கார்த்திகை தீபமும் சொக்கப்பனையும்

மார்கழி பிறக்க போகிறது அதனால் வலையேற்றி வைத்த கார்த்திகை தீபத்திருநாள்   படங்களை பதிவாக்கி விட்டேன். இந்த பதிவில் கார்த்திகை தீப திருநாள், எங்கள் வீட்டில் நடந்தது, மகன் வீட்டில் நடந்தது,  மற்றும் கோவிலில் நடந்த சொக்கப்பனை படங்கள்  இடம்பெறுகிறது.

அண்ணாமலையார்  மகா தீபகார்த்திகை 

குறைவான விளக்குகள் தான் வைத்தேன், நிறைய வைத்த காலங்களை நினைத்து பார்த்து கொண்டேன்.

தாமரை விளக்கு மருமகள் வாங்கி அனுப்பினாள் தீபாவளிக்கு

அவல் பொரி, நெல்பொரி

உருண்டை பிடிக்கவில்லை, வெல்லபாகு போட்டு கிளறி வைத்து விட்டேன். அப்பம், அடை, உப்பில்லா கொழுக்கட்டை, மாவிளக்கு, மாவில் 27 நட்சத்திரங்களுக்கும் விளக்கு, மற்றும்

 பாகு காய்ச்சி ஊற்றி, பாசிப்பருப்பு, தேங்காய் தூண்டுகள், வறுத்துப்போட்டு ஏலக்காய் சுக்கு சேர்த்து செய்யும் பிடி கொழுக்கட்டை  செய்வோம் எப்போதும். .இந்த முறை  எதுவும் செய்யவில்லை. இதே பக்குவத்தில் பனையோலையில், திறளி இலையிலும் செய்வார்கள்.

 மாயவரத்தில் கோவில்பட்டி ஊரை சேர்ந்தவர்கள் கார்த்திகை தீப திருநாளுக்கு இந்த பனையோலை கொழுக்கட்டை செய்து கொடுத்து இருக்கிறார்கள். சக்தி விகடனில் வந்த காணொளி.

நேரமும் விருப்பமும் இருந்தால் பார்க்கலாம். பனையோலை கொழுக்கட்டை செய்முறை

திருவனந்தபுரம், நாகர் கோவில் பக்கம் இந்த பண்டிகைக்கு திரளி இலையில் கொழுகட்டை செய்வார்கள் அந்த இல்லை நல்ல வாசமாக இருக்கும்.

தொலைக்காட்சியில் திருவண்ணாமலை தீபம்  நேரலையில் பார்த்து விட்டு  அருகில் இருக்கும் ஐயனார் கோவிலில் சொக்கபனை ஏற்றுவதை பார்க்க போனேன். காலை முதல் பண்டிகை வேலைகள்  பார்த்தது கால் வலி   இருந்தது, இருந்தாலும் எப்போதும்  போய் வருவது போல போய்  தரிசனம் செய்து  வந்து விட்டேன்.

 அய்யனார், பிள்ளையார், முருகன்

நிலவும், சொக்கபனையும் இந்த முறை சின்னதாக வைத்து இருந்தார்கள். பெரிய பனை மரம் உயரம் வைப்பார்கள் . 

பனை மரம் உயரம் வைப்பது பற்றிய  "உவரி" கோவிலில் இப்போதும் நடப்பதை சக்தி விகடனில் படித்தேன். அதன் தொகுப்பு கீழே:-

சகல ஆலயங்களிலும் சொக்கப்பனை வைபவம் வெகு கோலாகலமாகக் கொண்டாடப்படும். ‘குறிப்பாக உவரி அருள்மிகு சுயம்புலிங்க சுவாமி திருக்கோயிலில் வைக்கப்படும் சொக்கப்பனை தமிழகத்திலேயே பிரமாண்டமானது’ என்கிறார், சிவபக்தரும் உவரி திருக்கோயில் ராஜகோபுரத் திருப்பணிக் கமிட்டியின் தலைவருமான ஜி.டி.முருகேசன். அவரே தொடர்ந்து சொக்கப்பனை வைபவத்தின் சிறப்புகளையும், தாத்பரியத்தையும் விவரித்தார். ‘‘பெரிய புராணத்தில் அற்புதமான பாடல் உண்டு.

//காணாத அருவினுக்கும் உருவினுக்கும் காரணாய

நீள்நாகம் அணிந்தார்க்கு நிகழ்குறியாம் சிவலிங்கம்

நாணாது மேடிய மால் நான்முகனும் காண நடுச்சேணாலும்

தழல் பிழம்பாய் தோன்றியது தெளிந்தார்...

இதுதான் அந்தப் பாடல்.

