மேகமலை -5

மேகமலை 

மேகமலை

மேகமலை -2 

மேகமலை- 3

மேகமலை- 4

மேகமலையை பிப்ரவரி 13ம் தேதி குடும்பத்துடன் சென்று வந்தோம். தொடர் பதிவு.

மேகமலையில் நாம் பார்த்து ரசிக்க நிறைய இடம்  இருக்கிறது. மூன்று நாட்கள் தங்கி இருந்து பார்க்கலாம். நாங்கள் சனிக்கிழமையும், ஞாயிற்று கிழமையும் பார்த்தோம். தேயிலை தோட்டம், மலைமேல் போய் இயற்கை அழகை ரசித்தோம்.

பசுமை மாறா காடுகள், தேயிலை, காப்பி, ஏலக்காய் பண்ணைகள் பார்க்க அழகு. யானை, புலி,  மான்கள் பார்க்கலாம் என்றார்கள், நாங்கள் ஏரிக்கரையோரம் மாடுகள், பறவைகள்   தான் பார்த்தோம். 

மாடுகள் அருகே பறவைகள் நிற்கிறது.

 கடல் மட்டத்திலிருந்து 1500 மீட்டர்  உயரத்தில் இருக்கிறது மேகமலை . மேகம் அடிக்கடிவந்து மலையை மறைப்பதால் மேகமலை. சட்டென்று  வெண்மேகம் மறைக்கிறது, சட்டென்று மலை தெரிகிறது. மாயாஜாலம் போல. நாலைந்து மலைசிகரங்களுக்கு நடுவே உள்ளது இந்த பள்ளத்தாக்கு. இங்கு  மிதமான குளிர் எப்போதும் இருப்பதால் கோடை காலத்துக்கு ஏற்ற சுற்றுலா தலம். குற்றால சாரல் போல சாரல் மழை பெய்கிறது.

யானைகள் சுற்றித் திரியும் என்றார்கள். யானையின் கழிவுகள்(சாணம்) தான் நிறைய இடங்களில் கிடந்தது. யானைகள் குடும்பமாக சில நேரம் வருமாம்.

 முள்ளம்பன்றியின் முற்கள் கீழே  நிறைய இடங்களில் விழுந்து கிடந்தது.  முள்ளம் பன்றியின் முற்கள் கீழே விழுந்து கிடப்பதை படம் எடுத்தேன், தேடினால் கிடைக்கவில்லை.

யானைகள் பனி மூட்டம் இருக்கும் போது எதிரில் போனால் கூட  தெரியாது என்றார்கள். தூரத்தில் ஏதோ அசைவது தெரிந்தது. "அரண்டவன் கண்ணுக்கு இருண்டது எல்லாம் பேய்" என்பது போல   பனி மூட்டத்தில் கருப்பாக தெரிந்தது,  யானை என்று எல்லோரும் கொஞ்சம் பின்னால் நகர்ந்து போகப்பார்த்தோம், ஒருவர் நீண்ட மழை கோட் அணிந்து  குடை பிடித்துக் கொண்டு வந்தார்.

அப்புறம் நிம்மதி பெருமூச்சு விட்டு  ஒரே சிரிப்புதான்.

அவரிடம் சொன்னோம் ,யானை என்று பயந்து விட்டோம் என்று .

அவரும் சிரித்து விட்டு இப்போ கொஞ்ச நேரம் முன்புதான் யானை போனது என்றார்.

இந்த இடத்திற்கு நீர் அருந்த வரும் என்றார்

அப்புறம் தேயிலை தோட்டத்தில் அசைவு தெரிந்தது பார்த்தால் காட்டு பன்றிகள் மூன்று ஓடியது.

புதர் நடுவில் ஒளிந்து கொண்டன. ஒரு பன்றியின் முதுகு மட்டும்  கொஞ்சம் தெரிகிறது. உங்களுக்கு தெரியுதா?

மலை மேல் ஏறும் போது எடுத்த படங்கள்

 மேலே இருந்து கீழே  தெரியும் தேயிலை தோட்டம்

ஏரியில் மீன் பிடித்து கொண்டு இருக்கிறார் பனி மூட்டத்தில் தெளிவாக தெரியவில்லை

மலைக்கு போகும் பாதை  கொஞ்ச தூரம் இப்படி , அப்புறம் மண் தரை.

