மாவிளக்குப் பார்த்தல்

விசு14 மே, 2020 ’அன்று’ பிற்பகல் 7:06

நமக்கு என்னமோ கொழுக்கட்டை என்றாலே இனிப்பாதான் இருக்கணும்னு ஒரு பீலிங். பார்க்க அருமையாக உள்ளது. விளக்குமா (மாவிளக்கு ?) எப்படி செய்வது என்று ஒரு பதிவு போடுங்களேன். அதை சாப்பிட்டு தான் எம்புட்டு நாள் ஆச்சி!

விசு16 மே, 2020 ’அன்று’ பிற்பகல் 9:48

மேடம், சீக்கிரம் அந்த மாவிளக்கு செய்முறை பதிவை போடுங்க। ப்ளீஸ்!

போன பதிவில் விசு அவர்கள் கொடுத்த பின்னூட்டத்தில்  இப்படிக் கேட்டு இருந்தார். மீண்டும் 16 ம் தேதி வந்து கேட்டுவிட்டார். 

நிஜமாக கேட்டாரோ, அல்லது விளையாட்டுக்குக் கேட்டாரோ தெரியாது.நான் மாவிளக்கு பதிவு போட்டு விட்டேன்,

பெரிய கார்த்திகைக்குச் செய்த மாவிளக்கு

சோமவாரத்திற்குச் செய்த மாவிளக்கு

"மாலை மலர்" பத்திரிக்கையில் சர்வ மங்கலங்களும் தரும் மாவிளக்கு விரத வழி பாடு பற்றியும் ,   மாவிளக்கு செய்யும் காலங்கள் மற்றும் செய்யும் முறை பற்றியும் இருக்கிறது படித்துப் பாருங்கள் விசு அவர்களே.

மாலை மலரில் படித்ததில் பிடித்தது.

//இடித்தெடுத்த பச்சரிசி, வெல்லம், ஏலக்காய் போன்ற கலவையை விளக்கு வடிவில் செய்து தீபம் ஏற்றுவதே ‘மாவிளக்கு’ ஆகும். காணும் இடங்களெல்லாம் நீக்கமற நிறைந்திருக்கும் பேரொளி வடிவான இறைத்துவத்தையே மாவிளக்கு உணர்த்துகிறது. அரிசி (அன்னம்) - பிரம்ம ஸ்வரூபமாகும். உலகில் உள்ள உயிர்கள் அனைத்தும் வாழ்வதற்கு ஆதாரமாக விளங்குவது இந்த அன்னம்தான். வெல்லம் என்பது மதுரம். அதாவது இனிமை. அம்பிகை மதுரமானவள். ஒவ்வொரு ஜீவனுக்குள்ளும் மதுரமான அம்பிகையே உறைகிறாள்.//

நன்றி :- மாலை மலர்

எங்கள் வீட்டில் செய்யும் காலங்கள்- கார்த்திகை சோமவாரம் (திங்கள் கிழமை) அப்புறம் ஆடி வெள்ளி, தை வெள்ளி- இறைவனுக்கு ஏதாவது வேண்டிக் கொண்டு, கோவிலில்,  வீட்டில்  மாவிளக்கு பார்ப்போம். நாங்கள் 'மாவிளக்கு பார்த்தல்' என்று தான் சொல்வோம்.

ஆடி வெள்ளி, தை வெள்ளியில், ஆவணி ஞாயிறு, ஆகிய காலங்களில் அம்மனுக்கு மாவிளக்கு பார்ப்பார்கள். புரட்டாசி சனிக்கிழமை பெருமாளுக்கு கார்த்திகை சோமவாரத்தில், சஷ்டியில் முருகனுக்குப் பார்ப்பார்கள்.  பங்குனி உத்திரம் அன்று குலதெய்வத்திற்கு மாவிளக்கு பார்ப்பார்கள்.

விரதங்களும் உடல் நலமும் -  என்ற  முன்பு எழுதிய எனது பதிவிலிருந்து கொஞ்சம்,- மாவிளக்கு பற்றி வருவதால்.

          

என் அம்மா கார்த்திகை மாதத்தில் வரும் திங்கள் கிழமை (சோமவாரவிரதம்) வீட்டில் என் அப்பாவைத் தவிர எல்லோரையும் கடைப்பிடிக்க வைத்தார்கள். காலையும், மதியமும், உணவு அருந்தாமல், மாலை மாவிளக்கு செய்து பூஜை முடிந்தபின் தான் உணவு.

பள்ளி சென்று வந்தபின் குளித்து பூஜையில் உட்கார்ந்தால் இரண்டு மணி நேரம் பஜனை. அம்மா எப்போது பாடல் முடிப்பார்கள் உணவு தருவார்கள் என்று இருக்கும்..பூஜை முடிந்தபின் அக்கம்பக்கத்தில் உள்ளவர்களுக்கு மாவிளக்குப் பிரசாதம் கொடுத்து வந்தபின்தான் எங்களுக்கு உணவு. அப்பாதான், ’காலையிலிருந்து ஒன்றும் சாப்பிடாமல் இருக்கிறீர்கள் சீக்கீரம் சாப்பிடுங்கள்’’ என்பார்கள். 

இந்த விரதத்தைச் சிறு  வயதில் கடைபிடிக்கக் கஷ்டமாய் உணர்ந்தாலும், இப்போது ஆரோக்கியமாக இருக்கிறேன். இன்றும் சோமவார விரதம் கடைப்பிடித்து வருகிறேன்.

எங்கள் வீட்டில் மாவிளக்கு ஒரு யாழ்ப்பாணத்துத் தேங்காய் போலப் பெரிதாக இருக்கும். மூன்று மாவிளக்கு ஏற்றுவார்கள். ஒற்றைப்படையில் தான் எங்கள் வீடுகளில் ஏற்றுவோம்.

