அருள்மிகு இம்மையிலும் நன்மை தருவார் திருக்கோயில்

                       இம்மையிலும் நன்மை தருவார் கோயில் 

மதுரை நகரின் நடுப்பகுதியில் தெற்குமாசி வீதி- மேலமாசி சந்திப்பில் அமைந்துள்ள   கோயில். சிவகங்கை சமஸ்தான தேவஸ்தான கோயில். மதுரை மீனாட்சி கோயில், மற்றும் கூடலழகரை தரிசனம் செய்து விட்டு  அந்த கோயில்களுக்கு பக்கம் இருக்கும் இந்த பழமையான கோயிலுக்கும் மக்கள் வருவார்கள் அதிகமாக. பேரூந்து நிலையம் அருகில் இருக்கிறது.

இந்த கோயிலுக்கு 23.11. 23 அன்று போய் இருந்தேன்.

பூலோக கைலாயம் என்பார்கள் இந்த கோயிலை.

தாயாய், தந்தையாய், குருவாய், அன்பராக , நண்பராக எல்லாமாகி  இருந்த  என் அன்பு கணவர் இப்போது  தெய்வமாகி எங்களை வழி நடத்தி செல்கிறார் 

 இறைவனடி சேர்ந்து மூன்றாவது ஆண்டு   திதிக்கு இந்த கோயில்  போய் இருந்தேன்.

அன்று மகன் அவன் ஊரில் திதி கொடுப்பதால் நான் இங்கு கோயிலுக்கு போய் வந்தேன்.  கோயில் வாசலில் இருக்கும் ஒரு 10 பேருக்கு காலை ஆகாரம் வாங்கி போய் இருந்தேன். அதை அவர்களுக்கு கொடுத்து விட்டு கோயிலுக்கு போய் இறைவனை தரிசனம் செய்து வந்தேன்.

மாமா, அத்தை அவர்களுக்கு  திதி இந்த கோயிலில் தான்  கொடுப்போம்.

என் கணவருடன்  ஒருமுறை ஆடி அமாவாசைக்கு போன போது எடுத்த படம்

ஆடி அமாவாசை சமயம் ஒரு முறை  போய் இருந்தோம். கோசாலையிலிருந்து  பசுக்களை தெப்பக்குளம் அருகில் கட்டி வைத்து இருந்தார்கள். அன்பர்கள் கொடுத்த அகத்திகீரைகள்

ஒரு நாளில் அவை எப்படி எவ்வளவு சாப்பிடும்?

அமாவாசை அன்று பசுக்களுக்கு அகத்திகீரை கொடுக்கலாம் என்றாலும் பசித்து இருக்கும் மாடுகளுக்கு கொடுக்கலாம். மலை போல குப்பைவண்டியில் அள்ளி வைத்து இருந்தார்கள்.

மாடுகள் அந்த பக்கமே திரும்பி கொண்டன முகத்தை. ஆளை விடுங்க  சாமி! என்று.

 

சிவனும் பார்வதியும் லிங்கத்திற்கு பூஜை செய்த கோயில். 

சிவபெருமான் மதுரையில் அரசராக  பொறுப்பேற்கும் முன் இங்கு லிங்க பூஜை செய்து இருக்கிறார் என்று சொல்லப்படுகிறது.

கருவறையில் இப்படித்தான் இருப்பார்கள் 

அங்கு பாலாலயம்    நடப்பதால்  யாகசாலை பூஜைகள் நடந்து கொண்டு இருந்தது. உள்ளே சுவாமி சன்னதியில்   கூட்டம் இல்லை இருந்தாலும் , சிறப்பு  கட்டணம் 10 ரூபாய் கொடுத்து  பக்கத்தில் போய் நன்றாக மூலவரை தரிசனம் செய்தேன்.  குருக்கள் நான் கொடுத்த வில்வமாலையை  வில்வம், பூக்களை  சாற்றி ஆரத்தி காட்டினார்.  யாரும் போக சொல்லவில்லை. சிறிது நேரம் நின்று நிம்மதியாக இறைவனை வணங்கினேன்.  நான் மட்டுமே சன்னதிக்குள் இருந்தேன், சிவன், பார்வதியை நன்கு தரிசனம் செய்த மகிழ்ச்சியுடன்  வெளியே வந்தேன் .

சுவாமி சன்னதிக்கு வெளியே ஒரு பக்கம் தண்டபாணி, ஒரு பக்கம் பிள்ளையார் இருக்கிறார்கள்.

