சொல்லுங்கள் பார்ப்போம்- பதிவு இரண்டு

நேற்று சொல்லுங்கள் பார்ப்போம் என்று  ஒரு பதிவு போட்டுக் கேட்டு இருந்தேன் ஒரு கேள்வி . இன்று சொல்வதாய்ச் சொல்லி இருந்தேன். அதன் விடை  - அஞ்சறைப் பெட்டி.

வாழ்க்கைக்குத் தேவையான பெட்டி முன்பு  என்றேன்  ஏன் என்றால் இப்போது யாரும் இந்தப் பெட்டியில் வைத்துக் கொள்வது இல்லையே! அதுதான்.

இது என்ன பெட்டி என்று தெரிந்தவர் சொல்லுங்கள்.

விடை நாளை  என்று சொல்லி யிருந்தேன்

அஞ்சறைப் பெட்டிதான் விடை

ஐந்து அறைகள் இருக்கிறது 

என் மாமியார் வீட்டு அஞ்சறைப் பெட்டி இது.   அஞ்சு பிரிவு உள்ளதற்கு மூடி உண்டு. 

ஆரம்ப காலத்தில் அதில் மிளகு , சீரகம், மல்லி, கடுகு, உளுத்தம்பருப்பு இருந்தது . அந்த பக்கத்தில் மூன்று பெட்டிகள் உண்டு. 10 கிலோ வரை சாமான்கள் கொட்டி வைத்துக்கொள்ளலாம். அதில் துவரம் பருப்பு, கடலைப்பருப்பு, மிளகாய்   போன்றவைகள் இருக்கும்.

அந்தப் பெட்டிகளை வேறு உபயோகப் பொருட்களாக மாற்றி விட்டார்கள்.

அந்தக் காலத்தில் புதிதாக திருமணம் ஆகிப் போகும் பெண்வீட்டில் "அஞ்சும் மூன்றும் அடுக்கா இருந்தால் அறியாப்பெண்ணும் சமைப்பாள்" என்பார்கள்.

இந்த அஞ்சறைப் பெட்டியைத்தான் சொல்லி இருக்கிறார்கள். 

 அவள் உக்கிராண அறைக்குப் போய்விட்டால் அஞ்சறைப் பெட்டியில் சமைக்கும் பொருட்கள்  மற்றும் சமையல் சாமான்கள், எண்ணெய் ஜாடிகள் , ஊறுகாய் வகைகள் நெய், என்று எல்லாம் ஒரே இடத்தில் இருக்கும். அவள் கணவன் வீட்டாரிடம் அது எங்கே, இது எங்கே என்று கேட்க வேண்டாம் என்று அப்படிச் சொல்லி இருக்கிறார்கள்.

முன்பு தொலைக்காட்சியில் விளம்பரம் வரும்- அழகான நகைப்பெட்டி போல் பாட்டி பேத்திக்குச் சீர் கொடுப்பார்கள், அதைப் பேத்தி திறந்து பார்ப்பாள் அதில் பல அறைகள்- அதில்  பொடி வகைகள் இருக்கும். ஏதோ சாம்பார்ப் பொடி விளம்பரம். முதலில் கணவர், கணவர் குடும்பத்தினரிடம் நல்ல பேர் வாங்க வேண்டும் என்று சொல்வார்கள் பாட்டி. விளம்பரம் பார்த்தவர்கள் சொல்லுங்கள் பாட்டியா, அம்மாவா கொடுப்பார்கள் என்று மறந்து விட்டது. பல வருடங்களுக்கு முன் வந்த விளம்பரம்.

                                    

                          என் கணவர்  வரைந்து தந்த கணினி ஓவியம்.

 பழங்காலத்து ஆச்சி படம். என் அம்மாவின் அம்மா காது வளர்த்து பாம்படம் போட்டு இருப்பார்கள். என் அப்பா ஆச்சி  காது வளர்க்கவில்லை.

