?

//திங்கட்கிழமை. "திங்க"ற கிழமை! //  

 திங்கட்கிழமை வெளியாகும் சமையல் பதிவை  பாராட்டி கீதா சாம்பசிவம் அவர்கள்  அழகாய் சொல்லி இருக்கிறார்கள். நீங்கள் எல்லோரும்  படித்து இருப்பீர்கள். அந்த புகழ் பெற்ற திங்கட்கிழமையில் நானும்  இணைவதில் பெருமை கொள்கிறேன்..

இப்படி எழுதி வைத்து பல வருடம் ஆச்சு. எழுதி வைத்ததை மறந்தே விட்டேன்.

நேற்று கொஞ்சம் வாழைக்காய் அப்பளம் மகன் கேட்டான் என்று செய்தேன். அப்போது நான் மாயவரத்தில் இருந்த போது போட்ட பதிவு நினைவுக்கு வந்தது. போட்ட பதிவை தேடி    படித்த போதுதான்  டிராப்பிட்டில் இருந்த இந்த பதிவு கிடைத்தது. அதை இங்கே பகிர்கிறேன் இன்று.

கப்பல் பயண தொடர் அடுத்து வரும்.

 மாயவரத்தில் இருக்கும் போது போட்ட பதிவு இது   வாழைக்காய் அப்பளம்  வியாழன், 21 ம் தேதி (2013 ல்) 

இந்த பதிவின் பின்னூட்டங்களை படித்து பாருங்கள் நிறைய விஷயங்கள், நிறைய பழைய நட்புகள் இருக்கிறார்கள்.

வலைச்சரத்தில் இந்த வாழைக்காய் அப்பளத்தை பகிர்ந்து கொண்டவர்களை   படித்து விட்டு வந்து சொன்னவர்கள் இருக்கிறார்கள்.

திண்டுக்கல் தனபாலன் அவர்கள் வலைச்சரத்தில் என் பதிவை யாராவது பகிர்ந்து கொண்டால் முதலில் வந்து சொல்வார்.

மீண்டும் எழுத வர வேண்டும் அவர்.

இன்று போட்ட பதிவு ஸ்ரீராம் திங்கள் பதிவுக்கு வாழைக்காய் அப்பளம் சமையல் குறிப்பு  அனுப்பிய பின்  எழுதி வைத்து இருந்த  பதிவு . மதுரை வீட்டில் போட்ட வாழைக்காய் அப்பளம் பதிவு.

இரண்டு பதிவுகளுக்கும் நிறைய வித்தியாசம் இருக்கிறது படித்து விட்டு சொல்லுங்கள். 6 வித்தியாசம் கண்டு பிடிக்கலாம்.

இன்னும் ஸ்ரீராம் தளத்தில் திங்கள் கிழமை பகிர்ந்த பகிர்வு படித்தால்   இன்னும் நிறைய வித்தியாசங்கள் கண்டு பிடிக்கலாம்.

எங்கள் ப்ளாகில் போட்ட பதிவை கண்டு பிடித்து போட்டு விட்டேன் 

பழைய நினைவுகளை பகிர்ந்து கைபட  எழுதி வைத்த  குறிப்புகளையும் போட்டோ  எடுத்து போட்ட நீண்ட பதிவாக இருக்கும். நிறுத்தி நிதானமாக எழுதினால் நன்றாக இருக்கும். வேக வேகமாய் சின்ன வயதில் எழுதிய கிறுக்கல் எழுத்து அது.

பானுமதி அவர்களின் பின்னூட்டம் கூட நினைவு இருக்கிறது.

அவர் சுருங்க சொல்வார்.  குடும்ப பதிவு என்று சொன்னார். மார்க் எல்லாம் கொடுத்தார்.

இப்போது மீண்டும் படித்தேன் அதிரா, ஏஞ்சல்  இருவரும்  மகிழ்ச்சியாக உரையாடியதும்,   எல்லோரும் பாராட்டியதை படிக்கும் போது மகிழ்ச்சியாக இருந்தது.

