சிறுவீட்டுப்பொங்கல்!

அரிசோனாவில் மகன் வீட்டில் பொங்கல் 

  

போன வருடம் மதுரையில் எங்கள் வீட்டில் மகன் குடும்பத்துடன்  கொண்டாடினோம்.  இந்த முறை மகன் வீட்டில் நானும், மருமகளின் அம்மாவும் கலந்து கொண்டோம்.  தை பொங்கல்  இறைவன் அருளால்  சிறப்பாக நடந்தது. பேரனின் சிறு வீட்டுப் பொங்கலும் சிறப்பாக நடந்தது.  அந்த படங்கள் இந்த பதிவில் இடம்பெறுகிறது.

 பொங்கல் ஏற்பாடுகள் நடக்கிறது.

புது செங்கல்கள் வாங்கி வந்து அடுப்பு கூட்டி அதற்கு  வெள்ளை பட்டை அடித்து தயார் செய்கிறான் மகன். முன்பு ஒரு பொங்கலுக்கு மண் அடுப்பும் அவனே செய்து இருந்தான்.மணி, சூரியன், பிள்ளையார் எல்லாம் களிமண்ணில் செய்து இருந்தான். முன்பு போட்ட பதிவில் போட்டு இருப்பேன்.

 மருமகள் பொங்கல் பானைகளுக்கு திருநீறு பட்டை போட்டு குங்குமம் வைக்கிறாள்.

பொங்கலுக்கு முதல் இரவு ஆரம்பித்த மழை காலை 10 மணிக்கு தான் விட்டது. மழை விட்டவுடன் பொங்கல்  ஆரம்பித்தோம். நல்ல குளிர். காற்றும் இருந்தது. இறைவன் அருளால் மழை இல்லை. சூரியனும் மேகம் மறைத்தாலும் மெலிதாக பால் பொங்கும் போது எட்டிப்பார்த்தார்.

முதல்நாள்  பண்ணைக்கு போய்  கரும்புகள் வாங்கி வந்தான். ஆலை கரும்புதான் கிடைக்கும்.  பண்ணை வைத்து இருப்பவரை பற்றி தனி பதிவு போட வேண்டும்.

ஊரில் பொங்கலுக்கு  10  நாட்கள் முன்பே வீட்டை சுத்தம் செய்து  வெள்ளை அடிப்பது, வீடு முழுவதும் கோலம் போடுவது, மற்றும்  பொங்கல் வைக்க கட்டி அடுப்பு தயார் செய்வது என்று  இருக்கும். படியில் செம்மண் மற்றும் வெள்ளைபட்டை அடித்தல் என்று நிறைய வேலைகள் இருக்கும்.

 களிமண் விற்பவர்கள் வந்து வீட்டுக்கு வீடு போட்டு காசு வாங்கி செல்வார்கள். அதை  அம்மா ஒரு குத்து போனி சட்டியில் மண்ணை குழைத்து அடைத்து தட்டுவார்கள்.  ஒரு அடுப்புக்கு மூன்று கட்டி தேவை படும். இப்படி 6, 9 என்று தேவையானதை  செய்து காய வைத்து செம்மண்  அடித்து அது காய்ந்தவுடன் வெள்ளை சுண்ணாம்பு பட்டை அடித்து அல்லது கோலம் போல போட்டு எடுத்து வைப்பார்கள். மாமியாரும் கட்டி அடுப்பு செய்வார்கள்.

மாமியார் வீட்டு பொங்கல் படம் தேட வேண்டும், இந்த படம்  கூகுள் உதவி .

இப்படித்தான் கட்டி அடுப்பு இருக்கும். பனை ஓலையில் பொங்கல்  வைப்போம் இப்படித்தான். ஆனால் வெண்கல பானையில் பொங்கல் வைப்போம். மண் பானையில் வைத்தது இல்லை. மகன் அவனே மண்பானை செய்வதை கற்றுக் கொண்டு மண் பானை செய்து இருக்கிறான். முன்பு ஒரு பதிவில்  போட்டு இருந்தேன்.

சர்க்கரை பொங்கல் அதில் தான் செய்ய வேண்டும் என்றதால் மண்பானையில் சர்க்கரை பொங்கல், வெண்கல பானையில் வெண்பொங்கல் வைத்தோம்.

நன்றி-  தினகரன்

இப்போது பொங்கல் சமயம் கட்டி அடுப்பு சிமெண்டில்  தூத்துகுடி, திருநெல்வேலி பக்கம்  தயார் செய்து விற்கிறார்கள்.  வீட்டில் முன்பு செய்த மாதிரி கஷ்டப்பட்டு செய்ய வேண்டாம். செம்மண், வெள்ளை பட்டை அடித்தால் போதும்.

