சிற்றுண்டியும், வற்றலும்

//என் அம்மா செய்யும் சிறு கொழுக்கட்டையில் தேங்காய் , சிவப்பு மிளகாய், உப்பு வைத்து அரைத்து கடுகு உளுத்தம்பருப்பு, கருவேப்பிலை போட்டுத்  தாளிதம் செய்வார்கள் . //

மணிக்கொழுக்கட்டை பதிவில் என் அம்மா செய்யும் முறையைக் குறிப்பிட்டு இருந்தேன்.

கொழுக்கட்டை மாவில் கொழுக்கட்டைகள் செய்துகொள்ள வேண்டும். தேங்காய்த்துருவல், மிளகாய், உப்பு வைத்து தண்ணீர் இல்லாமல், படம் நாலில் உள்ளதுபோல்  இப்படிப் பொடி செய்துகொள்ள வேண்டும்.  கடுகு, உளுத்தம்பருப்பு தாளித்துப் பெருங்காயத்தூள் கொஞ்சம் போட்டு, வெந்த கொழுக்கட்டையில், தேங்காய்த்தூள், ஒரு ஸ்பூன் நெய்விட்டுப்   பிரட்டினால் சுவையான  காரக் கொழுக்கட்டை தயார்.

வாழைக்காய் அப்பளம் எங்கள் ப்ளாக்கில்  திங்கள் கிழமை பதிவாக எளிதான முறையில் செய்முறை  கொடுத்தேன் . அதை படித்த நினைவு இருக்கும் என்று நினைக்கிறேன்.

வாழைக்காய் அப்பளம்  2013 ல் என் தளத்தில் போட்டு இருந்தேன். கொஞ்சம் வேறு முறையில் இருக்கும். படித்துப் பாருங்கள்.

- "வலைச்சரத்தில்" இந்தப் பதிவு இடம்பெற்றது. இடம்பெற்றதை  மகிழ்ச்சியோடு யாரெல்லாம் வந்து சொன்னார்கள், பின்னூட்டங்களில்  என்று அறிந்து கொள்ளலாம்.

வாழைக்காய் செய்முறைகள் இன்னும் என்ன என்ன எல்லாம்  செய்யலாம் அதை பின்னூட்டங்களில் கலந்து உரையாடி இருப்பார்கள்.  இந்தப் பழைய பதிவைப் படித்தால் தெரிந்துகொள்ளலாம். எங்கள் ப்ளாகில் பகிர்ந்த வாழைக்காய் வற்றலுக்கும் இந்த வாழைக்காய் வற்றலுக்கும் என்ன வித்தியாசம் என்று  தெரிந்து கொள்ளலாம்.

வெயில் வீணாகப் போகாமல் வற்றல், வடகம்  போட்ட காலங்கள், இப்போதைய நிலைமையைச் சொல்லி இருப்பேன் இப்படி:-

//அக்கம் பக்கத்து வீடுகளில் கூழ்வடகம் போடவில்லையா? என்றும்  முடித்துவிட்டீர்களா? என்றும் ஒருவருக்கு ஒருவர்   கேட்டுக் கொள்வார்கள்

.
 திருநெல்வேலியில் சாலைக்குமரன் கோவிலின் எதிரில் அருமையான வீட்டுமுறையில் போட்ட வடகம், வத்தல் கிடைக்கும். சென்ற முறை அங்கு சென்றிருந்தபோது அதை வாங்கி வந்துவிட்டேன்.  அங்கு வாங்கியதைக் குழந்தைகளுக்குக் கொடுத்துவிட்டேன். நம்மால் இப்போது செய்ய முடியவில்லை. வீட்டில் எல்லோரும், கஷ்டப்படுத்திக் கொள்ளாதே! போதும். வத்தல் எல்லாம் போட்டு வத்தலாய்க் காய்ந்தது எல்லாம் போதும்! என்கிறார்கள்.

முன்பெல்லாம் இரவு சுடச் சுட சாதம் , வத்தக் குழம்பு , மிளகு ரசம், , துவையல், வத்தல் , வடகம்தட்டு நிறைய வறுத்து வைத்துச்  சாப்பிட்ட காலங்கள் போய்விட்டது. இப்போது இரவு, பலகாரம் தான். குழந்தைகளுக்கும் விதவிதமாய் டிபன் தான் வேண்டி இருக்கிறது. வத்தல் வடகம் பொரிப்பது குறைந்து விட்டது.//

ருசியாக இருந்தது அந்த வாழைக்காய் தட்டைகள்-(பூரிகள்!)

இந்த முறை ஆசைப் பட்டதே தப்பு,  வெயிலே இல்லை, பால்கனியில். 

