சிங்கப்பூரில் தரிசனம் செய்த கோவில்கள்

மகன் குடும்பத்துடன் நான்  ஜூன் 5 ம் தேதி அரிசோனாவிலிருந்து சிங்கப்பூர்  வந்தேன்.  அங்கு உறவினர்களை, நண்பர்களை சந்தித்தோம். மற்றும்  சில இடங்களையும் சுற்றிப்பார்த்தோம்,  முதலில் ஸ்ரீ தண்டாயுதபாணி  கோவில் போனோம். சில தினங்களுக்கு முன் திருக்குட நன்னீராட்டு நடைப்பெற்று  கோவில் புது பொலிவுடன் இருந்தது. கோவில் படங்கள் இந்த பதிவில் இடம்பெறுகிறது.  

புதுக்கோட்டை, இராமநாதபுரத்தை சேர்ந்த  நாட்டுக் கோட்டை செட்டியார்கள் 1859ல் கட்டி இருக்கிறார்கள். சிங்கப்பூர் டேங்க் ரோட்டில் அமைந்து இருக்கிறது இந்த அழகிய கோவில். 

முன்பு இருந்த கோவில் அமைப்பும் இப்போது உள்ள கோவில் அமைப்பும்  உள்ள படங்கள். 2009ல் தான் இப்போது இருப்பது போல் கோவில் அமைந்து இருக்கிறது.

முதலில் வேல் மட்டும் வைத்து வணங்கி இருக்கிறார்கள்.1820 ஆம் ஆண்டு சிங்கப்பூரில் குடியேறிய நகர சமூகத்தினரால் 1859 ஆம் ஆண்டு கட்டப்பட்ட கோவில். பல மாற்றங்களை பெற்று இப்போது இருக்கும் அழகிய தோற்றத்தில் இருக்கிறது.

கலாச்சாரம், கட்டிடக்கலை, சமுதாய பணிகள் , மற்றும் பலவரலாற்று சான்றுகள்   கொண்டதாக இருப்பதால் இந்த கோவிலை  சிங்கப்பூர் அரசு தேசிய நினைவுச்சின்னமாக அறிவித்து இருக்கிறது.

வெளிப்பக்கம் சுவற்றில் திருக்கல்யாண சிலைகள் இருபக்கமும் அழகாய் இருக்கிறது.

என் கணவரின் தம்பி பெண் இந்த கோவில் போய் வரலாம் என அழைத்து  சென்றாள்.  கும்பாபிஷேகம் நடந்த கோவிலை  48 நாட்களுக்குள் பார்ப்பது சிறப்பு என்பதால் முதலில் முருகன் வழிபாடு.

எதிர்பக்கம் யாகசாலை அமைத்து இருந்து இருக்கிறார்கள்.

தோரண வாயில் அழகாய் இருக்கிறது

நல்ல உயரமான  அழகிய  முன் வாசல் கதவு

உள்ளே மிக அழகாய் வடிவு அமைக்கப்பட்டு இருக்கிறது. மேல் விதானம் அழகு . கோவிலின் விமானத்தைச் சுற்றியுள்ள 48 கண்ணாடி மாடங்களில் தெய்வச்சிற்பங்கள்  பொறிக்கப்பட்டு இருக்கிறது.

கண்ணாடி தடுப்புக்குள் தண்டாயுதபாணி

முருகன் சன்னதியின் வலபக்கம்  விநாயகரும், இடபக்கம் இடும்பனும் இருக்கிறார்கள்.

இடும்பன்

அருள்மிகு சுந்தரேஷ்வரர் சன்னதி தேவாரம் பாடினார் ஓதுவார்

பூஜை ஆகிறது. படங்கள் எடுக்க வேண்டாம என்று எங்கும் போடவில்லை, இருந்தாலும் கொஞ்சம் தூரத்திலிருந்து படங்கள் அலைபேசியில் எடுத்தேன். சுவாமி சன்னதி வெளியில் ஒருபக்கம் விநாயகர் , இன்னொரு பக்கம் முருகன் இருக்கிறார்கள்.

