உழவுக்கும் தொழிலுக்கும் வந்தனை செய்வோம்

எங்கள் குலதெய்வ கோவிலை சுற்றிலும் வயல்களும் ஏரியும் உள்ளது.

 மடவார் விளாகம், பாப்பாங்குளம் கிராமம் ஆலங்குளம் வட்டம், தென்காசி மாவட்டம். என்ற ஊரில் இருக்கும் அருள்மிகு ஸ்ரீ களக்கோட்டீஸ்வரர் தர்ம சாஸ்தா" எங்கள் குலதெய்வம்.

களங்கள் இருக்கும் கோடியில் இருக்கிறது. கதிர் அடிக்கும் பெரிய களம்  இருக்கிறது.  அதனால் தான் இங்குள்ள ஐயனாருக்கு களக்கோடிஸ்வரர் என்று பேர்.

அறுவடை சமயத்தில் ஒரு முறை போய் இருக்கிறோம்  பார்க்கவே அழகாய் இருக்கும். 

டிசம்பர் 4 ம் தேதி போய் இருந்தோம் , இப்போது நாற்று நடும் காலமாக இருந்தது.

இந்த பதிவில் நானும், மகனும் எடுத்த படங்கள் இடம்பெறுகிறது.

குலதெய்வ வழிபாடு இதற்கு முந்தின பதிவு படிக்கவில்லை என்றால் படிக்கலாம்.

அடுத்த பதிவில் வயலும், ஏரியும் இடம்பெறும். என்று சொல்லி இருந்தேன்.

உழவுக்கும் தொழிலுக்கும் வந்தனை செய்வோம்.

நாற்றுநடும்  காணொளி இருக்கிறது

                                       நாற்று நடுகிறார்கள்

நாற்று நட்ட வயல்

உழுது விட்ட வயலில் நாரைகள்

ஐயனார் குடி கொண்டுள்ள இடத்தில் விளைச்சல் எப்போதும் நன்றாக இருக்கும். இங்குள்ள மக்களை காத்து  கால்நடைகளை காப்பாற்றி வருகிறார் ஐயனார். ஏரியில் கால்நடைகள் பறவைகளும் மகிழ்ச்சியாக இருக்கிறது.

ஏரிக்கரையோரம்  என்ற பழைய படத்தில் மாடுகள் நீர் அருந்தி குளித்து கரையேறும் காட்சிகளை பதிவு செய்து இருக்கிறேன்.

ஆற்றில் தண்ணீர் போகிறது. ( மழை பெய்தால் காட்டாறு வரும்) அதில் துணிகளை துவைத்து குளிக்க  மக்கள் துணி மூட்டைகளை சுமந்து வருகிறார்கள், ஆடு, மாடுகளுக்கு நல்ல மேய்ச்சல், நீர் அருந்த இடம் இருப்பதால் அவைகளையும் ஓட்டி வருகிறார்கள்.

 

நாற்று நடுகிறார்கள் காலை நேரம் மணி 11 இருக்கும்

நடுவதற்கு இன்னும் காத்து இருக்கும் நாற்றுக்கள்

நட்ட நாற்றுக்கள் காற்றுக்கு தலைசாய்ந்து நிற்கிறது

உழவு நடக்கிறது , தூரத்தில் தெரிவது வன்னியப்பர் கோயில் (ஆழ்வார்குறிச்சி)

வரப்பில் நடந்து வருவது பார்க்க அழகு

ஏரியின் அழகு

கடல் போல காட்சி அளிக்கும் ஏரி மழை நன்றகாக பெய்து இருப்பதால் ஏரியில் நீர் நிறைய இருக்கிறது

ஏரியில்  அல்லி மொட்டுக்கள். ஏரியில் அல்லிகள் உள்ள படங்கள் மகன் எடுத்த படங்கள் ஏரிக்கரை மேல் ஏறி எடுத்து வந்த படங்கள்

அல்லி இலைகள் ஓரத்தில் அரும்பு அரும்பாக  பார்க்கவே அழகு! இலை மேல் நந்தைகள் இருக்கிறது பாருங்கள். 

 

சந்திரன் வரவு சமயம்தான் மலரும் அல்லி

அதிகாலை சந்திரனை கண்டு சிறிது மலர்ந்து இருக்கு போல! 

மழைத்தூறல் தெரிகிறதா? ஏரியின் நீர்பரப்பின் மேல் சிறு வட்டம் போட்டு இருக்கே தூறல்!

