உலக தண்ணீர் தினம் (2022)

//ஒவ்வொரு ஆண்டும் தண்ணீர் குறித்தான விழிப்புணர்வை முன்வைக்க சில தீம்கள் கையாளப்படும். அந்த வகையில் நேற்று  செனகலின் டாக்கரில் 9வது உலக நீர் மன்றத்தின் தொடக்க அமர்வில் IGRAC (nternational Groundwater Resources Assessment Centre)  தனது கருப்பொருளான நிலத்தடி நீர் - Making The Invisible Visible என்பது முன்மொழியப்பட்டுள்ளது. //

நன்றி - தினமலர்.

இந்த பதிவில்  எங்கள் குடியிருப்பு பக்கம் ஏற்பட்டு இருக்கும் மாற்றம் . அதனால் பறவைகள் படும் துயரம் இவற்றை இந்த உலக தண்ணீர் தின நாளில் எழுதலாம் என்று எழுதி இருக்கிறேன் .

எங்கள் குடியிருப்பு வளாகத்துக்கு அருகில்  இருக்கும் இந்த மரங்கள் அடர்ந்த பகுதியில் தான்   பல வகை பறவைகள்  இருந்தன.  இந்த படத்தில் முள்ளு மரங்கள் வெட்டப்பட்டு விட்டது.  இன்னும் அதிகமாய் அடர்த்தியாக இருந்தது. காலை நேரம்  குயிலின் கீதம், செம்போந்து பறவையின் ஒலி  தவிட்டுக்குருவி, மைனா, புல் புல், செண்பகப் பறவை  என்று பறவைகளின் ஒலி அதிகாலை முதல் மாலை வரை கேட்கும்.  அங்கிருந்துதான் எங்கள் குடியிருப்புக்கு பறவைகள் வரும்.

மழை பெய்யும் இந்த சிறிய காணொளி பார்த்தீர்கள் என்றால் தெரியும் மரங்கள் எப்படி அடர்த்தியாக இருந்தது என்று.

மரங்கள் இருந்த போது மழை பெய்யும் போது எடுத்த காணொளி

மனிதருக்கு வீடு கட்ட பறவைகள் வாழ்ந்த மரங்கள் அழிக்கப்பட்டு விட்டது.   அவைகளுக்கு வீடு இல்லை, அவைகள் எங்கு  போய் விட்டது என்று தெரியவில்லை. 

இந்த மரங்கள் இருந்த போது அடிக்கடி மழை பெய்து கொண்டு இருக்கும். மழை காணொளி நிறைய முகநூலில் பகிர்ந்து கொண்டு இருப்பேன். இப்போது   இந்த மரங்கள் அழிக்கப்பட்டவுடன் மழை இல்லை என்ற எண்ணம் வந்து விட்டது. கோடையில் மழை பெய்யும் இந்த முறை மழையே இல்லை.

மனிதனே மரங்களை வெட்டுவது என்றால்   வெகு நாள் ஆகும்,அது வரை பறவைகள் இருக்கும் . இப்போது  மின் அறுவை இயந்திரங்கள் வைத்தும், ஜேசிபி எனும் கனரக வாகனங்களை வைத்து முள்ளு காடுகள், கட்டிடம் இடிப்பது , பூமியை தோண்டுவது என்று வேலை எளிதானதும். மக்கள் உடனே மரங்களை அழித்து விடுகிறார்கள். உடனே பறவைகள் காணாமல் போய் விடுகிறது.

ஒரு பால்கனி இப்படி தடுப்பு போட்டு இருக்கிறேன்  அது வழியாக   எடுத்த படம்

வீட்டுமனை ஆகப் போகிறது, ஒரு வீடு இருந்த இடத்தில் பல வீடுகள் அடுக்குமாடி குடியிருப்பு வரப்போகிறது. ஆழ்துளை கிணறு போடப்படும் . எங்கள் குடியிருப்பிக்கும் தண்ணீர் தட்டுபாடு ஏற்படும்.

