உழவுக்குந் தொழிலுக்கும் வந்தனை செய்வோம்.

பொங்கல் திருவிழா

வீசிய விதையின் வேரில் முளைத்த வியர்வைப் பூக்களின் இயற்கைத் திருவிழா

ஏர் உழுவது -இப்போது  டிராக்டர் உழுகிறது.

நாற்றுகள் நடத் தயாராக இருக்கிறது

நாற்றுகள் இடம் விட்டு இடம் விட்டு அழகாய்  நடும் பெண்கள்

மிஷின் மூலம் நாற்று நடுதல் -  சில இடங்களில் (ரயிலில் போகும் போது எடுத்த படங்கள்)

பச்சைக் கம்பளம் போல் வளர்ந்து நிற்கும் நாற்றுக்கள்

கதிர் வந்து விட்டதே!

உண்ணுங்கால் எண்ணு

உண்ணும் உணவு உனக்கு கிடைத்தவகை ,

எண்ணி யுண்ணிடல் என்றும் உன்கடன்.

--வேதாத்திரி மகரிஷி

எத்தனை பேர் உழைப்பால் நெல் மணியானது வீடு வந்து சேர்கிறது  என்பதை உணரும் போது உழவர்களுக்கும் மற்றும் அனைத்து தொழிலாளர்களுக்கும் நாம் நன்றி சொல்லும் திருநாள்.

(நன்றி கூகுள்)

நான் வரைந்த பொங்கல் கோலம்

அறுவடை முடிந்து  கதிர் அடித்தபின் வைக்கோல் மாடுகளுக்குப் போகிறது.

வீட்டில் பொங்கல் திருவிழா:-

                
வெள்ளைப் பட்டை பக்கம் காவிப்பட்டையும் உண்டு வீட்டுக்குள் போட்டு இருப்பதால் காவிப் பட்டை போடவில்லை. இடது ஓரத்தில் சிறு வீடு வரைந்து இருக்கிறேன். மேலே வலது பக்கம் சூரியனும், இடது பக்கம் சந்திரனும் வரைவோம்.

நான்கு பக்க வாசல் போலவும் சூரியன், சந்திரன் வரைந்து நான்கு பக்க வாசலுக்குள் கோலம் போட்டு அதில் தான் பொங்கல் வைப்பார்கள். வாசலுக்கு சுண்ணாம்பு, காவிப் பட்டை கொடுக்கப்படும். மண்ணால் செய்த பிள்ளையார் செம்மண் அடித்து அதன் மேல் சுண்ணம்புப் பட்டை போட்டு வைப்பார்கள். பின் இரட்டை வாழைஇலையில் நடுவில் குத்துவிளக்கு வைத்து  விளக்கின் ஒரு பக்கம் மஞ்சள் பிள்ளையார், ஒரு பக்கம் நிறைநாழி(நெல் வைத்துள்ளது) வைத்து காய்கறிகளையும் வைப்பார்கள். வெற்றிலைபாக்கு, பழங்கள், தேங்காய்,கரும்பு எல்லாம் வைத்து பொங்கல் கொண்டாடுவோம்.

பொங்கல் அன்று எல்லாக் காய்கறிகளையும் போட்டு சாம்பார், அவியல் எல்லாம் செய்வார்கள், தேங்காய்த் துவையலும் உண்டு.

 நான்கு தினப் பொங்கல் விழாவை ஒரே நாளில் செய்து விடுகிறோம்  இப்போது கணுப் பொங்கலை சிறுவீட்டுப் பொங்கலாகக் கொண்டாடுவோம்.  பசுஞ்சாணத்தில் மார்கழி மாதம் கோலம் போட்டு  பிள்ளையார் பிடித்து வைத்து அதன் தலையில் பூசணிப் பூ வைத்து இருப்பதை காலை 11மணிக்கு எடுத்துத் தட்டி வைத்து விடுவார்கள். 30 நாள்  இப்படி தட்டி வைத்த ராட்டிகளையும், பனை ஓலைகளையும் வைத்து முற்றத்தில், அல்லது வாசலில்  பொங்கல் வைப்பார்கள். 

சிறு பெண்கள் உள்ள வீட்டில்  சிறு வீட்டுப்பொங்கல் என்று அவர்களே சிறு வீடு வரைந்த அல்லது சின்னதாய் வீடு மாதிரி கட்டிய இடத்தில் பொங்கல் வைப்பார்கள்.   பின் அன்று வைத்த 9, 7, 11 அடிப்படையில் வைத்த   பசுஞ்சாணப் பிள்ளையாரையும் , அதே எண்ணிக்கையில்  இலையில்  வைத்த வெண்பொங்கல், சர்க்கரைப் பொங்கல், தேங்காய், வாழைப்பழம் எல்லாம் வைத்து ஆறு , ஏரிகளுக்கு குடும்பத்துடன்,  தோழிகளுடன் போய் கரைத்து வருவார்கள்.   சமைத்த  உணவுகளை அங்கு கொண்டு வைத்துச் சாப்பிட்டு மகிழ்வார்கள்.