பொங்கலுக்கு பனை ஓலை கொண்டு வந்து போட்டு காசு வாங்கி செல்வார்கள் ஊரில். இங்கு   குளிருக்கு நெருப்பு போட விற்க படும் விறகு கட்டைகள் வாங்கி வந்தான். எளிதில் பற்றி கொள்ள சிறு சுள்ளிகள் விற்கிறார்கள் அதை முதலில் வைத்து சூடனை வைத்து பற்ற வைத்தாள் மருமகள்.

பால் கிழக்கு பார்த்து பொங்கியது

மாயவரம் சென்று வந்த போது மயூர நாதர் கோயில் போனோம் அங்கு மகன் மயூரநாதர், அபயாம்பிகை படம் வாங்கி வந்தான்  பூஜையில் அந்த படமும் இடம்பெறுகிறது. சாணிப்பிள்ளையார் பிடித்து வைப்பதற்கு பதில் மகன் செய்த பிள்ளையார் இடம்பெறுகிறார். தோட்டத்தில் அருகம்புல் கிடைத்தது பிள்ளையாருக்கு.

அடுத்து வருவது கவின் வைத்த சிறுவீட்டுப்பொங்கல்

போகி பண்டிகை, பொங்கல் பண்டிகை, அடுத்து மாட்டு பொங்கல், அதற்கு அடுத்து காணும் பொங்கல் அன்று  சிறுவீட்டு பொங்கல் செய்வோம். 

இப்போது எல்லாம் ஒரே நாளில் செய்து விடுகிறோம். பெண் குழந்தை இருக்கும் வீட்டில் மார்கழி மாதம் கோலத்தில்  சாணி பிள்ளையார் பிடித்து வைத்து பறங்கி பூ வைப்பார்கள் ஒற்றை படையில். அதை காலை 11 மணிக்கு தட்டி காய வைத்து விடுவார்கள்.  

 சிறு வீடு வரைந்து வைப்பார்கள்,  அல்லது களிமண்னால் கட்டி வைப்பார்கள். என் அம்மா களி மண்ணால்  சிறு வீடு கட்டி,  களிமண் பாத்திரங்கள் செய்து தருவார்கள் வீட்டில் வைக்க. பொங்கல் முடிந்ததும் அதை வைத்து விளையாடி இருக்கிறோம். 

கடைசி நாள் வைக்கும் சாணி பிள்ளையார்களையும் அதற்கு படைக்கபடும் சர்க்கரை பொங்கல், வெண்பொங்கல், வாழைப்பழம், தேங்காய், வெல்லம் இவற்றை ஆற்றுக்கு கொண்டு போய் பூஜை செய்து ஆற்று நீரில்  கரைப்பார்கள் குழந்தைகள்.

முன்பு தட்டி காய வைத்த பிள்ளையார்களையும் ஆற்றில் கரைப்பார்கள்.

பேரனுக்கு சிறு வயதில் வீடு வைத்து செப்பு சாமான் வைத்து விளையாட பிடிக்கும் . அதனால்  பொங்கல் சமயம் சிறு வீட்டு பொங்கல் வைக்க ஆரம்பித்தோம்.  வீடு அழகாய் வரைந்து தருவாள் மருமகள் , அதில் அவன் விளையாட்டு பொருட்களை வைத்து  நான் கொடுத்த சிறு வெங்கல  பானையில் பால் காய்ச்சுவான். ஒவ்வொரு ஆண்டும்.

சிறு வீட்டில் காய்கறி, பாத்திரங்களை வைக்கிறான், குளிர் அதிகம்   வெறுங்காலை கீழே வைக்க முடியாது அதனால் செருப்பு அணிந்து இருக்கிறான்.

பால் பொங்குது !

பாலை வைத்து அவன் வீட்டில் பூஜை செய்கிறான்

பூஜை சமயம் செருப்பு இல்லாமல் செய்கிறான்.

முன் வாசலில் இங்கு பொங்கல் வைக்க முடியாது அதனால் தோட்டத்தில் பொங்கல் வைத்து விட்டோம்.

நான் திருவெண்காட்டில் இருக்கும் போதுமட்டும் தான் இப்படி அடுப்பில்  பாரம்பரிய  பொங்கல் வைத்தேன். அப்புறம் எல்லாம் மாடி வீடு, அதனால் வீட்டில் கேஸ் அடுப்பில்தான்.

மகன் வீட்டில் எப்போதும்  பழைய முறைப்படித்தான் பொங்கல்.

மருமகள் செய்த அவியல், காய்கள் எல்லாம் போட்டு சாம்பார், தேங்காய் துவையல் , தயிர்பச்சடி, அப்பளத்துடன் இலை போட்டு  சாப்பிட்டு மகிழ்ந்தோம்.   (நுனி இலை கிடைக்காது.  ஏடுதான் கிடைக்கும்.)

எல்லா நலன்களையும் சூரிய பகவான் அருள வேண்டும்.

வாழ்க வையகம்! வாழ்க வையகம்! வாழ்க வளமுடன் !

------------------------------------------------------------------------------------------------