அருள்மிகு மீனாட்சி அம்மன்

அம்மனின் மூக்குத்தி விளக்கு ஒளியில்  பளிச்சென்று மின்னியது . அப்போது மாணிக்க மூக்குத்தி மதுரை மீனாட்சிக்கு பாடல் நினைவுக்கு வநதது. மதுரையில் இப்படி வெகு நேரம் அம்மனை பார்க்கமுடியவில்லையே ! என்ற ஆதங்கமும் மனதில் வந்து போனது.

இதற்கு முன் கும்பாபிஷேகம் நடந்த காட்சிகளை  வைத்து இருந்தார்கள். பணிகள் நடக்கும் படங்கள் இருந்தன.

அங்கு நடக்கும் விழாக்கள் பற்றிய விவரங்கள், நடந்தபோது எடுத்த படங்கள் காட்சிக்கு வைத்து இருந்தார்கள்.

ஆன்மீகம் மற்றும் சமூக சேவைகளும் இங்கு நடைபெறுகிறது.

வெள்ளித்தேர்

நடராஜர், சிவகாமி, நல்வர் உற்வச மூர்த்திகள் அலங்கரிக்க்கப்பட்டு இருந்தது.

திருமுறைக்கோவில் மைத்து இருந்தார்கள்.

உற்சவ முருகனுக்கு அழகான பூபந்தல்

பக்கத்தில் போய் படம் எடுக்க முடியாது தடுப்பு அமைத்து இருந்தார்கள்.

தூரத்திலிருந்து முருகனின் முகம் மட்டும். பக்கம் போனால் தான்  கம்பி தடுப்பு வழியாக முருகனை அழகாய் படம் எடுக்கலாம்.

ஆனந்த தாண்டவ நடராஜரும், சிவகாமி அம்மையும்  மாணிக்கவாசகர் சிற்பங்கள் அழகாய் இருக்கிறது. மண்டபத்தூண்களில் முருகனின் ஆறுபடை வீடுகள் சிலைகள் உள்ளன.

கண்ணாடி  கூண்டுக்குள் அழகான வெள்ளி மயில் வாகனம்

காவடி படங்கள் சுவரில் இருக்கிறது

பைரவர்

நவக்கிரகங்கள்

நாங்கள் போன இரண்டு நாட்களுக்கு முன் தான் திருக்குடநன்னீராட்டு நடந்து இருப்பதால்  மேலே குடங்கள் எடுத்து செல்ல படிகள் அமைத்து இருந்தது.

சுற்றுபிரகாரத்தில்  அன்னதான கூடம் இருந்தது அதன் அருகில்  தண்ணீர் சிந்தி இருப்பதால் அந்த நீரை அருந்தி கொண்டு இருந்த  புறா ஒன்று  நான் பேரனை படம் எடுக்கும் போது  சட்டென்று பறந்தது.

இன்னும் இரண்டு பயப்பட வில்லை.

அன்னதானசேமிப்பு  இடம்

காலை பூஜை முடிந்ததும்  நல்ல சூடாய் வெண்பொங்கல் பிரசாதம் இரண்டு தூக்கு வாளிகளில் கொண்டு வந்து வைத்தார்கள்.  நமக்கு வேண்டியதை எடுத்துக் கொண்டு மூடி வைத்துவிட சொன்னார்கள்.

பிரசாதம் உண்டு சிறிது நேரம் அமர்ந்து முருகனை தியானம் செய்து வந்தோம். மன நிறைவான வழிபாடு. அடுத்து போன கோவில் அடுத்த பதிவில் பார்ப்போம்.

வாழ்க வையகம்! வாழ்க வையகம்! வாழ்க வளமுடன்!

----------------------------------------------------------------------------------------------