                          
                          மாடிவீடுகளில் காஸ் அடுப்பில் தான் பொங்கல்.
                   பால் பொங்குது ”பொங்கலோ பொங்கல்!” சொல்லுங்கள்.

 சூரிய ஒளியால் விளைந்த காய்கறிகள்  அவருக்கே படைக்கப் படுகிறது.   ஒரு இலையில் உள்ளது காக்காவிற்கு.  இன்னொரு இலை ஆற்றில், குளத்தில் கரைப்பதற்கு . அதில் உள்ள ஜீவராசிகளுக்கு.

 உலக உயிர்கள் வாழ  ஆதரமான சூரியனுக்கு நன்றி சொல்லி பொங்கல் 

மாடியில் சூரியனுக்குப் பூஜை

                                                
                                             மாடுகளுக்கு நன்றி சொல்ல  - மாட்டுப்பொங்கல்

                                      
                                                             திருவள்ளுவர் தினம் ( நன்றி கூகுள்)
                                               
                                                       கணு பொங்கல், கன்னிப் பொங்கல்
                                                      
                                                                    சிறுவீட்டுப் பொங்கல்
                             அனைவருக்கும் இனிய பொங்கல் நல் வாழ்த்துக்கள்.
                                                                வாழ்க வளமுடன்.
                                                                    -----------------------

புதுவருட வாழ்த்துக்கள்!

என் கணவர் வரைந்த   புத்தாண்டு வாழ்த்து

நான் வரைந்த புத்தாண்டு கோலங்கள்

அன்னையின் அருள்மலர்களில் இருந்து சில சிந்தனைகள்.

கடமை:-

ஒருவர் தியானத்தின் மூலம் முன்னேற முடியும், ஆனால் நல்ல சரியான மனப்பான்மையுடன் கடமையைச் செய்வதன் மூலம்  அது போன்று பத்துமடங்கு முன்னேற முடியும்.

உங்கள் வாழ்க்கை:-

உங்கள் வாழ்வு பயனுள்ளதாக அமையட்டும்.

சரியானதைச் செய் :-
பிறரிடம் அன்பை எதிர்பார்க்கிறாயா? அன்புள்ளவனாய் இரு.
உண்மையை எதிர்ப்பார்க்கிறாயா? உண்மையாக இரு.

நோயை வெல்லும் மனத்திட்பம்:-

உன் உடல் நலக்குறைவை நேசிக்காதே, உடல் நலக்குறைவு உன்னை விட்டு விட்டுப் போய்விடும்.

நிகழ்காலம்:-
வாழ்க்கையில் நிகழ்காலம் ஒன்றே மிக முக்கியமான காலகட்டம் ஆகும்.

எதிர்காலம்:-

எதிர்காலம் கடந்த காலத்தை விடக் கண்டிப்பாகச் சிறப்பானது தான். நாம் தான் முன்னேறிச் செல்ல வேண்டும்.

எதிர்காலத்தைப் பற்றி அதிகம் சிந்திக்காமல் ,அதை இறையருளின் பொறுப்பிலே விட்டு விட்டு எது சரியானதோ  நல்லதோ அதை நாம் அமைதியாகச் செய்ய வேண்டும். என்று கேட்டுக்  கொள்கிறேன்.

கர்மயோகம்:-

நன்றியுணர்வும் கடமையுணர்வும் ஒன்றிணைந்து
நலம்விளைக்கும் செயல்களையே விளைவறிந்து ஆற்ற
ஒன்றுமதம் இது “கர்மயோகம்” எனும் வாழ்வாம்.
உயிர்கட்கு உறுதுணையாம் உலகுக்கும் அமைதி.
-= வேதாத்திரி மகரிஷி

அனைவருக்கும்   புத்தாண்டு நல் வாழ்த்துக்கள்.!

                                        வாழ்க  வையகம்! வாழ்க வளமுடன்!
                                                           
                                                                    =============

மாக்கோலமாய் விளைந்த மதி விருந்து

நான் முதல் முதலில் வலைத்தளம் ஆரம்பித்த போது இந்த கிளிக்கோலம் போட்டு வேதாத்திரி மகரிஷி அவர்களின் ”மாக்கோலமாய் விளைந்த மதி விருந்து” என்ற கவிதை தொகுப்பிலிருந்து இரண்டு வரிகளை எழுதி என் பதிவுகளை ஆரம்பித்தேன். 

