குலதெய்வ வழிபாடு

குலதெய்வம் கோயில் 

குலதெய்வம் கோயில் மடவார் விளாகம் என்ற ஊரில் அமைந்துள்ளது.  மடவார்விளாகம் , பாப்பன்குளம் கிராமம், ஆலங்குளம் வட்டம், தென்காசி மாவட்டத்தில் உள்ளது. எங்கள் குலதெயவம் பேர் "களக்கோட்டீஸ்வரர் தர்ம சாஸ்தா" 

போன மாதம் குலதெய்வம் கோயில் போய் இருந்தோம். கும்பாபிஷேகம் செய்யப்பட்டு புது பொலிவுடன் இருந்தது கோயில் . 

அங்குள்ள அனைத்து சுவாமிகளுக்கும்  அபிஷேகம் செய்து , புது வஸ்திரம் சாற்றி  பொங்கல் வைத்து வணங்கி வந்தோம். இந்த பதிவில் குலதெய்வ படங்கள் இடம்பெறுகிறது.

களக்கோடிஸ்வரர் சாஸ்தா பூரணகலா, புஷ்கலாவுடன்

கருவறைக்குள் போய் எடுத்தால் தான் மூவரும் தெரிவார்கள் இந்த படம் மட்டும் குருக்கள் எடுத்து தந்தார்.

ஏரிக்கரை மீது ஏறிபோய்தான் ஐயனார் விமானம் படம் எடுக்க முடியும். மழை நேரம் ஏரிக்கரை வழுக்கும் என்பதால் மகன் "நீங்கள் ஏற வேண்டாம் நான் எடுத்து வருகிறேன்" என்று மகன்  எடுத்து வந்த படம்.

அகோரவீரபத்திரர்

அவர் காலடியில் அடைக்கலக்குருவி கூடு கட்டி இருக்கிறது

மழையில்  குச்சிகள் ஈரமாக இருப்பதால்  தண்ணீர் கொதிக்கவே நேரம் ஆச்சு, குருக்கள் அட்டைபெட்டிகள் கொடுத்து உதவினார்.

அரிசி நல்ல வெந்த சமயத்தில்  அடுப்பு நன்றாக எரிய ஆரம்பித்து விட்டது, அப்போது அவ்வளவு நெருப்பு தேவையில்லையே! வெளியே எடுத்து விட்டோம். வெங்கலபானையின் சூட்டில் நன்கு வெந்து விடும். குருக்கள் உள் அடுப்பில் சர்க்கரை பொங்கல் தயார் செய்து விட்டார்.

                                                      மாடசாமி

                                                    சப்தகன்னியர்

                         ஐயனார் விமானம் ஒவ்வொரு பக்கமும்

புதிதாக கொட்டகை போட்டு இருக்கிறார்கள். இன்னும் வேலைகள் நடக்கிறது.

                                    பேச்சியம்மன், பிரம்மராட்ஷசி

ஐய்யனார் எதிரில் யானை இருப்பார்

முன்பு உள்ள கருவறை நாம் பக்கத்தில் பார்க்கலாம்.

 

குருக்கள் தீபாராதனை காட்டுகிறார்.

முன்பு  ஐயனார் பக்கத்தில் இருந்தார் பார்க்க வசதியாக இப்போது அவர் கருவறையை உயர்த்தி கட்டி நாம் கீழே இருந்து பார்க்கும் போது அவர் தூரத்திற்கு போய் விட்டார்.

குலதெய்வத்தை வணங்கி, பிரசாதங்களை  வந்தவர்களுக்கும் வழங்கி நாங்களும் உண்டு வந்தோம்.

குலதெய்வ கோயிலுக்கு போகும் வழியில் இப்படி ஆறு ஓடும்.

மழை காலத்தில் மட்டும் நீர் இருக்கும் வெயில் காலத்தில் நீர் இல்லாமல்  இருக்கும். எனக்கு முட்டி வரை தண்ணீர் இருந்தது. குளித்து கொண்டு இருந்தவர்கள் ஆழம் இல்லா இடம் பார்த்து சொன்னார்கள் அதில் மெதுவாக ஓர்ப்படியின் கையை பிடித்து கொண்டு  நடந்து வந்தேன் .