இந்த அஞ்சறைப் பெட்டி பல தலைமுறை தாண்டி அத்தையிடம் வந்து இருக்கிறது. மூன்று பெரிய பெட்டிகளை அத்தை வெளியில் எடுத்து வைத்து விட்டு அதில் பழைய பாத்திரங்கள்  வைத்து இருந்தார்கள் ஒரு காலத்தில், அப்புறம் பழைய போட்டோக்கள் இருந்தன.  அதன் மேல்  துணியைப் போட்டு மூடி. பெட்டி என்பது தெரியாமல்  செய்து அதில் தொலைக்காட்சிப் பெட்டி வைத்து இருந்தார்கள் அத்தை.

அத்தையின் இறப்புக்குப் பின் அடுக்களை மூலைக்கு வந்து இருக்கிறது. அதை இந்தக் காலத்துப் பேரன் பேத்திகளுக்குத் திறந்து காட்டப்பட்டது. ஒரு பேத்தி மட்டும்  என் கணவரின் அண்ணன் மருமகள் ஆசைப்பட்டு," நான் எடுத்துக் கொள்கிறேன்" என்றாள்.  "அதை என்ன செய்வாய்?" என்று எல்லோரும் கேலி செய்துகொண்டு இருந்தார்கள்.

 முன்பு கூட்டுக் குடும்பமாய் இருந்த பெரிய குடும்பங்களில்   அஞ்சறைப் பெட்டி இருக்கும். என் தாத்தா வீட்டிலும் இதைவிடப் பெரிய  அஞ்சறைப் பெட்டி உண்டு.  அப்போது உள்ளவர்கள் வீட்டில் குழந்தைகள் 10 பேர் 12 பேர் என்று இருப்பார்கள். ஆட்கள் அதிகம் சாமான்கள் சேகரிப்பும் அதிகம். "அறைவீடு" என்று இருக்கும், அதை உக்கிராண அறை . ஸ்டோர் ரூம் என்பார்கள்.  அதில் உணவுப் பொருட்கள் இருக்கும் . சிலர் வீட்டில் அதற்கு பூட்டுப் போட்டுப் பூட்டி இருப்பார்கள். தவசிப்பிள்ளை சமைக்க வந்தால் எடுத்துக் கொடுப்பார்கள் அப்புறம் மூடிப் பூட்டி வைத்துக் கொள்வார்கள். பாளையம்கோட்டையில் என் அப்பாவின் வீட்டில் அப்படி இருந்தது.  சித்தப்பா, பெரியப்பா, அத்தைகள் என்று பெரிய கூட்டம் இருக்கும், தாத்தா வீட்டில். ஆச்சி சமைத்துப் பார்த்ததே இல்லை நான். எல்லோரும் வளர்ந்து அரசாங்க உத்தியோகம். யாரும் ஆச்சியுடன் (பாட்டியுடன் )இல்லை, தனித் தனியாக வேறு வேறு ஊரில்.  அத்தைகளும் திருமணம் ஆகிப் போனவுடன் அஞ்சறைப் பெட்டி எல்லாம் பயனில்லாமல் போய் விட்டது.

காலம் மாற மாற சின்னச்சின்னதாய் அஞ்சறைப்பெட்டிகள், பித்தளை, அனுமினியம், எவர்சில்வர்,  வெளிநாட்டில் இருந்து இறக்குமதி செய்யப்பட்ட மசாலா ஜாடிகள் என்று கண்ணாடிபாட்டில்கள். வந்து விட்டது.   ஆனால் அந்த கால அஞ்சறைப் பெட்டி என்றால் ஐந்து  அல்லது ஏழு  இருக்கும். கண்ணாடி ஜாடியில் நிறைய இருக்கிறது. மசாலாச் சாமான்களும் இடம் பிடிக்கிறது.

மருமகள் வாங்கித் தந்ததும், அம்மா வாங்கித் தந்ததும்

இவைகள் எல்லாம் இருந்தாலும் எனக்கு எடுக்க வசதி என்று சின்ன பாட்டில்களில் வைத்து இருக்கிறேன் கடுகு, மிளகு , சீரகத்தை.