இங்கு உங்களுடன் பகிர்ந்து கொள்ளும் சமையல் குறிப்பு வாழைக்காய் அப்பளம்

இனி வாழைக்காய் அப்பள குறிப்பை பார்க்கலாம்:-

உங்களுக்கு எல்லாம் தெரிந்த சமையல் குறிப்பாக இருக்கலாம். 

சர்க்குலேசன் புத்தகங்கள் வாங்கிக் கொண்டு இருந்த காலம் .

நான் மாத இதழ், வார இதழ் ஆகியவற்றில் வரும் சமையல் குறிப்புகளை அவசர அவசரமாய் எழுதி வைத்துக் கொண்டு  மறுநாள் கொடுத்து விடுவேன் புத்தகத்தை.  

இப்படி பதிவு எழுதுவேன் என்று தெரிந்து இருந்தால் எந்த பத்திரிக்கையில் வந்தது, எழுதியவர் பெயர் எல்லாம் எழுதி வைத்து இருப்பேன்.  மஞ்சரி புத்தகத்தில் வந்தது என்று நினைக்கிறேன்.

   

மாசி மாதம் வத்தல் வடகம் போட ஆரம்பித்து சித்திரைக்குள் முடித்து விடுவார்கள் . சித்திரை வத்தல் சிவந்து விடும் என்பார்கள். இந்த வாழைக்காய் அப்பளம், இலைவடாம் எல்லாம் எப்போதும் போடலாம்.

அதுவும் கிராமத்தில்( திருவெண்காடு) இருக்கும் போது  எங்கள் வீட்டுக்கார அம்மா அவர்கள் வாழைக்காய் காய்த்த போதெல்லாம் தருவார்கள். அக்கம் பக்கத்து    வீடுகளிலிருந்து வேறு  கொடுப்பார்கள். மாயவரத்தில் இருந்த போதும் வாழைக்காய் பஞ்சமில்லாமல் கிடைக்கும். 

நான் எழுதி வைத்து இருந்த 'வாழைக்காய் அப்பளம்' குறிப்பை இங்கு  கொடுத்து இருக்கிறேன். 

என் அனுபவத்தில்  வாழைக்காய் மிகவும் முற்றலாக இருக்கக் கூடாது, பிஞ்சாகவும் இருக்கக் கூடாது. நடுத்தரமாய் இருக்க வேண்டும். அப்போதுதான் நன்றாக இருக்கும் அப்பளம்.

எல்லாக் காலங்களிலும் வாழைக்காய் கிடைக்கும்.   அக்னி நட்சத்திரம் ஆரம்பித்து விட்டது, வத்தல் வடகம் போட மாட்டார்கள், ஆனால் வாழைக்காய் அப்பளம் போடலாம். 

ஜன்னல் வழியே பறவைகளை  பார்த்தீர்கள் !  வாழைக்காய் அப்பளம்  காய்வதைப் பாருங்கள்.எங்கள் வீட்டுப் பால்கனிக்கு வெயில் 12 மணிக்கு மேல் தான் வரும், மாலை 3.30 வரை இருக்கும் அதில் காய வைத்து எடுத்தேன். கொடிக் கம்பியில்  துணியைக் கட்டி காய வைத்து எடுத்தேன்.

வீட்டுக்குள்  3.30 மணி வரை வெயில் இருக்கும்

என் மகனிடம் ,"கூழ் வத்தல் சித்தி, அத்தை எல்லாம் போட்டு கொடுத்து இருக்கிறார்கள் அனுப்பி வைக்கிறேன்" என்றேன். அதற்கு," அம்மா! உங்களுக்கு  முடிந்தால்  வாழைக்காய் அப்பளம் செய்து அனுப்புங்கள்" என்றான். இப்படிக் கேட்கும்போது செய்யாமல் இருக்க முடியுமா? கொஞ்சம் கொஞ்சமாக மூன்று நாள் போட்டு எடுத்து வைத்து விட்டேன். அனுப்ப வேண்டும்.


சோம்பிக் கிடக்கும் உடல். குழந்தைகள் ஆசைப்பட்டால் சுறுசுறுப்பாய் செயல் படுகிறது. என் கணவருக்கும்  வாழைக்காய் அப்பளம் பிடிக்கும்.

கொஞ்சம் காரம் - கொஞ்சம் காரம் குறைச்சலாக -என்று போட்டு செய்து இருக்கிறேன்.