திருமாலும் பிரம்மனுமே அடிமுடி தேடிக் கண்டடைய முடியாத வண்ணம், நெருப்புத் தழலாகக் காட்சியளித்த பரமேஸ்வரனை அக்னிமயலிங்கமாக வழிபடுவதே சொக்கப்பனையின் தாத்பரியமாகும்.

திருக்கார்த்திகை தினத்தில் பனைமரத்தை வெட்டி எடுத்து வந்து ஆலயத்தின் முன் வெட்டவெளியில் நடுவார்கள். அதைச் சுற்றி பனை ஓலைகளைப் பிணைத்துக் கட்டி, உயரமான கூம்பு போன்ற அமைப்பை உருவாக்குவார்கள். மாலை வேளையில் இந்தப் பனைக்கூம்பின் முன் ஸ்வாமி எழுந்தருள்வார். சில கோயில்களில் அம்பாளும் ஸ்வாமியும் எழுந்தருள்வார்கள். சில கோயில்களில் பஞ்சமூர்த்திகள் (விநாயகர், முருகன், சண்டிகேஸ்வரர்) எழுந்தருள்வார்கள். அவர்களுக்கு தீபாராதனை முடிந்ததும், சொக்கப்பனை கொளுத்தப்படும்.

கொழுந்துவிட்டு எரியும் அந்த ஜோதியை சிவமாகவே எண்ணி வழிபடுவார்கள். சுமார் முப்பது, முப்பத்தைந்து அடி உயரத்துக்கு (முழுப் பனையையே சொக்கப்பனைக்குப் பயன்படுத்துவார்களாம்) அமைக்கப்படும் சொக்கப்பனை எங்கள் உவரி சுயம்புலிங்க சுவாமி கோயிலின் தனிச்சிறப்பு’’ என்றார் அவர்.

சில ஊர்களில், சொக்கப்பனை எரிந்து முடித்ததும், அதிலிருந்து பெறப்படும் கரியை தைலத்துடன் சேர்த்து ரட்சையாக, காப்பாக பூசிக் கொள்வார்கள். சாம்பலை எடுத்துச் சென்று வயற்காடுகளிலும் தூவுவார்கள். இதனால் அந்த வருடம் விளைச்சல் அமோகமாக இருக்கும் என்பது நம்பிக்கை//

நன்றி ஆனந்த விகடன்.

எல்லோருக்கும் தெரிந்த செய்திதான். இருந்தாலும் சொக்கபனை பதிவு என்பதால் சேர்த்து இருக்கிறேன். பெரிய புராண பாடலும் விளக்கமும்.

அய்யனார் கோவிலில் உள்ள லிங்கோத்பவர்.

அண்ணாமலைக்கு அரோகரா என்று குழந்தைகள் ஆரவாரம் செய்தார்கள்

கார்த்திகை திருநாள் அன்று அய்யனார் கோயிலில் நடந்த சொக்கபனை  சிறிய காணொளிதான் பாருங்க.

இனி மகன் ஊர் கார்த்திகை  தீபத்திருநாள் படங்கள்:- பேரன் அனுப்பி வைத்தான். நேரலையிலும் காட்டினான்.

முன் வாசல் மருமகளின் அக்கா வந்து இருந்தார்கள் இருவரும் சேர்ந்து விளக்கு ஏற்றுகிறார்கள்.

பின் வாசலில் மகன் தயார் செய்த  மீனாட்சி 

பேரன் விளக்கு ஏற்றுகிறான்.

நானும், மருமகளின் அம்மாவும் நேரலையில் பார்க்கிறோம்

முன்பு போய் இருந்த போது தாத்தவும், பேரனும், நானும் விளக்கு ஏற்றிய பழைய படம்

கார்த்திகை தீபத் திருநாள் அன்று பேரன் வைத்த புஷ்வாணம்

அழகாய் மேல் எழுப்பி பின் சட சட எனும் சத்தம் போட்டது.

காணொளி ஏற மறுக்கிறது.

நேற்று தஞ்சையம்பதி வலைத்தளம் வைத்து இருக்கும் சகோதரர் துரைசெல்வராஜூ அவர்கள் எங்கள் வீட்டுக்கு வருகை தந்தார்கள். உடல் நிலை  சரியில்லா சமயத்திலும், உறவினர் இல்லத்தின் திருமணத்தில் கலந்து கொண்டு  அப்படியே  இங்கு வந்து பல  நல்ல விஷயங்களை பேசி சென்றார்கள். நட்பை போற்றும் உள்ளம் வாழ்க!

வாழ்க வையகம்! வாழ்க வையகம்! வாழ்க வளமுடன்

----------------------------------------------------------------------------------------------------