கிறிஸ்மஸ் மற்றும் புத்தாண்டு நல் வாழ்த்துகள்!

மண்ணுலகில் இன்று தேவன் இறங்கி வருகிறார் நல்ல மனிதர் நடுவில் புனிதர் வடிவம் பெறுகிறார்

ஏழைத் தொழுவில் வந்த இறைமகனே

       தாலேலோ!

- கண்ணதாசன்.

மார்கழி மாதம்   சிறப்பான மாதம். பக்தியுடன் இறைவனை மட்டுமே நினைந்து  போற்றி துதிக்கும் மாதம். 

இறைவனை பாமாலை, பூமாலையுடன் மாதம் முழுவதும் துதிக்கும் மாதம்.  இறைவன் நினைவாக இருப்பதே இந்த மாதத்தின் சிறப்பு. 

 பெத்லகேமில்   இயேசுவின் பிறப்பும் மார்கழி மாதம் தான். கிறித்துவ அன்பர்கள் டிசம்பர் 25ம் தேதி அன்று இயேசுவின் பிறப்பை மகிழ்வுடன் கொண்டாடும் மாதம்.

இந்த பதிவில் கிறிஸ்மஸ், புத்தாண்டு வாழ்த்துகளும் , அரிசோனாவில் மகன் வீட்டுக்கு வந்து இருந்த   கிறிஸ்மஸ் கரோல் கீதங்கள்" பாடிய அன்பர்கள் படங்களும் இடம்பெறுகிறது.

படம்- கூகூள்,  கூகுளுக்கு நன்றி.

நாம் மார்கழி மாதம் அதிகாலை நேரம் தெருக்களில் இறைவனை நினைந்து பாடி இறைவனை போற்றி பஜனை செய்வது போல கிறித்துவர்களும் மார்கழி மாதம்   இரவு முதல் காலை வரை    வீதிகளிலும் , அன்பர்கள் வீடுகளிலும் ஏசு பாடல்களை பாடுவார்கள். கிறிஸ்மஸ் கரோல் கீதங்கள் மிகவும் இனிமையாக இருக்கும் கேட்க.

 ஏசு பிறப்பை சொல்லும் காட்சிகள் அமைத்த வண்டிகளில் பாடி கொண்டு வருவார்கள் . வண்டி விளக்குகளால் அலங்கரிக்கபட்டு இருக்கும், வண்டியில் வரும் கிறித்துமஸ் தாத்தா வேடம் அணிந்தவர் குழந்தைகளுக்கு மிட்டாய்களை , பரிசு பொருட்களை கொடுத்து மகிழ்வார்.

பஜனை பாடி வருபவர்கள் வீட்டு முன் அழகான கோலம் போட்டு  விளக்கு வைத்து  இருப்பவர்கள் வீட்டு முன் சிறிது நேரம் நின்று பாடி  போவார்கள். அது போல  இவர்களும் 

வாசலில்  ஸ்டார் தொங்க விட்டு வண்ண விளக்குகள் அமைத்து இருக்கும் வீட்டின் முன் சிறிது நேரம் பாடி போவார்கள்.  ஒருவருக்கு ஒருவர் கிறிஸ்மஸ் வாழ்த்து, புத்தாண்டு வாழ்த்தை பரிமாறி கொள்வார்கள்.

 

மார்கழி சிறப்புகள் என்ற பதிவில் மார்கழி மாதத்தின் சிறப்புகள் அந்த மாதம் நடக்கும் நிகழ்வுகள் எல்லாம் பதிவு செய்து இருக்கிறேன்.

பாட வருபவர்களை வரவேற்க வீட்டு முன்  பேரன் எழுதி, வரைந்து  வைத்து இருக்கும் பலகை.

வாசலில் பனி மனிதன் மற்றும் அலங்கார  விளக்குகள்.

 மகன் வீட்டுக்கு வந்து இருந்த கிறித்துவ நண்பர்கள்  "கிறிஸ்மஸ் கரோல் கீதங்கள்" பாடும் அன்பர்கள்.