சுவாமி சன்னதி உள் சுற்றில் வெள்ளை நிற காசி விஸ்வநாதர் , விசாலாட்சி, சரஸ்வதி இருக்கிறார்கள். வல்லப சித்தர் இருக்கிறார். அவருக்கும் பூபந்தல் அமைத்து வேண்டிக் கொள்கிறார்கள்.

 ஜூரதேவர் தன் மனைவி ஜூரசக்தியிடன்  இங்கு மட்டும் தான் பார்த்து இருக்கிறேன்.  சண்டிகேஸ்வரர் மிகவும் சிறப்பு. இறைவனுக்கு சாற்றிய மாலையை கொண்டு வந்து   அவர் மேல்  சாற்றி வேண்டிக் கொள்கிறார்கள். அவர் சிவபெருமானிடம் நம் வேண்டுதலை நிறைவேற்ற சொல்வாராம்.

சுவாமி பேர் சொக்கநாதர். அம்மன் பேர்  மத்தியபுரி நாயகி.

அம்மன் சன்னதியிலும் கூட்டம் இல்லை. சிறப்பான தரிசனம்.

அம்மன் சன்னதியில்  கல்லால் ஆன் ஸ்ரீசக்கரம்  அங்கு இருப்பத்தால் அம்மனை தரிசனம் செய்து கொண்டு நன்கு வேண்டி கொண்டால் திருமணம் ஆகாதவர்களுக்கு நல்ல வரன் அமையுமாம்.  அம்மனை "மாங்கல்ய வரபிரசாதினி" என்று  சொல்கிறார்கள். 

நல்ல மழை பெய்து கோயில் முழுவதும்  தண்ணீர் அங்கங்கே தேங்கி இருந்தது அடிபிரதட்சணம் செய்வது போல மெதுவாக அடிமேல் அடிவைத்து  நடந்து போனேன்.

பாலஸ்தாபன கும்பாபிஷேகம் நடந்து கொண்டு இருந்தது இரண்டாவது நாள்

யாகசாலை பூஜைகள் நடக்கவிருந்தது. நான் காலை 8.30க்கு போய் விட்டேன்  9 மணிக்கு ஆரம்பித்து மதியம் கடம் சுற்றி வந்து அபிசேகம் ஆக 1 மணி ஆகும் என்றார்கள். நான் சுவாமி தரிசனம் முடிந்தவுடன் வந்து விட்டேன் வீட்டுக்கு.

தேவார இன்னிசை கச்சேரி நடந்து கொண்டு இருந்தது. பூஜை சமயம் நாதஸ்வர வாசிக்க ஒரு அம்மா  இருந்தார்கள்

அலைபேசி கோவிலுக்குள் அனுமதி இல்லை படம் எடுக்க அனுமதி இல்லை என்று போட்டு இருந்தார்கள், ஆனால் யாகசாலை கிட்டே படம் எடுத்து கொண்டு இருந்தார்கள், அதனால் நானும் சில படங்கள் பயந்து கொண்டே எடுத்தேன்.

புழுவாய்ப் பிறக்கினும் புண்ணியா

உன்னடி  என் மனத்தே

வழுவாதிருக்க வரந்தர

வேண்டும் இவ் வையகத்தே

தொழுவார்க்கு  இரங்கி யிருந்தருள்

செய்பாதிரிப்புலியூர்ச்

செழுநீர்ப் புனற் கங்கை செஞ்சடை

மேல் வைத்த  தீவண்ணனே

தேவாரம் பாடியவர்களுக்கு முன்பு இருந்து எடுக்காமல் யாகசாலைக்கு பின் புறம் இருக்கும் முருகன் சன்னதி வாசலிலிருந்து பாடலை பதிவு செய்தேன்.  

ஓதுவார் பாடிய "புழுவாய் பிறக்கினும்" பாடலை அன்று கேட்டதும் எனக்கு மெய் சிலிர்த்து விட்டது. நானும் அதை தானே கேட்க வந்தேன் இறைவனிடம். (கணவர் இறைவனிடம் சென்று மூன்று வருடம் ஆகி விட்டதே!  என்னையும் அழைத்து கொள் என்று கேட்க தான் போய் இருந்தேன்.

திருநாவுக்கரசர் கேட்டுக் கொண்டது  போல எத்தனை பிறவிகள் எடுத்தாலும் எந்த பிறப்பு எடுத்தாலும்  இறைவனை மறவா மனம் வேண்டும் என்று வேண்டிக் கொண்டேன். (மீண்டும் பிறவி வேண்டாம் என்று மனது வேண்டி கொள்கிறது.) எல்லா கடமைகளும் முடிந்து விட்டது அழைத்து கொள் இறைவா! என்றும் வாய் சொன்னது.

