மியாவ் மியாவ் பூனைக்குட்டி

மகள் வீட்டுத்தோட்டத்திற்கும் .வீட்டுக்கும் வந்த பூனைகள்

உங்களை எல்லாம் பார்த்தவுடன்  மகிழ்ச்சியாக இருக்கிறது. தினம்  வாங்க நீங்கள் எல்லாம்" என்று சொல்லி இருக்கிறேன். பறவைகளும், அணில்களும் பூனைகளும் இனி தொடர்ந்து வருவதாக வாக்கு அளித்து இருக்கிறார்கள்.  என்று போன  அணில் பதிவில்  சொல்லி இருந்தேன், நினைவு இருக்கும்.

தினம் வருகிறார்கள். அணிலை மீண்டும் பல கோணங்களில் படம் எடுத்தேன் அவை இன்னொரு பதிவில்.

இந்த பதிவில் மகள் வீட்டுக்கு வந்த பூனைகளும். நான் மற்ற இடங்களில் பார்த்த பூனைகளும் இடம் பெறுகிறது.

பூனையை பற்றி படித்த செய்திகள் கொஞ்சம் பகிர்ந்து இருக்கிறேன் சில படங்களுக்கு கீழ்.

தோட்டத்தில்

பால்கனியில் போட்டு இருக்கும்  மடக்கு நாற்காலியில் வந்து படுத்து கொள்ளும்

இன்னொரு பூனை 

இதன் கழுத்தில் டை கட்டியது போல வெள்ளைத்திட்டு

பூனைகளுக்கு காலர் எலும்புகள் என்று சொல்லக்கூடிய கழுத்திற்கும் தோளுக்கும் இடையேயான எலும்புகள் கிடையாதாம்.

• 

இந்த இடத்தில் அடிக்கடி வந்து படுத்து கொள்ளும்

இந்த பூனை யார் வீட்டிலோ வளர்க்கும் செல்ல பூனை கழுத்தில் சின்ன மணி கட்டி இருக்கிறார்கள்.

சின்ன குருவிகள், பட்டாம் பூச்சிகள், பறக்கும் எல்லா பூச்சிகளையும் வேட்டையாட ஓளிந்து  இருக்கும், அங்கேயே தவம் செய்வது போல காத்து இருக்கும், தூங்கும் அந்த மரத்தடியில்.

அதிரா வைத்து இருப்பார் பூனை கையை அசைப்பது போல,

 அது போல பூச்சிகளை காலால்  அடித்து வீழ்த்தி தின்னும்.

பாலூட்டிகள் மற்றும் பறவைகளைச் சேர்ந்த 33 இனம் பூனைகளால் அழிந்துள்ளதாம்,  மிகவும் அதிகமாக வேட்டையாடக் கூடிய 100 இனங்களில் பூனையும் ஒன்றாம்.

திருவனந்தபுரத்தில் என் மாமாவீட்டின் பின்புறம்

 தென்னைமரத்தின்  பின்னே  ஒளிந்து கொண்டு ஒரு பார்வை பார்க்கிறது பூனைகுட்டி

மறுநாள்  பயமில்லை

நான்கு குட்டி போட்டதாம்,  இரண்டை வேறு யாரோ எடுத்து போய் விட்டார்களாம்.

பெண்பூனைகள் மோலி அல்லது ராணி என்று அழைப்பார்களாம்.

மதுரையில் எங்கள் குடியிருப்பில் பக்கத்து வீட்டு குப்பைகூடையை  உருட்டும் பூனை

குப்பை கூடையை தள்ளி அதில் உள்ளதை தின்னும் நாம் கதவை திறந்தால் கூடைக்கு பின் ஒளிந்து கொண்டு பார்க்கும்.

பொதுவாக பூனைகள் ஒரு உணவை மூன்று முறை ருசித்து சோதனை பார்த்தபின் நான்காவது முறை நம்பிக்கையுடன் அதனை உண்ணுமாம். 

அதிகாலையில்  குப்பை கூடை எப்போது வைப்பார்கள் என்று மாடி படியில் குட்டியுடன் காத்து இருக்கிறது

மதுரையில்   எங்கள் குடியிருப்பு பூனைகள் மதிய நேரம் ஓய்வு எடுக்கிறது

பூனைகள் ஒரு நாளில் 70 சதவீதத்தை தூங்கியே கழிக்குமாம்.

மாயவரத்தில் எங்கள் குடியிருப்பு பூனைகள் இரண்டும்.
 

இதற்கு உடம்பு சரியில்லை .மெலிந்து இருக்கும்.

