Buffalo Park Flagstaff

எருமையின்  வெண்கல சிற்பம்

ஜூலை 26 ஆம் தேதி வெள்ளிக்கிழமை மாலை அரிசோனாவிற்கு அருகில் இருக்கும்    ஃ பிளாக்ஸ்டாப்  என்ற இடத்தில் அமைந்துள்ள   "எருமை பூங்காவிற்கு" அழைத்து சென்றான் மகன்.  சான் பிரான்சிஸ்கோ சிகரம் என்று அழைக்கப்படும் மிக அழகான மலைச்சிகரம் பின் புலத்தில் தெரியும்  அழகான  பெரிய பூங்கா. அரிசோனாவிலிருந்து 120 மைல் தூரத்தில் உள்ளது . வேறு சில இடங்களும் பார்த்து விட்டு ஞாயிறு மாலை வீடு வந்து சேர்ந்தோம். இந்த பதிவில் பூங்கா இடம் பெறுகிறது.

ஃ பிளாக்ஸ்டாப் வரும் வழி யெல்லாம் மழை.



பூங்காவிற்கு அருகில் இருக்கும் ஒரு ஓட்டலில் கார் சார்ஜ் ஏற்ற போட்டோம்.

மழை நீர் பைன் மரத்து இலை வழியே  சொட்டுவது பார்க்க அழகாய்  இருந்தது.

பின்    அங்கு இருந்த  மரங்களுக்கு கீழே கற்களுக்கு நடுவில் பூத்து இருந்த காட்டு மலர்களை  ஊரின் அழகை பார்த்தும் அங்கு இருந்த மழையில் நனைந்த மலர்களை படம் எடுத்தோம்.

அடுத்து   நாங்கள் தங்க  அறை எடுத்து இருந்த ஒரு  ஓட்டல்  அறையில் பொருட்களை  வைத்து விட்டு பார்க் வந்தோம்.

அழகிய குதிரை சாரட் வாயில் முன் இருக்கிறது

பரந்து விரிந்து இருக்கும்   இந்த பூங்காவிற்கு மக்கள் உடற்பயிற்சி செய்ய,  மலைச்சிகரங்களில் மலையேற்றம் செய்ய  வருகிறார்கள்.

சைக்கிளில் வலம் வருகிறார்கள், நடக்க முடியாதவர்கள் சக்கர நாற்காலியை அவர்களே ஓட்டிக் கொண்டு வலம் வருகிறார்கள். குடும்பத்தோடு மாலை நேரம் வந்து  மகிழ்ச்சியாக பொழுது போக்கி செல்கிறார்கள்.

அங்குள்ள மக்களுக்கு குடும்பம் என்றால் அவர்கள் வளர்க்கும் வளர்ப்பு செல்லங்களும் அடக்கம் அவை இல்லாமல் வெளியில் வருவது இல்லை. இரவு 12  மணி வரை நேரம்  திறந்து இருக்கும் பூங்கா.

கொடிமரத்தில் நிறைய பூங்கா இருந்தாலும் இந்த ஜெமினி சாலையில் உள்ள  இந்த  "எருமை பூங்கா"  எல்லா காலங்களிலும்  இயற்கை ஆர்வலர்கள் விரும்பும் பூங்காவாம்.    

அழகிய முகப்பு தோற்றம்

பறவைகளின் சத்தம் மட்டும் கேட்டேன்  அவைகளை படம் எடுக்க முடியவில்லை. குருவிகள், தேன் சிட்டு போன்ற பறவைகள் இருந்தன.

பாதை ஓரங்களில் சூரிய காந்தி பூக்கள் பூத்து இருந்தது , மாலை நேரம் மழை  பெய்து ஓய்ந்து இருந்தது. நாங்கள் வரும் வழி எல்லாம் மழை பெய்தது, பூங்காவிற்கு போகும் போது மழை இல்லை.

நான்  பூங்காவில் கொஞ்ச தூரம் நடந்து விட்டு பின் இந்த கல் ஆசனத்தில்  உட்கார்ந்து கொண்டு  போகிற வருகிற மக்களை வேடிக்கைப்பார்த்தேன். மகனும், மருமகளும் நடைபயிற்சி செய்து வந்தார்கள். ஒரு மைல் தூரம் நடந்து வந்தார்கள்.

பூங்கா வெகு சுத்தமாக இருந்தது.

இந்த இடத்தில் எல்லோரும் அமர்ந்து போட்டோ எடுத்து கொண்டார்கள்.

பேரன் என்னுடன் இருந்தான்.

எப்படி போய் எப்படி வரலாம் என்பதற்கு வரை படம்.

நிறைய பாறைகள் இப்படி   இருந்தது

நடந்து விட்டு இளைப்பாற ஆசனங்கள் உண்டு

பேரன் அதன் அருகில்  அவன் விளையாட்டு சாமான்களை வைத்து வீடியோ செய்தான். நான் அந்த மர சோபாவில் அமர்ந்து பார்த்து கொண்டு இருந்தேன்.

 பேரன் செய்த மிக சிறிய காணொளி தான் பாருங்கள்.

ஓங்கி நிமிர்ந்து இருக்கும் பைன் மரங்கள் அழகு

இந்த மலையில் தான் மக்கள் மலையேற்றம் செய்கிறார்கள்.

கீழே உள்ள மூன்று படங்களும் மகன்  நடைபயிற்சி செய்த போது எடுத்து வந்த படங்கள்.

வானமும், வெண்மேகமும் மலையும் அழகு.  பாறைகளில்  மழை நீர் தேங்கி இருப்பததில் வானம் தெரிகிறது. குட்டி குட்டியாக   மஞ்சள் பூக்கள் பூத்து இருப்பதை பார்க்க அழகு.

இதை பார்க்க நான் வெகு தூரம் நடக்க வேண்டும். மகன் எடுத்து வந்து காட்டினான். 

22 மைல் நடக்கலாம் அவ்வளவு பெரிய பூங்கா. நல்ல தட்ப வெட்பம் இருப்பதால் அனைவரும் இங்கு நடக்க விரும்புகிறார்கள்.

அரிசோனாவின் மிக உயரமான சிகரமான ஹம்ப்ரேஸ் மலை இதிலும் மலையேற்றம் செய்கிறார்கள். இரவு நேரத்தில் நட்சத்திரங்களை புகைப்படம் எடுக்க  நிறைய பேர் இரவு நேரத்தில் வருவார்களாம். இரவு நேரத்தில் வன விலங்குகளையும் பார்க்கலாம் என்கிறார்கள். சூரிய உதயமும் பார்க்க அழகாய் இருக்குமாம்.

இந்த பூங்காவில் தங்கள் வளர்ப்பு செல்லங்களுடன் வந்தது பின்பு வரும்.

வாழ்க வையகம்! வாழ்க வையகம்! வாழ்க வளமுடன்!

----------------------------------------------------------------------------------------------------