அவருக்கு தெரியும் நம்மை எப்போது அழைப்பது என்று இருந்தாலும் அவரிடம்  ஒரு கோரிக்கை.

கோயிலுகுள் நுழைந்தவுடன் வலபக்கம் பிள்ளையார் சன்னதி, இடபக்கம் முருகன் சன்னதி இருக்கிறது. பிள்ளையார் சன்னதி சுற்று பிரகாரத்தில் இந்த சிலை இருக்கிறது. முதலில் பிரம்மா, காரைக்கால் அம்மையார் தான் விரும்பி கேட்ட"பிறவாமை வேண்டும், மீண்டும் பிறப்புண்டேல் இறைவா ! உன்னையென்றும் மறவாமை வேன்டும் , இன்னும் வேண்டும் நான் மகிழ்ந்து பாடி , அறவா நீ ஆடும் போது உன் அடியின் கீழ் இருக்க" என்ற காட்சியை விளக்கும் சிற்பம்.

காரைக்கால் அம்மையார் வேண்டுதலை நிறைவேற்றியவர் என் வேண்டுகோளையும் நிறைவேற்றுவார் என்ற நம்பிக்கையுடன்,  சில தேவார பாடல்கள், மற்றும் திருப்புகழ் பாடல் கேட்டு விட்டு கோயிலை விட்டு கிளம்ப மனது இல்லாமல்  வந்தேன்.

குருக்கள் பாலஸ்தாபனம் என்றால் என்ன என்று பேசி கொண்டு இருந்தார் நான் கோவிலை விட்டு வெளி வரும் போது. 

 

விழா காலங்களில்  தெய்வ திருமணங்கள், கச்சேரிகள் நடக்கும் அரங்கத்தின் மேல் பகுதியில் உள்ள மீனாட்சி திருமண காட்சி சிற்பங்கள்

முருகன் சன்னதி

ஓரத்தில் தெரியும் மரம் வில்வ மரம் தல விருட்சம் , மிகவும் விஷேமான வில்வ மரம் அதை முன்பு படம் எடுத்து இருந்தேன், தேடினேன் கிடைக்கவில்லை, கிடைத்தால் சேர்க்கிறேன். 

வெளிப்பிரகாரத்தில்  உள்ள அரசமரம்

நாகர்கள், பிள்ளையார், லிங்கோத்பவர், சிறிய சிவலிங்கம் சிறிய நந்தி இருக்கிறார்கள்.

பக்கத்தில் கோசாலை, கோயில் திருக்குளம், மற்றும் அன்னதான கூடம்  இருக்கிறது.

திருக்குளம் அருகில் நவக்கிரக சன்னதி  பெரிதாக நன்றாக இருக்கும். விபூதி பிள்ளையார் இருக்கிறார். எல்லோரும் விபூதிகள் வாங்கி வந்து அவர் மேல் அபிஷேகம் செய்து வேண்டி கொள்வார்கள். மீனாட்சி அம்மன்  கோயிலில் இருப்பார் பார்த்து இருப்பீர்கள்.

பைரவர் தனி சன்னதியில் இருக்கிறார். மிகவும் சக்தி வாய்ந்தவர். தேய்பிறை அஷ்டமி சிறப்பு பூஜைகள் நன்றாக நடக்கும்.

வளையல் வாங்கலையோ வளையல் என்று சிவபெருமான் வளையல் விற்ற திருவிளையாடல் காட்சியாக நடத்திக்காட்டபடும்  விழாவை நாங்கள் பார்த்தோம்.  பார்த்து வந்து  போட்ட பதிவு 2016 ல்.

படங்கள் எடுக்க முடியவில்லை. மேலும் தலவரலாறு, விழா சிறப்புகள்   விவரங்கள் படங்கள் பார்க்க வேண்டுமென்றால் புது யுகத்தில் "ஆலய வலம்" பகுதியில் வந்த அருமையான  காணொளி . நேரம் இருக்கும் போது பாருங்கள். மூலவர் தரிசனம் செய்யலாம். திருக்குளம் மற்றும் அனைத்து சுவாமிகளையும் பார்க்கலாம். கோவில் முழுவதையும் சுற்றி காட்டுகிறார்கள்.https://www.youtube.com/watch?v=BTNirf1bsQ4

வேண்டுவோர்க்கு வேண்டுவதை அருளும் நம்பிக்கை நாயகர் இவர் என்று அழகாய் சொல்கிறார் கோவிலை பற்றி சொல்பவர் அவசியம் கேளுங்கள், பாருங்கள்.

வாழ்க வையகம்! வாழ்க வையகம் ! வாழ்க வளமுடன் !