தேவையான பொருட்கள் 6 என்று சொல்லி விட்டு இரண்டு வாழைக்காய் படம் போட்டு இருக்கிறீர்கள் என்று கேட்க வேண்டாம்  வீட்டில் இருந்த காயைப் படம் எடுத்துப் போட்டு இருக்கிறேன் .

வாழைக்காய் அப்பளத்திற்குத்  தேவையான பொருட்கள்:-

வாழைக்காய் பெரியது  6

பச்சைமிளகாய் -6  காரம் வேண்டுமென்பவர்கள் அப்படியே 6 போட்டுக் கொள்ளலாம். காரம் குறைச்சலாகப் போதும் என்பவர்கள் 4 போட்டால் போதும்.

உப்பு, பெருங்காயம் தேவையான அளவு  போட்டுக் கொள்ளலாம்.

உப்பு வாழைக்காயில் இயற்கையாக இருக்கும், அதனால் கொஞ்சம் குறைத்தே போட்டுக் கொள்ளலாம். பெருங்காயம் சிலருக்குப் பிடிக்காது, அதனால்.   அது மட்டும் அல்ல நிறைய போட்டாலும் நன்றாக இருக்காது. நான் சின்ன ஸ்பூனால் ஒரு ஸ்பூன் பெருங்காயத்தூள் சேர்த்தேன்.

வாழைக்காய் குக்கரில் வேக வைத்தால் கலர் வெள்ளையாக இருக்காது அதனால் ஒரு வாயகன்ற பாத்திரத்தில் வாழைக்காயைத் தோலுடன் வேகவைத்து எடுத்துக்கொள்ள வேண்டும். தோலை உரித்து எடுத்து வைத்துக் கொள்ள வேண்டும்.

 உப்பு, பெருங்காயம், பச்சைமிளகாய் இவற்றை மிக்ஸியில் அரைத்து எடுத்து க்கொள்ளலாம்.

இளஞ்சூட்டில் இருக்கும் போதே வாழைக்காயை பச்சைமிளகாய் , உப்பு, பெருங்காயம் அரைத்த விழுதைச் சேர்த்து மிக்ஸியில் ஒரு ஓட்டு ஓட்டினால் மசிந்து விடும். கையால் பிசைந்தால் கூட போதும்.

காரட் சீவும் கட்டையில் துறுவி கொண்டு கையால் நொறுங்க பிசைந்து விடலாம்.

(மிக்சியில் அரைக்கும் போது   கவனம் தேவை நன்றாக மையாக அரைத்து விட கூடாது. ). வாழைக்காய்  கலவையை  உருண்டையாக   உருட்டிக் கொண்டு அப்பள பலகையில்  இரண்டு ஷீட்டுகளுக்கு நடுவில் வைத்து  அப்பளக் குழவியால்  தேய்த்துக் கொள்ளலாம். நான் பெரிதாக ஷீட்டுகள் வைத்து பெரிதாக அப்பளம் தேய்த்துக்  கொண்டு பின் காப்பி  பில்டர் மூடியால் வட்டமாக வெட்டி எடுத்துக் கொண்டேன். அப்புறம் காய வைக்க வேண்டியது தான். மூன்று நாள் காய்ந்தால் போதும்.

மொட்டை மாடி என்றால் இரண்டு நாள் போதும். எங்கள் வீடு   பால்கனி போல  என்றால் மூன்று நாள் வேண்டும்.

சிறு சமையல் குறிப்பு:-

வாழைக்காய்த்  தோலை வீணாக்காமல் அதைச் சிறு சிறு துண்டாக வெட்டிக் கொண்டு கொஞ்சம் மிளகாய்த்தூள், மஞ்சள் தூள், பெருங்காயத்தூள் போட்டுப் பிசறிக் கொண்டு அதை கடுகு உளுத்தம்பருப்பு போட்டுத் தாளித்து கீழே  இறக்கும் போது தேங்காய் துருவல் கலந்து இறக்கினால் சத்து மிகுந்த  வாழைக்காய் தோல் பொரியல் (துவரம் ) கிடைக்கும். 