தண்ணீரை தாண்டி வந்தால் மண் பாதையில் போக வேண்டும். மழை பெய்தால் மண்தரை வழுக்கும். கவனமாக நடக்க வேண்டும்.

குலதெய்வ கோயில் மரங்களுக்கு இடையில் தூரத்தில் தெரியும் போதே நமக்கு மனதில் உற்சாகம் வந்துவிடும்.

குலதெய்வ வழிபாட்டுக்கு இயற்கையும் ஒத்துழைத்தது. கோயிலை விட்டு வந்தபின்தான் மழை பெய்தது. மழை பெய்து இருந்தால் பொங்கல் வைத்து இருக்க முடியாது.பொங்கல் வைத்து உள்ளே எடுத்து வைத்தபின் கொஞ்சம் தூறல் போட்டது. மதுரையிலிருந்து இன்னொரு குடும்பம் நனைந்து வந்தார்கள்.  அதிகமழை பெய்தால் ஆற்றில் தண்ணீர் வரத்தும் அதிகமாகி விடும் அங்கிருந்து வருவதும் கடினம். சாஸ்தா நல்லபடியாக காத்தார். 

//பணிக்கோடி இரைக்கோடி பரிதவிக்கும் இவ்வுலகில்
துணைதேடி ஓடிவந்தோம் ஸ்வாமியே...

உனைத்தேடி உனைத்தேடி இவ்வுயிரும் தவிக்கையிலே
எனைத்தேடி எழுந்துவந்த ஸ்வாமியே!..

களக்கோடி நாயகனே.. கவலையெல்லாம் தீர்ப்பவனே..
புகழ்க்கோடி பேர் சொல்லிப் போற்றினேன்...

வளங்கோடி தந்தருளி நலங்கோடி காத்தருள
பூக்கோடி தூவி தீபம் ஏற்றினேன்!...

நீரோடி நிலம் செழிக்க காற்றோடி கதிர் கொழிக்க
நாகோடி தமிழ் உரைக்க வேணுமே...

உனைத்தேடி வருவோர்க்கு தருங்கோடி நலமெல்லாம்
ஊர்கோடி கண்டு உணர வேணுமே..

வரங்கோடி தந்தருளும் வடிவுடையாள் திருமகனே
களக்கோடி கண்மணியே சரணமே!...

மனைதேடி வருபவனே.. மனந்தேடி அமர்பவனே..
களக்கோடி காவலனே சரணமே...//

பாடல் -   துரைசெல்வராஜூ அவர்கள்.

பாடலை எழுதி அனுப்பினார்கள் . 

2019 ம் ஆண்டு  குலதெய்வமே உன்னை கொண்டாடினேன்  என்ற இந்த பதிவுக்கு சகோ  அனுப்பிய பாடல். இன்னொரு பாதி அடுத்த பதிவில் அனுப்பினார்கள். எங்கள் குடும்பத்தினர் அனைவரும் இந்த முதல் பாதி மட்டுமே போதும் என்று  சொல்லி விட்டார்கள்,  படித்து வருகிறார்கள்.

எங்கள் குலதெய்வ கோயில்  வயல்கள், ஏரி என்று இரண்டுக்கும் நடுவில் அழகாய் அமைந்து இருக்கும்.   நாங்கள் போன போது ஒரு பக்கம் உழுது கொண்டு இருந்தார்கள் ஒரு பக்கம் நாற்று நட்டுக் கொண்டு இருந்தார்கள். ஏரியில் அல்லி மலர்கள் அழகாய் இருந்தது. கொக்கும், முக்குளிப்பானும் வயல்வெளியில்,  ஏரியில்  இருந்தது. அடுத்த பதிவில் வயலும், ஏரியும் இடம்பெறும்.

27. 01. 2023  தை 13. தேதி  வெள்ளிக்கிழமை காலை09.30 மணிக்கு  மேல் 10.15 மணிக்கு வருஷாபிஷேகம் விழா நடைபெறபோகிறது.

வாழ்க வையகம்! வாழ்க வையகம்! வாழ்க வளமுடன்!

========================================================