என் அடுக்களைக்கு யார் வந்தாலும் சமைக்கக் கஷ்டப்படவேண்டாம் பொருட்களைத் தேடி. 

 முன்பு அம்மா கொடுத்த அஞ்சறை டப்பாவில் பொருட்களை வைத்து விட்டு அவசரத்தில்  எடுக்கும் போது கொட்டி ஒன்றோடு ஒன்று கலந்த பொருட்களை சாம்பார் பொடி அரைக்கும் போது பயன்படுத்திய அனுபவம் உண்டு.

என் கணவர், திருமணத்திற்கு முன் திருவெண்காட்டில் இருந்தபோது  நல்ல ஓட்டல்கள் கிடையாது  என்பதால் அவர்களே  சமைத்துச் சாப்பிட்டுக் கொண்டு இருந்தார்கள் , அப்போது  அலுமினியத்தில் அஞ்சறை டப்பா வைத்து இருந்தார்கள். எனக்கு அம்மா எவர்சில்வர் டப்பா வாங்கித் தந்தார்கள்.  நான் கணவர் வைத்து இருந்த அலுமினிய டப்பாவை கலர் கோலப்பொடி போட்டு வைத்துக் கொண்டேன், மார்கழி மாதம் கோலம் போட. அதுபோக  இன்னொரு  பிளாஸ்டிக் அஞ்சறைப் பெட்டி ஒன்றும் மாயவரம் ஐப்பசி முழுக்குக் கடையில் வாங்கினேன். இரண்டு டப்பாக்களிலும் கலர்ப் பொடி கலந்து வைத்துக் கொண்டு  கோலம் போடுவேன்.

பலசரக்குச் சாமான்கள் வருடத்திற்கு வாங்குவது குறைந்தபின் பெட்டிக்கு  அதன் உபயோகம் இல்லாமல் போய்விட்டது. அடுக்குமாடிக் குடியிருப்பில் இருந்துகொண்டு அரிசிக் கடையில் வாங்கி சாப்பிட ஆரம்பித்தவுடன் நெற்குதிர் இல்லை வீடுகளில். வயல் வைத்து இருப்பவர்களின் வீடுகளிலும், கோவில்களிலும் மட்டும் தான் பத்தாயம் இருக்கிறது இப்போது. கோவிலில் கூட இப்போது மூட்டை மூட்டையாக அப்படியே வைத்து இருக்கிறார்கள். யார் பத்தாயத்தில் கொட்டி பின் எடுத்து, அதைச் சுத்தம் செயவது பெரிய வேலை .

தூத்துக்குடியில் நான் சிறுவயதில் இருந்தபோது பக்கத்து வீட்டில் ஒரு அறையே நெற்குதிராக  வைத்து இருந்தார்கள். அதில் பக்கத்தில் சின்ன ஏணி இருக்கும் அதன் வழியாக உள்ளே இறங்கலாம்.  மொட்டைமாடியில் நெல்காயவைத்தால் அதைத் தூக்கி வர வேண்டாம் கீழே,

மேலிருந்து அப்படியே நெற் குதிருக்குள் தள்ளி விடலாம், மூடி போட்டுப் பூட்டி  வைத்து இருப்பார்கள். அப்புறம் திருடர் பயம் வந்து அதை மூடி விட்டார்கள்.

படித்ததில் பிடித்தது.

மிளகாய், தனியா, சீரகம்....என்று ஒன்றுக்கொன்று சம்பந்தம் இல்லாத பொருட்கள் அஞ்சறைப் பெட்டியில் இருந்தாலும், அவை எல்லாம் சேரும் பொழுது குழம்போ, ரசமோ கிடைப்பது போல், என் மனதிலும்( எல்லோர்) மனதிலும் ஒன்றொடொன்று சம்பந்தமில்லாத ஆயிரம் எண்ணங்கள் தோன்றி மறைந்து, மனதை பல  நேரங்களில் குழம்பு போல் கலக்குகிறது.  சில் நேரங்களில் ரசம் போல் தெளிவாக இருக்கிறது.  அவ்வாறு தோன்றிய சம்பந்தமில்லா எண்ணங்களின் தொகுப்பு இது.