    அரிய வகை மரங்கள் என்றார் 

யானை உரிக்குமாம் பட்டைகளை அதற்கு உடல் நிலை சரியில்லை என்றால் மரப்பட்டைகளை உரித்து  கடித்து துப்பும் போல. அல்லது குழந்தைகள் போல உரித்து விளையாடுமோ தெரியவில்லை. நின்று பார்த்துக் கொண்டு இருந்தோம் "வெகு நேரம் நிற்க கூடாது பார்த்து விட்டு உடனே கீழே இறங்கி விட வேண்டும்" என்று அழைத்து வந்தார்.

நம் மக்கள் அதில் தங்கள் பெயர்களை எழுதி வைத்து இருக்கிறார்கள்.

புல் புல் பறவை (Red- whiskered bulbul) மலை மேல் இருந்த மரங்களில் பார்த்த பறவைகள்

 

கரு நீலமும், வெளிர் நீலமும் உள்ள பறவை   தெரிகிறதா மரக்கிளையின் நடுவில்? 

Purple sunbird  என்று கூகுள் சொல்கிறது. சரியா என்று பறவையை  பற்றிய தகவல் நன்கு  தெரிந்தவர்கள் சொல்வார்கள். 

கீதா ரங்கன் கூகுளில் தேடி அனுப்பி விட்டார்கள்  அவர்களுக்கு நன்றி. ஆசிய தேவதையாம் இதன் பேர். தேவதை போல சட்டென்று மௌகம் காட்டி மறைந்து கொண்டார்.

 நிறைய பறவைகள் சத்தம் கேட்டது ஆனால் கண்ணுக்கு கிடைக்கவில்லை.

கொண்டைலாத்தி பறவை

தங்கி இருந்த இடத்தில் மலைக்கு போகும் போது வழித்துணையாக இவரை அனுப்பி வைத்தார்கள். இவர் தேயிலை செடிகளை தொடாமல் கொஞ்சம் நகர்ந்து  வரச் சொன்னார் மருந்து அடித்து இருக்கிறது, அப்புறம் நாம் அதை பிடிமானமாக பற்ற கூடாது என்றார். 

மலை மேல் எந்த இடத்தில் நிற்கலாம்  தூரத்தில் தெரியும் இடம் என்ன என்பது பற்றி எல்லாம் வழிகாட்டி சொன்னார்.

நான் சின்ன வயதில் ஐயப்ப மலைக்கு நடந்தே அந்த வழியாக போவேன். தூரத்தில் வெள்ளையாக தெரிகிறதா? அது கண்ணகி  அம்மன் கோவில் என்று எல்லாம் சொன்னார். நமக்கு ஒரே மேக மூட்டமாக தெரிந்தது அவர் சொல்வதற்கு எல்லாம் தலையாட்டினோம்.

மலை சரிவாக இருப்பதால் நடக்கும் போது கவனமாக நடந்து வர சொன்னார். "தண்ணீர் பாட்டில் கொண்டு வந்து இருந்தால் அதை எல்லாம் கையோடு எடுத்து வந்துவிட வேண்டும் காலி பாட்டிலை அங்கு போடக் கூடாது" என்றார். நாங்கள் எங்கு சுற்றுலா சென்றாலும் குப்பைகளை போட மாட்டோம்.  குப்பை போடு இடத்தில் போடுவோம் குப்பை போட பை எடுத்து போவோம் என்றோம் மகிழ்ந்து பாராட்டினார்.

ஹெல்மெட்டை கவிழ்த்தார் போல மலை

தங்கும் விடுதியில் கேரம் போர்ட்,  இருந்தது, பல்லாங்க்குழி கொண்டு போய் இருந்தோம். எல்லோரும் விளையாடி மகிழ்ந்தோம்.

தங்கும் இடத்தில்  இட்லி, சப்பாத்தி, கேசரி, வெண்பொங்கல் , சாம்பார், ரசம் கூட்டு, பொரியல் என்று முதல் நாள் மதியம், இரவு, மறு நாள் காலை வரை நன்கு சமைத்து தந்தார்கள். வயிற்றை கெடுக்கவில்லை உணவுகள்.

  இயற்கையை ரசித்து மகிழ்ந்தோம்.  மேகமலை தொடர் பதிவை தொடர்ந்து படித்தவர்களுக்கு நன்றி.

வாழ்க வையகம்!  வாழ்க வையகம் ! வாழ்க வளமுடன்.

-----------------------------------------------------------------------------------------