மலர்கள் தரும் ஆனந்தம்

லில்லி மலர்கள்

மலர்கள் தரும் ஆனந்தம் சொல்லி முடியாது. மார்கழி மாதம் காலை வேலையில் இறைவழிபாடு, இளம் குளிரில்  மலர்களின் ஆனந்த காட்சி மனதுக்கும் உடலுக்கு புத்தண்ர்வு கொடுக்கும்.

காலை எங்கள் வளாகத்தில் உள்ள பிள்ளையாரை வணங்கி அப்படியே எங்கள் குடியிருப்பு மலர்களை பார்த்து கொண்டு (ஒரு வலம் வந்து) வீட்டுக்கு வந்து விடுவேன்.

மார்கழி மாதம் கோவில்களுக்கு போய் வருவேன் முன்பு. இப்போது வளாகத்தில் இருக்கும் பிள்ளையாரை மட்டும் வணங்கி வருகிறேன் மார்கழி ஆராதனையாக.

இந்த பதிவில் வளாகத்தில் கீழ் வீட்டில் இருப்பவர்கள்  வைத்து இருக்கும்  செடிகளில்   மலர்ந்து இருக்கும்  மலர்களின் படங்கள் இடம்பெறுகிறது.

மலர்களை தூவி இறைவனை வணங்கும்  அடியார்கள் பாமாலையுடன், பூமாலையை அணிவித்து அழகு பார்ப்பார்கள்.

//பூவார்மலர்கொண்டடியார்தொழுவார் புகழ்வார் வானோர்கள்

மூவார்புரங்கள் எரித்த அன்று மூவர்க்கருள் செய்தார்

தூமாமழைநின்றதிரவெருவித் தொறுவின்  நிரையோடும்

ஆமாம்பிணைவந் தணையுஞ்சாரல், அண்ணாமலையாரே//

- திருஞானசம்பந்தர் அருளியது

      

//தொண்டு எலாம் மலர் தூவி ஏத்த  நஞ்சு

உண்டல் ஆருயிர் ஆய தன்மையர்

கண்டனார் கருவூருள் ஆனிலை

அண்டனார் அருல் ஈயும் அன்பரே//

- திருஞானசம்பந்தர் நாயனார் அருளியது

//வாழ்த்த வாயும், நினைக்க மடநெஞ்சும்

தாழ்த்தச் சென்னியும், தந்த தலைவனைச்

சூழ்த்த மா மல்ர் தூவித் துதியாதே

வீழ்த்தவா, வினையேன் நெடுங் காலமே!//

- திருநாவுக்கரசு   நாயனார் அருளியது

//பெற்றார் தளை கழல் பேர்த்து ஓர் குறள் உருவாய்

செற்றார் படி கடந்த செங்கண்மால் நல் தா

மரை மலர் சேவடியை வானவர் கை கூப்பி

நிரை மலர் கொண்டு ஏத்துவரால் நின்று//

- பொய்கை ஆழவார் அருளிய -  முதல் திருவந்தாதி

//வையம் தகளியா வார்கடலே நெய்யாக

வெய்ய கதிரோன் விளக்காகச் -செய்ய

சுடராழியான் அடிக்கே சூட்டினேன் சொல்மாலை

இடராழி நீங்குகவே என்று.//

- பொய்கை ஆழவார் அருளியது

கனகாம்பரம் இரண்டு வகை

வெள்ளை அரளி

ஆரஞ்சு வண்ண ரோஜா

மணம் அதிகமுள்ள ஜாதிப்பூ

                       இட்லி பூ என்று அழைக்கப்படும் வெட்சிப்பூ.

Yellow alder இந்த மஞ்சள் மலர்  மகிழ்ச்சி அலையை பரப்பும்

மஞ்சள் ரோஜா 

லில்லி மலர்கள் பல வண்ணத்தில் உண்டு     இவை இரண்டு மூன்று நாள் வாடாமல் இருக்கிறது. ஒவ்வொரு இதழாக  கீழே விழுகிறது. 

இதழ்கள் கீழே விழுந்து குச்சியாக நிற்கிறது பாருங்கள். 

மலர்களிடம் நெருங்கி பழகும் மனிதர்கள்  இருக்கிறார்களா? இருக்க முடியும், இருக்ககூடும் . இத்தையக அனுபவம் குழந்தைகளிடம் இருக்கவே இருக்கிறது என்று ஸ்ரீ அரவிந்த  அன்னை சொல்வது போல கீழ் வீட்டுக்குழந்தை செடிகளுக்கு தண்ணீர் விடுகிறாள் மகிழ்ச்சியாக.  இவள் மகிழ்ச்சி பூக்களாக பூத்து அவையும் இந்த குழந்தையைப்பார்த்து சிரிக்கிறது.

என் குட்டித் தோழி இவள். நான் பிள்ளையாரை மாலை வேளைகளில் சுற்றி வரும் போது என்னுடம் சேர்ந்து சுற்றி வருவாள், என்னைப்பார்த்தவுடன் மலர்ந்த முகத்தோடு ஓடி வருவாள் மலர் செண்டு போல.