படித்ததில் பிடித்தது இங்கு பொருத்தமாய் இருக்கவே பகிர்வு. சுஜாதா என்பவர் எழுதி இருந்தார்.

அஞ்சறைப்பெட்டி வைத்தியம் - மிளகு, சீரகம்,மல்லி வைத்து நம் வீட்டில் உள்ள பொருட்களை கொண்டு வைத்தியம் பார்த்துக் கொள்வதை அஞ்சறைப் பெட்டி வைத்தியம் என்கிறார்கள்.
பாட்டி வைத்தியத்திலும் இந்த அஞ்சறைப் பெட்டி உதவும்.

தொலைக்காட்சியில் சமையல் குறிப்புகள் கொடுக்கும் ஒரு நிகழ்ச்சியை "அஞ்சறைப் பெட்டி" என்கிறார்கள்.
                                          

பித்தளையால் நான்கு மூலைகளும்  அழகு படுத்தப்பட்ட பணப்பெட்டி.  அந்தக் காலத்தில் செட்டிநாட்டில் வேலைபார்த்தார்களாம் மாமனார் அப்போது வாங்கிய பணப்பெட்டி.

                                              
உள்ளே இப்படி இருக்கும். பணம், சில்லரைக் காசு, பத்திரங்கள் வைத்துக் கொள்ளலாம். ரகசிய அறை எல்லாம் அதிகப்படி என்று எளிமையான பணப்பெட்டி வாங்கினார்களாம். அப்புறம் கோத்ரேஜ் பீரோ வாங்கிய பின் பூஜை அறையில் தஞ்சம் அடைந்து விட்டது இந்தப் பெட்டி.

தேவகோட்டை ஜி, சகோ துரைசெல்வராஜூ எல்லாம்   போன பதிவில் பணம்வைத்துக் கொள்ளும் பெட்டி என்றார்கள். அதனால் மாமா வைத்து இருந்த பணப்பெட்டியும் இடம் பிடித்து விட்டது பதிவில்.

KILLERGEE Devakottai said...
//இது முன்பு எல்லோரது வீட்டிலும் குறிப்பாக செல்வந்தர் வீடுகளில் இருக்கும் பணப்பெட்டி. இதனுள் வீட்டுப் பத்திரங்கள் மற்றும் முக்கிய கடிதங்கள் வைத்து இருப்பார்கள்.

இதனுள் ரகசிய அறைகளும் உண்டு இதைத் திறப்பது சிறுவர்கள் அறியாதவாறு இருக்கும். அதை டெக்னிக்கலாக தட்டினால் திறந்து விடும்.//

//துரை செல்வராஜூ said...
இந்த அளவுக்குப் பெரிதாக இல்லாவிட்டாலும் 
சிறியதாக ஒரு சாதிக்காய் பெட்டி இருந்தது..

அதனுள் தான் எங்கள் அப்பாயி அரிசி விற்ற பணத்தை வைத்திருப்பார்கள்..
பெட்டியின் உள்ளே சிறு சிறு தடுப்பறைகள் இருக்கும்...//

இந்த இரண்டு பெட்டிகளும் நமக்குத் தேவையான ஒன்று தான் வாழ்க்கைக்கு. இரண்டுமே அளவு மீறாமல் இருந்தால் எல்லாம் நலமே.

இருப்பதைக் கொண்டு சிறப்பாய்ச் சமைக்கும் பெண்,  இருப்பதைக் கொண்டு நிறைவாய் வாழும் மனம் இரண்டும் இருந்தால் போதும்தானே!

                                                             வாழ்க வளமுடன்.

                                                                  ----------------------