கோடையிலே இளைப்பாறி

போன மாதம் ஒரு ஞாயிற்றுக் கிழமை இந்த நீர்நிலை பார்க்க  போனோம். அந்த இடம் மிகவும்  அழகாய் இருந்தது. வீட்டிலிருந்து சிறிது தூரத்தில் தான் இருந்தது.  அந்த நீர் நிலையில் வாத்துக்களும், பறவைகளும்  நிறைய இருந்தது.

அழகான நீர் நிலையும்,  நிழல் தரும் மரங்களும், பறவைகளும்,விலங்குகளும்,(நாய்கள்) மற்றும் அங்கு பார்த்த  மனிதர்களும் மகிழ்ச்சியாக இருப்பதைப்பார்த்த  போது இந்த பாடல் நினைவுக்கு வந்தது.

திருவருட்பா

கோடையிலே இளைப்பாற்றிக் கொள்ளும் வகை கிடைத்த

குளிர்தருவே தருநிழலே நிழல்கனிந்த கனியே

ஓடையிலே ஊறுகின்ற தீஞ்சுவைத்தண்ணீரே

உகந்ததண்ணீரிடைமலர்ந்த சுகந்த மண மலரே 

மேடையிலே வீசுகின்ற மெல்லிய பூங் காற்றே

மென்காற்றில் விளைசுகமே சுகத்தில் உறும்பயனே ஆடையிலே யெனைமணந்த மணவாளா பொதுவில் 

ஆடுகின்ற  அரசே என் அலங்கல் அணிந்தருளே.

- இராமலிங்க அடிகளார் (வள்ளலார்)

வள்ளலார் பாடல் பள்ளியில் மனப்பாடச் செய்யுள் நமக்கு .

 

இந்த பாட்டில் சொல்வது போல உலக வாழ்க்கையில்   உழலும் போதும்,  கோடை போன்ற துன்பம் ஏற்படும் போதும் நிழல் தரும் மரமாக , கனி தரும் மரமாக  இறைவன் இருக்கிறான்.  நமக்கு மட்டும் அல்ல எல்லா உயிர்களுக்கும்தான்.

கோடையிலே இளைப்பாற்றி கொள்ள சிறந்த இடமாக இருந்தது இந்த இடம். 

மரத்தின் நிழலில்  இளைப்பாற்றிக் கொள்ளும் வாத்துக்கள்

                                கொஞ்சம்  செல்ல சண்டை

இவைகள் நடப்பதைப்பார்த்தவுடன் நினைவுக்கு வந்த பாடல்.

குள்ள குள்ள வாத்து

குவா குவா வாத்து

மெல்ல உடலைச் சாய்த்து

மேலும் கீழும் பார்த்து

செல்லமாக நடக்கும்

சின்ன மணி வாத்து 

ஏன் தலை குனிந்தாயோ!

கொக்கு ஒரு காலில் தவம் இருக்கும், வாத்தும் ஒரு காலில்  தவம் இருக்கிறது

ஒரு கால் மட்டும்தான் தெரிகிறது

கழுத்து நீண்ட வாத்துக்கள் ஆண் வாத்துக்கள் பெண் வாத்துக்களுக்கு கழுத்து குட்டையாக இருக்கிறது

பறவைகளும் வாத்துக்களும் பார்க்கவே  மகிழ்ச்சியாக இருந்தது

 தண்ணீர் ,  பச்சை, நீலவண்ணத்தில்  பார்க்க அழகாய் இருக்கிறது

தண்ணீர் குடிக்கிறது காகம்

குடித்த தண்ணீரை தலையை மேலே தூக்கி விழுங்கும் போல!

குளித்து விளையாடும் காகம், கருஞ்சிட்டு

கம்பீர நடை 

ஒரு காகம் பாடி    நடனம் ஆடுவது போல் இருக்கிறது. மகிழ்ச்சி துள்ளல்

கோடையிலே மர நிழலில் பாறை மேடையில்  இளைப்பாற்றி கொள்கிறது.

காகம் போலவே இந்த கருஞ்சிட்டும் உணவு பொருளை தண்ணீரில் கழுவி சாப்பிடுகிறது. கீழே தண்ணீர் குடிக்கும் காகம், உணவை கழுவி சாப்பிடும் கருஞ்சிட்டு. சிறிய காணொளிதான் பாருங்கள்.

நான் எடுத்த ஒரு நிமிடக் காணொளி

வெயில் நேரத்தில் குளிக்க வசதியாக வித விதமாக தண்ணீர் விழும் அமைப்புக்கள். கள்ளி செடியிலிருந்து தண்ணீர் , மீன் வாய் வழியாக தண்ணீர், வாளியை கவிழ்த்தினால் போல தண்ணீர் கொட்டியது. தூரத்திலிருந்து படம் எடுத்தேன்.

அதில் விளையாடி களிக்கும் குழந்தைகளை பார்க்கவே மகிழ்ச்சியாக இருந்தது.

பறவைகளைப்பார்த்ததும்   பக்கத்தில் ஓட  ஆசை

கடல் அலை போல இருக்கிறது . நீர் நிலையிலே இருந்து குளிர்ந்த    மெல்லியபூங் காற்றின்  சுகத்தை அனுபவித்து நடக்கும் பறவை

நாங்களும் சுகமான காற்றை அனுபவித்து நிழலில் அமர்ந்து கொண்டு போன தயிர் சாதம் மாவடு, நெல்லிக்காய் ஊறுகாயோடு  உண்டு மகிழ்ந்து வந்தோம்.

வாழ்க வையகம் ! வாழ்க வையகம் ! வாழ்க வளமுடன் !

-------------------------------------------------------------------------------------------