நம்ம அதிரா, சஷ்டிக்கு  தினைமாவில் மாவிளக்கு செய்வார் . அதுவும் நன்றாக இருக்கும்.

விசு நீங்கள் கேட்ட செய்முறைக்கு வருகிறேன்.

ஒரு ஆழாக்கு, அல்லது ஒரு கப் பச்சரிசி   எடுத்துக் கொள்ளுங்கள்அதை நன்கு கழுவிவிட்டு  வேறு தண்ணீர் ஊற்றி  ஒரு மணி நேரம் ஊற வையுங்கள். பின்பு நீரை  ஒரு சுத்தமான துணியில் வடிகட்டிக் கொள்ளுங்கள் , அந்தத் துணியைக் கீழே விரித்து அரிசியைப்  பரப்பி விடுங்கள். கொஞ்சம் ஈரப்பதம் இருக்கும்போது மிக்சியில் திரித்துக்கொள்ளுங்கள்.(முன்பு உலக்கை கொண்டு உரலில் இடிப்போம்) நைஸாகச்  சல்லடையில் சலித்துக் கொள்ளுங்கள். சிலர் சலிக்கமாட்டார்கள், அது 'பிறுபிறு' என்று இருக்கும். சாப்பிட முடியாது வயிற்றுக்கும் ஒத்துக் கொள்ளாது என்று அம்மா சலித்துத்தான் செய்வார்கள். நானும் அப்படியே செய்வேன்.

ஒரு கப் அரிசி மாவுக்கு கால் கப் பொடித்த வெல்லம் போதும்.  அல்லது இனிப்பு வேண்டும் என்றால் மேலும்   ஒரு கைப்பிடி வெல்லத்தூள்    எடுத்துக் கொள்ளலாம்.

ஒரு வாய் அகன்ற பாத்திரத்தில் (எங்கள் வீடுகளில் மாவிளக்கு செய்ய என்றே தனியாகப் பாத்திரம் வைத்து இருப்போம்)  அச்சுவெல்லம், அல்லது மண்டைவெல்லம் (பேட்டை வெல்லம்) அல்லது பக்கெட் வெல்லம் எது எடுத்துக் கொண்டாலும் நன்றாகப் பொடித்துக் கொண்டு மாவையும், வெல்லத்தையும் மாவிளக்குப் பாத்திரத்தில் போட்டு  மாவு அளவுக்கு ஏற்றாற்போல்  ஒரு ஸ்பூன் நெய்,அல்லது இரண்டு ஸ்பூன் நெய் ஊற்றி   ஏலக்காய்ப் பொடி ,  போட்டுக் கையால் நன்கு பிசைய வேண்டும். பிசைந்து அப்படியே மூடி வைத்து விட்டு  பூஜைக்கு செய்ய வேண்டிய வேலைகளைச்  செய்துவிட்டு வந்து கலவையைக் கையால் எடுத்துப் பிடிக்க வருகிறதா என்று பார்க்க வேண்டும். இல்லையென்றால் மாவு வெல்லம் கலந்த கலவையை மிக்சியில் ஒரு ஓட்டு ஓட்டி எடுக்கலாம். கவனம் தேவை. மிகவும் ஓடி விட்டால் பாயசம் போல் ஆகிவிடும். 

முன்பு மர உலக்கையில் இருப்புப்பூண் போட்டிருக்கும். அதில் உரலில் இரண்டு இடி இடிப்பார்கள் மிக அழகாய் மாவு திரண்டு வந்து விடும்.

எடுத்து மூன்று உருண்டையாக, அல்லது இரண்டு உருண்டையாக, அல்லது ஒன்றோ அவர் அவர் வீட்டு வழக்கப்படி உருண்டை செய்து  நடுவில் குழி செய்துகொண்டு நெய்யை ஊற்றிப் பஞ்சுத்திரி போட்டு விளக்கு ஏற்ற வேண்டியதுதான். மாவிளக்கில் குங்குமம் நல்ல தரமான குங்குமப்பொட்டு வைக்க வேண்டும். உங்கள் ஊரில் கிடைக்கவில்லையென்றால்  பரவாயில்லை.

தண்ணீர், பால் என்று சிலர் மாவில் விட்டுப் பிசைவார்கள். நாங்கள் அப்படி செய்வது இல்லை. அரிசி மாவு காய்ந்து விட்டால்தான் அப்படி செய்ய வேண்டும். ஈர அரிசி என்றால் இவை எல்லாம் தேவை இல்லை, வெல்லம் கலந்து அழுத்திப் பிசைந்தாலே போதும்.

மகனது ஊரில் கிடைத்த இலையில் மாவிளக்கு -பெரிய  கார்த்திகை  அன்று ஏற்றிய மாவிளக்கு- தோட்டத்தில் இருந்த ரோஸ் கலர் அரளிப்பூ

சங்கரன்கோவிலில் ஆடித்தபசு சமயம்  மாவிளக்கு மாவு கொண்டு போக முடியவில்லை  என்றால் கோவில் வாசலில் மாவிளக்கு மாவு விற்பார்கள் வாங்கி, தேன் கலந்து, மாவிளக்குப் பார்த்துவிடுவார்கள்.

எல்லோருக்கும் தெரிந்ததுதான் மாவிளக்கு செய்முறை. விசு அவர்கள் கேட்டதால் இங்கு பகிர்ந்து இருக்கிறேன்.

வாழ்க வையகம்! வாழ்க வளமுடன் 

---------------------------------------------------------------------------------