//நெல்லைச் சிறப்புச் சமையல்கள் நிறையத் தெரிந்து வைத்திருப்பீர்கள். 

அவற்றைப் பகிரலாம். //

இப்படி பின்னூட்டத்தில் கீதா சாம்பசிவம் நெல்லை சமையல் குறிப்பு கேட்டார்கள் இந்த துவரம் நெல்லை சமையல் குறிப்புதான்.

இப்படி கீதா சாம்பசிவம் அவர்கள் முன் போல கல கலப்பாக பதிவு உலகம் வர வேண்டும்.

முன்னாள் பாரதபிரதமர் இந்திராகாந்தி அவர்களுக்கு எழுத்தாளர் சிவசங்கரி அவர்கள் சத்து மிகுந்த வாழைக்காய் தோல் சமையலைப் பற்றி சொன்னார்கள் என்று படித்த நினைவு இருக்கிறது. (சிவசங்கரி பாரதபிரதமரை நேர்காணல் நிகழச்சி பற்றி விகடனில் வந்த போது படித்தது.)

இந்த படம்  எங்கள் ப்ளாக்  பதிவுக்கு வரைந்து தந்தது

அப்பளம் செய்து அதை வட்டமாக  மூடி வைத்து வெட்டும் வேலையை மகன் செய்கிறேன் என்பான்.

சிறு வயதில் என் மகன் என்னுடன் சேர்ந்து "நான் வெட்டித் தருகிறேன் அம்மா" என்று உற்சாகமாய்ச் செய்வான், அவன் செய்ததைப் பெருமையாக "நான் வெட்டினேன் எப்படி இருக்கு?" என்று அவன் அப்பாவிடம் கேட்பான்.

அதை என் கணவரிடம் சொல்லி வரைந்து தரச் சொன்னேன். ஒரு மணி நேரத்தில் இந்தப் படத்தை வரைந்து தந்தார்கள்.

எழுத்து வேலைகளுக்கு இடையில் எனக்கு வரைந்து தந்தார்கள். ஸ்ரீராம் "சார் படம் வந்து மிகவும் நாளாச்சு" என்று கேட்டார் என்றதும் மகிழ்ச்சியாக படம் உருவானது.

ஏதோ எனக்குத் தெரிந்த முறையில் சமையல் குறிப்பு எழுதி இருக்கிறேன்.உடனே செய்வது போல் இல்லையே என்று கேட்காதீர்கள்.  ஸ்ரீராம் உடனே அனுப்பச் சொன்னார். கைவசம் படங்கள் உள்ள சமையல் குறிப்பு  இதுதான்.

ஏதோ நினைவுகள் மனதிலே மலருதே பதிவில் கணவர் வரைந்த படங்கள் இடம்பெற்றது அதில் இந்த படம் பார்த்து இருப்பீர்கள். 

இந்த பதிவை போட காரணம் மகன் வீட்டில் நேற்று போட்ட வாழைக்காய் அப்பளம்.

வாழைக்காயை  காரட் சீவியில் ("புட்டு சீவி" திருநெல்வேலி பக்கம்   அப்படித்தான் சொல்வோம் ) சீவி எடுத்து கொண்டு  கையால் பிசைந்து செய்தேன்.

வெயில் நன்றாக அடிக்கிறது. ஊரிலிருந்து நிறைய கூழ் வற்றல் வாங்கி வந்து விட்டேன்.  இல்லையென்றால் போடலாம். சம்பந்தி அவர்கள் கொத்தவரங்காய் வற்றல் போடலாம் என்றார்கள் வாங்கி போட வேண்டும்.

திங்கள், 16 ஜூலை, 2012

குண்டுக் காக்கா கதை கொத்தவரக்காய் வற்றல் என்றதும் என் கணவர் குழந்தைகளுக்கு சொல்லும் கதை நினைவுக்கு வந்து விட்டது அந்த பதிவு. "படித்த நினைவு இருக்கா என்று படித்து பாருங்கள்." கொத்தவரக்காய் வற்றல் பெருமை தெரியும். 

வாழ்க வையகம்! வாழ்க வையகம்! வாழ்க வளமுடன்!

-----------------------------------------------------------------------------------------=======