 

முக்குளிப்பான்

நீர் அலைகள்  பார்க்க அழகாய் இருக்கா? 

தை பொங்கல் உழவர்களுக்கு நன்றி சொல்லும் நாள், சூரியனுக்கு நன்றி சொல்லும் நாள், மற்றும் இயற்கை வழிபாடும்  இல்லையா? அதனால் இந்த பதிவு .

சுழன்றும் ஏர்ப்பின்னது உலகம் அதனால் 

உழந்தும் உழவே தலை"

உழவு தொழில் சிறப்பாக நடந்தால்தான் எல்லோரும் நலமாக இருக்க முடியும்.

 ஏர்முனைக்கு நேர் இங்கே எதுவுமே இல்லை என்ற பாடல்

https://www.youtube.com/watch?v=2QnnDK2E3g

விவசாயம் செய்ய முடியாமல் வேறு தொழில் நாடி செல்பவர்கள் அதிகமாகி வருகிறார்கள். இந்த மாதிரி சமயத்தில் விவசாயம் செய்து வருபவர்களை ஊக்கப்படுத்த வேண்டும். 

விவசாயம் காப்போம் என்ற கவிதை படித்தேன். கவிதை பெரிது சுட்டி வழி சென்று படிக்கலாம்.

அதில் சில இங்கு :-

//விவசாயம் நம் இதயம்
விவசாயிகள் நம் தெய்வம்..
சிற்பங்கள் அழிந்து விட்டால்
கோவிலுக்கு சிறப்பில்லை..
சிற்பிகளே அழிந்து விட்டால்
கோவிலுக்கு பிறப்பில்லை..
விவசாயம் அழிந்து விட்டால்
உண்ண கூட வழியில்லை..
விவசாயி அழிந்து விட்டால்
வருந்தி பின் பயனில்லை.

படித்தால் தான் வேலை,
கை நிறைய சம்பளம் என்று
சொல்லித்தரும் சமூகம்
விதைத்தால் தான் சோறு என்று
சொல்லித்தர மறந்து விட்டது..
அதனால் தான் விவசாயம்
அழிந்து கொண்டிருக்கிறது..
விவசாயம் காப்போம்.!

உழைக்கும் எண்ணமோ உயர்வு தரும்..
உழவன் எண்ணம்
நமக்கு உணவு தரும்..
விவசாயம் காப்போம்.!

பசியை நீக்கியவள் தாய் என்றால்..
என் விவசாயியும் தாயே
விவசாயத்தை காப்போம்,
எதிர்காலத்தை மீட்போம்.

விவசாயத்தை காப்போம்..
விவசாயிகளை மதிப்போம்.!//

கவிதை எழுதியவருக்கு நன்றி. 

விவாசயி குட்டிக் கவிதை  என்ற கவிதை படித்தேன் அதில் பிடித்த வரிகள் மட்டும் இங்கே:-

விளையாட்டு சாதனைக்கு 

கோடிக்கணக்கில் பரிசு

விவசாய சாதனைக்கு என்னையா இருக்கு

கைக்கு எட்டியது வாய்க்கு எட்டவில்லை!

இந்தியாவின் முதுகெலும்பு

கூன் விழுந்து போய்விட்டது,

ஆமாம், விவசாய நிலங்களில்

இன்று கட்டிடங்கள் அல்லவோ

விளைந்து கிடக்கு!

எருவும், நீரும், சேறும், விதையும்

கலந்த இடத்தில்

இன்று கம்பியும் , கலவையும் , கான்கிருட்டும்

அல்லவா கலந்து கிடக்கு!//

கவிதை எழுதியவருக்கு நன்றி.

இந்த ஆண்டு விவசாயம் செழிக்க வேண்டும். நீர்வளம், நிலவளம் செழிக்க வேண்டும். விவசாயி நிலை உயரவேண்டும்.

ஏரி,குளம், கிணறு, ஆறு

எல்லாம் நிரம்பி வழிய,

மாரி அளவாய் பொழிக,

மக்கள் வளமாய் வாழ்க!"

அனைவருக்கும் போகிப் பண்டிகை, பொங்கல் பண்டிகை வாழ்த்துகள் ! 

மாட்டுபொங்கல் , மற்றும் திருவள்ளுவர் தின வாழ்த்துகள்!

வாழ்க வையகம் ! வாழ்க வையகம்! வாழ்க வளமுடன்!

-------------------------------------------------------------------------------------------

=========================================================