 இறைவன் புகழ் பாடும் குழுவை  அமைத்து பாடும் அன்பர் நம் குடும்ப நண்பர். தமிழ்ச்சங்கத்தில் முக்கிய பொறுப்பில் இருப்பவர், தமிழ் பள்ளியில் ஆசிரியராக தன்னார்வ தொண்டு செய்பவர்.  தான் சார்ந்து இருக்கும் கத்தோலிக்க திருச்சபையில் தொண்டு செய்பவர்.  தமிழ்ச்சங்கம், தமிழ்பள்ளியில் நடக்கும் விழாக்களிலும்  அவரின் தொண்டு சிறப்பாக இருக்கும்.  

 நவராத்திரிக்கு  மனைவியுடன்    வந்து  பாடல்கள் பாடி நம்மை வாழ்த்தி செல்வார் வருடா வருடம்.

https://www.youtube.com/watch?v=ecfJXG_OuIM

நேரமும் விருப்பமும் இருந்தால் கேட்டுப்பாருங்கள் இனிமையாக கிறிஸ்மஸ் மற்றும்  புது வருட  வாழ்த்து சொல்லி பாடுகிறார்கள்

அருமையான இரண்டு  பாடல்களை  பாடினார்கள்,.

சாண்டா கிளாஸ் பரிசுகள் கொடுத்து  போனார். 

நானும், மருமகளின் அம்மாவும் நேரலையில் பார்த்தோம். வந்து இருந்தவர்கள் எங்களுடன் மகிழ்ச்சியாக உரையாடி வாழ்த்துக்களை சொன்னார்கள். நாங்களும் அவர்களுக்கு கிறிஸ்மஸ் , புத்தாண்டு வாழ்த்து சொன்னோம். 

மகன் படித்த பள்ளியில் சப்போஸ் கிறிஸ்மஸ் விழா வருடா வருடம் நடக்கும், அதில்  மகன் கிறித்துவின் பிறப்பை சொல்லும் பைபிள் வசனத்தை சொல்லுபவனாக நடித்தான்.

அதை அவர்களுடன் பகிர்ந்து கொண்டேன்.

//நமக்கு ஒரு பாலகன் பிறந்தார்

நமக்கு ஒரு குமாரன் கொடுக்கப்பட்டார்

கர்த்தத்துவம் அவர் தோளின் மேலிருக்கும்

அவர் நாமம் அதிசயமானவர்

ஆலோசனைக் கர்த்தா

வல்லமையுள்ள தேவன்

நித்திய பிதா

சமாதான்ப்பிரபு என்னப்படும்.//

எங்களுடன் புகைப்படம் எடுத்து கொண்டார்கள் அனைவரும். நாங்கள் பின்னால் டிவி திரையில் தெரிகிறோம்.

அன்று நல்ல பொழுதாக போனது. இறைவனுக்கு நன்றி.

படத்தில் உள்ளது போல குடும்பத்தினர் அனைவரும் பண்டிகையில் வேலைகளை கலந்து செய்யும் போது  தான்  மகிழ்ச்சி ஏற்படும். பண்டிகை வேலைகளை ஒருவரே செய்யும் போது அலுப்பும், சலிப்பும் ஏற்படும்.  அரிசோனாவில் நாங்கள் இரண்டு முறை கிறிஸ்மஸ் சமயம் இருந்தோம்.  மகன் குடும்பம்,  ஊரிலிருந்து வந்து இருந்த மருமகளின் தோழி குடும்பத்துடன்  கிறிஸ்மஸ் மரத்தை அலங்கரித்தோம். முன்பு பதிவு செய்து இருக்கிறேன்.

இந்த முறை விடுமுறைக்கு வந்து இருந்த  மருமகளின் அக்கா குடும்பத்தினரும் மகன் மருமகள், பேரன் எல்லோரும் சேர்ந்து அமைத்த கிறிஸ்மஸ் அலங்கராங்கள். பேரன் கிறிஸ்மஸ் மரத்துக்கு கீழே  அவனுக்கு பரிசாக வந்த அழகிய ரயிலை சுற்றவிட்டு இருந்தான்.