தண்ணீர் லாரிகள் இப்போது குடியிருப்புகளின் தேவையை பூர்த்தி செய்து வருகிறது. எவ்வளவு காலம்  இது  பூர்த்தி செய்யும்? கேள்வி நெஞ்சில் அலை மோதுகிறது. இந்த நிலை மாற வேண்டும்.

நிலத்தடி நீர் இருந்தால் தானே தண்ணீர் கிடைக்கும். இன்னும் இன்னும் என்று பூமியை ஆழ ஆழ தோண்டிக் கொண்டே இருக்கிறார்கள். அங்கு இருந்தால் தானே தண்ணீர் வரும்.

இப்படி கூடு கட்ட குச்சிகளை அங்கிருந்துதான் எடுத்து வரும். இனி எங்கள் வளாகத்தில் உள்ள மரங்களில் குச்சிகள் எடுக்க வேண்டும்.

மகன் கூடு வாங்கி தந்தான், என் கணவர் இதை ஒரு பால்கனியில் அமைத்தார்கள். ஆனால் இதில் வசிக்க  மாட்டேன் எங்கிறது.  முட்டையிடும் நேரம் இந்த கூட்டுக்கு வந்து விடும் பழகிய பழைய வீடுதான் அதற்கு பிடித்து இருக்கிறது. 

குருவிகள் பழைய வீட்டை சரி செய்து முட்டையிட போகிறது. ஒரு  குருவி  குப்பைகளை தள்ளுகிறது, இன்னொரு  குருவி யாராவது வருகிறார்களா என்று பார்க்கிறது.

இரண்டு நாட்களுக்கு முன் மீண்டும் முட்டையிட வந்து இருக்கிறது குருவிகள்.

 முன்பு அடர்ந்த காடு மாதிரி இருக்கும் அந்த பழைய இடத்திலிருந்து காய்ந்த சருகுகள், நார்கள், பஞ்சு போன்ற காய்களை கொண்டு வரும், இப்போது வெகு தூரம் போய் தேடி கொண்டு வருகிறது, சணல் கயிறு, தேங்காய் நார் கொண்டு வருகிறது கூட்டை அமைக்க.

இப்படி நமக்கு கண்ணுக்கு தெரிந்தே சில  பறவைகள் துன்ப படுவது தெரிகிறது, இன்னும் எத்தனை எத்தனை பறவைகள் துன்பபடப்போகிறதோ!

தண்ணீர் தண்ணீர்  ( 2020 )

 இந்த  பதிவை 391 பேர் படித்து இருக்கிறார்கள்.

உலகதண்ணீர் தினம் ( 2019)

 இந்த பதிவை 256 பேர் படித்து இருக்கிறார்கள்.

நீரின்றமையாது உலகு  (2012)

  இந்த பதிவை 672 பேர் படித்து இருக்கிறார்கள்

தண்ணீர் சிக்கனம் வேண்டும் இக்கணம்  (2010)

இந்த பதிவை 7411 பேர் படித்து இருக்கிறார்கள்.

 உலக தண்ணீர் தினத்தில் பழைய பதிவுகளை படித்து பார்த்தேன். நிறைய படித்து நிறைய சேகரிப்புகள் செய்து எழுதியது. படிக்க வில்லை என்றால் அதன் சுட்டிகள் மேலே இருக்கிறது படித்துப்பார்க்கலாம்.

மரங்கள் வளர்ப்போம் , மழை பெறுவோம் என்ற வாசகத்தை படிக்கும் போதும், இப்படி மரங்கள் அழிக்கப்படும் போதும் மனது சங்கடபடத்தான் செய்கிறது.  சொந்த வீடு ஒன்று என்று இருந்த நிலை மாறி வருங்கால சொத்து  சேமிப்பு என்று வீட்டு தேவைகள் அதிகமாகி வருகிறது. 

நீர் வளத்தையும், நிலவளத்தையும் பாதுகாக்க வேண்டும், நம் எதிர்கால சந்ததியினர்களுக்காக.

இருக்கும் நீரை சிக்கனமாக பயன்படுத்துவோம்.

வாழ்க வையகம்! வாழ்க வையகம்! வாழ்க வளமுடன்

----------------------------------------------------------------------------------------------------