மேலே உள்ள லில்லி மலர்கள், அடுக்கு செம்பருத்தி , இந்த ரோஜா    இவள் வீட்டுத்தோட்டத்தில் மலர்ந்தவைதான்.

அடுக்கு செம்பருத்தி, ஐந்து இதழ் செம்பருத்தி

ஸ்ட்ராபெர்ரி மரம் என்கிறார்கள். பூக்கள் பூத்து மறுநாள் ரோஸ் வண்ண பொடியாக உதிர்ந்து  மணம் பரப்புகிறது பக்கத்து குடியிருப்பு மரம். ஸ்டாராபெர்ரி கலரில் மரம் ஆப்பிள் பழம் போல  சுவையுடைய  சிறு பழம் இருக்கும் என்கிறார்கள். நான் பார்த்தது இல்லை.

அந்த மரத்தில் பூத்த பூ கைபேசியில் எடுத்த படம்.

பக்கத்து குடியிருப்பு முருங்கை மரம் எங்கள் வளாகத்தில் சுதந்திர தினம் அன்று நடப்பட்ட  (புன்னை மரம் என்று நினைக்கிறேன்) மரத்தின்  மேல் முருங்கை பூக்களை உதிர்த்து நன்றாக வளர்வாயாக ! என்று ஆசீர்வாதம் செய்வது போல இருக்கிறது.

எங்கள் குடியிருப்பில் வைத்து இருக்கும் பன்னீர் மலர்கள்

இந்த மலரை மரமல்லி என்கிறார்கள் . நாங்கள் இந்த மரத்தை பன்னீர் மரம் என்று தான் சொல்வோம்.

அதிகாலை அதன் மணம் மனதுக்கு இதம் தரும்.

இந்த மரத்தையும் பன்னீர் புஷ்ப மரம் என்று சொல்வார்கள்.

மாயவரத்தில் எங்கள் குடியிருப்பில் இருந்தது. இதன் பூவும் மிக வாசமாக இருக்கும். இதன் இலையை என் மாமனார் சிவபூஜைக்கு பயன்படுத்துவார்கள்.  திருச்செந்தூரில் இந்த இலையில் சிறப்பாக இலை விபூதி என்று கொடுப்பார்கள்.

இந்த மரத்தில் வந்து அமர்ந்து தேன் குடிக்கும்  தேன்சிட்டுகளை முன்பு படம் எடுத்து பதிவு செய்து இருக்கிறேன்.

இந்தமலர்கள் பூத்து குலுங்கி புதிதாக இருக்கும் போது      அனைவரையும் மகிழ்ச்சி படுத்துகிறது.இவை உலர்ந்த பின் செடிகளுக்கு உரமாக்கலாம். 

 //மண் எதை நம்மிடம் கொடுத்ததோ அதை மீண்டும் மண்ணிடம் கொடுத்து விட வேண்டும். இல்லையேல் மண் ஏழ்மையுற்றுவிடும்.//

மலர்கள் உறவாடும் எண்ணங்களை போல 

எண்ணங்கள் போலவே அவையும் எண்ணற்றவை.

உவகைக்குரிய கூட்டாளிகள்.!

மனம் சார்ந்த இணைப்புக்கு பூக்களின் நேசம் உதவும்.

- ஸ்ரீ அரவிந்த அன்னை

நீங்களும் எடுத்து கொள்ளுங்கள்

தம்பி வருட வருடம் புதுவருட காலண்டர், கேக் கொண்டு வந்து கொடுத்து வாழ்த்து சொல்லி செல்வான். இந்த ஆண்டு பழனி, குருவாயூர் சென்று வந்தான் அதனால்   பஞ்சாமிர்தம்,  அரவணை பாயாசம் கிடைத்தது . பழனி முருகன்,குருவாயூர் கண்ணன் பிரசாதங்கள் கிடைத்தது மேலும் மகிழ்ச்சியை கொடுத்தது. அவன் இந்த வருடம் மகள் வீட்டுக்கு பொங்கலுக்கு போவதால் முன்பே பொங்கல் சீரும் கொடுத்து விட்டான்.

 இன்று இரவு எங்கள் குடியிருப்பில் புதுவருட விழா நிகழ்ச்சி நடைபெற்றது. அது அடுத்த பதிவில் வரும்.  

இறைவன் பாடல்கள் , சினிமா பாடல்கள் பழசு, புதுசு என்று நேயர் விருப்பமாக பாடினார்கள். குழந்தைகள் ஆடல் , பாடல் என்று நிகழச்சி நன்றாக இருந்தது.

இணையம் தந்த தாமரை மலர் கோலம். நான் போட்ட மார்கழி கோலங்கள் இன்னொரு பதிவில் இடம்பெறும்.

அனைவருக்கும் ஆங்கில புத்தாண்டு வாழ்த்துகள்! வாழ்க வளமுடன்! 

 மற்றும் உலக மக்கள் அனைவரும்  நலமோடும், வளமோடும் வாழ இறைவனை பிரார்த்தனை செய்து கொள்வோம்.

வாழ்க வையகம்! வாழ்க வையகம்! வாழ்க வளமுடன்!

----------------------------------------------------------------------------------------------------