மகன் 10 வது படிக்கும் போது வரைந்த "நல்ல மேய்பர்" படம். 

பள்ளியில் பரிசாக பெற்ற " பைபிள் கதைகள் 100"  என்ற புத்தக முன் அட்டையில் உள்ளதைப்பார்த்து வரைந்தது.

"நானே நல்ல மேய்ப்பன்" என்று இயேசுகிறிஸ்து கூறி உள்ளதை குறிக்கும் படம்.

எங்கள் விட்டு கொலுவில் முன்பு  இடம் பெற்ற படம். பத்திரமாக வைத்து இருந்து  மகனிடம் கொடுத்து விட்டேன்.

மகன் எல்.கே.ஜி முதல் 5 வரை கிறிஸ்தவ பள்ளியில் படித்தான். நானும் சிறு வயதில் கிறிஸ்தவபள்ளியில் படித்தேன். மகளும் கிறிஸ்தவ பள்ளியில் படித்து இருக்கிறாள்.

மருமகள், மகன் , பேரன்  எல்லோரும் கிறிஸ்மஸ் மரம்  , மற்றும் ஏசு பிறப்பை சொல்லும் குடில் அமைத்து வீட்டை வண்ண விளக்குகளால் அலங்காரம் செய்து இருந்தார்கள். 

வந்த பெரியவர்கள், குழந்தைகளுக்கு சாண்டாகிளாஸ் கொடுப்பது போல சிறிய பரிசுப்பொருட்கள்.

மருமகள் செய்த கிறிஸ்மஸ் குக்கிஸ்

மருமகள் செய்த பிளம் கேக்

                                                   

பிளம் கேக் துண்டுகளாக செய்து வைத்து இருக்கிறார்கள்.

                                                    

வந்தவர்களுக்கு கொடுக்க மருமகள்    கேக், மற்றும் குக்கிஸ் செய்து இருந்தார். பேரனும் மகனும் உதவினார்கள்.

கிறிஸ்துமஸ் என்றதும் நமக்கு கிறிஸ்மஸ் தாத்தா நினைவுக்கு வந்து விடுவார். கிறிஸ்மஸ் அன்று கிறிஸ்மஸ் தாத்தா பரிசு பொருளுடன் வரும் வண்ணக் கோலம் போட்டுவிடுவேன்  வாசலில்.

 

இந்த ஆண்டு பேரன் இரண்டு கிறிஸ்மஸ் தாத்தாவைப்பார்த்து வந்து இருக்கிறான். 

பேரன் அனுப்பிய படம்.

எனக்கு பிடித்த பாடல் வாணி ஜெயராம் அவர்கள் பாடியது. கண்ணதாசன் அவர்கள் எழுதிய பாடல்.

 https://www.youtube.com/watch?v=GvvdpvNeyWQ

இந்த பாடலை யூடியூப்பில் கொடுத்தவருக்கு நன்றி.

உங்கள் எல்லோருக்கும் பிடித்த பாடல்தான் கேட்டுப்பாருங்கள்.

 

நம்  வலைத்தள நட்பு  ஏஞ்சலை நினைத்து கொள்கிறேன்.ஏஞ்சலுக்கு கிறிஸ்மஸ்  வாழ்த்துகள்.

அதிரா, பிரியசகி எல்லோரும் கிறிஸ்மஸ் பண்டிகையை கொண்டாடுவார்கள் அவர்களுக்கும் வாழ்த்துகள். 

அனைத்து அன்பர்களுக்கும் கிறிஸ்மஸ் மற்றும் புத்தாண்டு வாழ்த்துகள்.

வாழ்க வையகம்! வாழ்க வையகம்! வாழ்க வளமுடன்!

---------------------------------------------------------------------------------------------------