மதுரையில் வடக்கு மாசி வீதியில் உள்ள கிருஷ்ணர் கோவிலில் பார்த்த  அழகான பூனைகள். ஒரு பூனை தூங்குகிறது, ஒரு பூனை விழித்துப்பார்க்கிறது.

பூனைகளை பார்த்தவுடன் நமக்கு பள்ளியில் படித்த பாடல்கள் நினைவுக்கு வரும்.

வெள்ளை நிறத்தொரு பூனை

எங்கள் வீட்டில் வளருது கண்டீர்

பிள்ளைகள் பெற்றதப் பூனை

அவை பேருக்கொரு நிறம் ஆகும்

சாமபல் நிறத்தொரு குட்டி

கரும் சாந்தின் நிறம் ஒரு குட்டி

பாம்பின் நிறமொரு குட்டி

வெள்ளைப்பாலின் நிறம் ஒரு குட்டி

எந்த நிறமிருந்தாலும் 

அவை யாவும் ஒரே தரம் அன்றோ

இந்த நிறம் சிறிதென்றும்

இஃது ஏற்றம், என்றும் சொல்லலாமோ

வண்ணங்கள் வேற்றுமை பட்டால்

அதில் மானுடர் வேற்றுமை இல்லை

எண்ணங்கள் செய்கைகள் யாவும்

இங்கு யாவருக்கும் ஒன்றென  காணீர்

- தேசீய கவி பாரதி

பாரதியின் கவிதை போல ஒவ்வொன்றும் ஒவ்வொரு நிறம். 

பி. சுசீலா அவர்கள் நன்றாக பாடி இருக்கிறார்கள் கேட்டுப்பாருங்கள்.

https://www.youtube.com/watch?v=aQ3i5z2l9dQ

பாட்டியின் வீட்டுப்பழம்பானை

அந்தப்பானை ஒரு புறம் ஓட்டையடா

ஓட்டைவழி ஒரு சுண்டெலியும் அதன்

உள்ளே புகுந்து நெல் தின்றதடா

உள்ளே புகுந்து நெல் தின்று தின்று

வயிறு ஊதிப் புடைத்துப் பருத்ததடா

மெள்ள வெளியில் வருவதற்கும்

ஓட்டை  மெத்தச் சிறிதாக்கிப் போச்சுதடா

பானையை காலையில் திறந்தவுடன்

அந்தப் பாட்டியின் பக்கமாக வந்த ஒரு

 பூனை எலியினை கண்டதடா

அதை அப்படியே கவ்வி சென்றதடா

கள்ள வழியில் செல்பவரை  எமன்

காலடி பற்றித் தொடர்வானடா!

நல்லவழியில் செல்பவருக்கு தெய்வம்

நாளும் துணையாக நிற்குமடா!

 -கவிமணி தேசீகவிநாயகம் பிள்ளை

குழந்தைகளுக்கு  நல்ல நீதி போதனையை சொல்லும் கதை  பாடல்.

பூனைக்கு மணி கட்டும் கதை கேட்டு இருப்பீர்கள், படித்து இருப்பீர்கள். இது பேரன் கவின் தயார் செய்த கதை வேறு மாதிரி இருக்கும் கேட்டுப்பாருங்கள்.

"கவினும் தமிழும்" என்று யூடியூப் சேனல் வைத்து இருக்கிறான்.அதில் அவன் நண்பர்களுக்கு ஆங்கிலம், தமிழ்   இரண்டிலும் இந்த பூனை கதையை சொல்லி இருக்கிறான். 

https://www.youtube.com/watch?v=HOZ2260SXmE

அன்பை நாடி வரும் ஜீவன்.  வீட்டை சுற்றி சுற்றி வரும் , நம் காலில் உரசி கொண்டு சத்தம் கொடுக்கும். என்னை வீட்டுக்குள் விடேன் என்று. நாய் வளர்த்தவர்களை விரும்பும். பூனை வாழும் வீட்டை விரும்பும் என்பார்கள்.

 

நம் வலைத்தள நண்பர்கள் அதிரா, ஏஞ்சல், துளசி கோபால் நினைவுக்கு வருவார்கள்.  செல்லபிராணியாக பூனையை அன்பாக  வளர்ப்பவர்கள்.

ஸ்ரீராம் வீட்டிலும் பூனைகுட்டி இருந்தது. அவர் மடியில் படுத்து இருக்கும் படம் போட்ட நினைவு இருக்கிறது.

வாழ்க வையகம்! வாழ்க வையகம் ! வாழ்க வளமுடன்!

------------------------------------------------------------------------------------------------