இரண்டு வாழைக்காயை  வேகவைத்து விட்டேன், பச்சைமிளகாயைய்ப் பார்த்தால் பச்சையாக இல்லை. பழுத்த பச்சைமிளகாய் தான் இருந்தது, பரவாயில்லை என்று அதை உப்பு பெருங்காயத்தோடு சேர்த்து அரைத்து விட்டேன். வெயில் இல்லையே. தட்டை போல்தானே இருக்கிறது. இப்படியே பொரித்துப் பார்த்தால் என்ன என்று  இரண்டை எண்ணெயில் போட்டேன். போட்டால் பூரி போல் பொங்கி நன்றாக எண்ணெய் குடித்துக் கொண்டு இருந்தது. இவ்வளவு எண்ணெய் குடித்தால் உடம்புக்கு ஆகாதே என்று  ஆளுக்கு இரண்டு மட்டும் போட்டு வெந்து எடுத்து விட்டு மீதி மாவை அப்பளமாக இட்டுக் காய வைத்து விட்டேன்.

100 ரூபாய்க்கு காய் கொண்டு வந்து கொடுத்தார்கள் எங்கள் வளாகத்தில். நிறைய வெண்டைக்காய் இருந்தது, என் கணவர் வெண்டைக்காய் வற்றல் போடு என்றார்கள்.  வெயிலே சரியாக இல்லை இந்த வீட்டில்.  இருந்தாலும்  வெண்டைக்காயை வெட்டிக் காய போடும் பையில் போட்டுக் கொடியில் மாட்டிக் காய வைத்து எடுத்துக் கொண்டேன். மூன்று  நாள் ஆச்சு, ஈரப்பசை போய் காய. அப்புறம் தயிரைக் கடைந்து உப்பு போட்டுப்  பிசறிக்  காய வைத்து எடுத்து இருக்கிறேன்.

கடையில் வாங்கிய மிதுக்கு வற்றல், சுண்டை வற்றலில் மோரே போடவில்லை அதையும் மோரில் போட்டு காய வைத்து எடுத்தேன்.  அவற்றையும்  ஈரம் போகும் வரை இப்படி வெயிலில் நகர்த்தி நகர்த்திக் காய வைத்து எடுத்துப் பின்னர் காய்ப்பையில் போட்டுக் கொடியில் போட்டுக் காய வைத்து எடுத்து விட்டேன்.

12 மணிக்குப் பக்கம் தான் கொடிகட்டி இருக்கும் இடத்திற்கு வெயில் வரும், அப்புறம் இரண்டு மணிக்கு எல்லாம் பால்கனிக்குள் வரும். வீட்டுக்குள் மூன்று மணி வரை இருக்கும், வெயில். 

மூன்றாவது படத்தில் வெண்டைக்காய் வற்றல் , சுண்டைக்காய்வற்றல்,  மிதுக்கு  வற்றல்  காய்கிறது.  கடைசி படத்தில் கொடியில் வாழைக்காய் வற்றல் காய்கிறது.

கொல்லேஜ்  முறையில்  எடுத்து விட்டேன் மேஜை மேல் வைத்து இந்த படத்தை.

எப்போடியோ காய வைத்து எடுத்து விட்டேன் வற்றலை இன்னும்  இரண்டு நாள் காய்ந்தால் நல்லது.

ஆந்திரா பெசரட்டு( நம்மூரில் பச்சைப்பயிறு தோசை)

எல்லோருக்கும் தெரிந்தது தான்.  ஒரு டம்ளர் பச்சைப் பயிறு, கால் டம்ளர்  பச்சரிசி,  வரமிளகாய்  அல்லது பச்சை மிளகாய் நான்கு, நான் இரண்டும் போட்டேன். (பச்சைமிளகாய் இரண்டு சிறியது, சின்ன வரமிளகாய் இரண்டு.)

கொஞ்சம் பெருங்காயத்தூள், கொஞ்சம் இஞ்சியோடு ரவை பக்குவத்தில்  அரைத்த மாவுடன் கொஞ்சம் தேங்காய்த்துருவல், வெங்காயம், கருவேப்பிலை -மற்றும் சோம்பு இஷ்டப்பட்டால் சேர்க்கலாம். இஷ்டமில்லையென்றால் வேண்டாம்.

வெங்காயத்தைத் தோசை மாவில் கலந்து செய்வேன் , (இது செய்த அன்று வெங்காயம் போடவில்லை.)  சிலர் மேலே தூவிச் செய்வார்கள்.

இதற்குத் தேங்காய்ச் சட்னியும் தக்காளி சட்டினியும் செய்வார்கள். 

இரண்டு தக்காளி, ஒரு  பெரியவெங்காயம் , 10 மிளகாய் வற்றல்  கொஞ்சம் பெருங்காயம், உப்பு  வதக்கி அரைத்த சட்னி  செய்தேன்.

சமையல் குறிப்புகள் வற்றல் போட்ட கதை எல்லாம் எப்படி இருக்கு என்று சொல்லுங்கள்.

                                         வாழ்க வையகம் ! வாழ்க வளமுடன்.

--------------------------------------------------------------------------------------------------------------------------