1953  ஆம் ஆண்டுமுதல் வேதாத்திரி மகரிஷி அவர்கள், தன் மனைவியின்  விருப்பப்படி, கோலத்தை சுற்றி எழுதுவதற்காக  எழுதிய கவிதைகளை  1958ல் சிறு நூலாக வெளியிட்டார்களாம், அந்த நூலின் முன்னுரையில் உள்ள அவருடைய கவிதைகள் :-

1’ மார்கழி மாதங்களிலே என் துணைவி

மாக்கோலம் காலையிலே தெருவிலிட்டு

ஆர்வமுடன் எனை நோக்கி அகம் பூரித்து

அக்கோலத்தைச் சுற்றி எழுதுவதற்கு 

ஓர் பாட்டு சொல்லும் என்பாள் அந்நேரத்தில்

உதிக்கும்சில சொற்றொடரை கோத்துச்சொல்வேன்

ஊர்ந்து செல்லும் அவளின்கை விரல்கள்மாவை

உதிர்த்தெழுத்தாய் மாற்றும் பலர் கண்பார்கள்.

அன்றன்று இந்தவிதம் தோற்றமான

அனுபவ ஆராய்ச்சிகளின் குறிப்பனைத்தும்

ஒன்றொன்றின் உட்கருத்தை விவாதம் செய்து

ஒத்துணர்ந்து உள்ளத்தில் நிறைவு பெற்று

என்றென்றும் பலர் படிக்க உதவுமென்று

எண்ணிஎழுதித் தொகுத்து அச்சிலிட்டு

இன்றுஇப்போ நாம் கண்டு இன்பம் காண

ஏற்றபடி இதைத்தந்தோர்க் கெனது நன்றி.

வித்தியாசமான கோலம்  என்று  ’எங்கள் Blog’ ல் பகிர்ந்து இருந்தார்கள். அதில் “மாக்கோலமாய் விளைந்த மதி விருந்து” என்ற கவிதை தொகுப்பிலிருந்து இரண்டு வரிகளை எழுதி  இருந்தார்கள் அதைப் பார்த்தவுடன் உங்களிடம் அதிலிருந்து சிலவற்றை பகிர ஆசை வந்து விட்டது.  எங்கள் Blogக் குழுமத்திற்கு  நன்றி.

 மார்கழி மாதங்களில் நான் கோலம் போடும்போது கோலங்களுக்கு கீழே அல்லது மேலே மகரிஷி அவர்களின்  அருளுரையிலிருந்து சில வாசகங்களை எழுதினேன். அந்தக் கோலங்களும் வாசகங்களும் இங்கே. (சில படங்களில் வாசகங்கள் போட்டோவுக்குள் அடங்கவில்லை).

இயற்கைச் சக்தியே விதி,

இதையறிந்த அளவே மதி 

உண்ணும் உணவு உனக்கு கிடைத்தவகை

 எண்ணி யுண்ணிடல்  என்றும் உன் கடன்.

உடையில் ஒழுக்கம் உள்ளத்தில் கருணை ,

 நடையில் கண்ணியம், நல்லோர் பண்பு

நினைவை யடக்க நினைத்தால் , நிலையா

நினைவை யறிய நினைத்தால் , நிலைக்கும்

உழைப்பினால் உடலும், உள்ளமும், 

உலகமும், பயன் பெறும் உணர்வீர். 

ஆக்கத்துறையில் அறிவைச் செலுத்து,

ஊக்கத்துடன் உழை, உயர்வு நிச்சயம் .

உனக்கும் நல்லதாய் , ஊருக்கும் நல்லதாய் ,

நினைப்பதும் , செய்வதும் நித்தியகடன்.

அவனில் அணு, அணுவில் அவன் 

உன்னில் எல்லாம், நீ அறி உன்னை

எண்ணு , சொல், செய், 

எல்லோருக்கும் நன்மை தர,

எண்ணும்படி செய்,

செய்யும்படி எண்ணு>

                                                      உலகமே ஒரு பெரிய பள்ளி,

                                      ஒவ்வொருவருக்கும் தினம் புதிய பாடம்.

                                     பலகலைகள் கற்றோர்க்கும் பாமரர்க்கும்,

                                      பகிர்ந்து தரும் இன்பதுன்பம் எனும் பரிசு

வாங்கும் கடனும் , தேங்கும் பணமும்

 வளர வளர  வாழ்வை கெடுக்கும்

கண்ணாடிப் பார்க்கக் காணலாம் உருவநிலை

உண்ணாடிப் பார்க்க உணராலாம் உயிர்நிலை

                                        வாழ்க வையகம்! வாழ்க வளமுடன்!
                                                                 ---------------------

கூடு செல்லும் பறவைகள்

மாலையில் கூடு திரும்பும் பறவைகள் பூங்காவில் உள்ள மரங்களில், ரயில்நிலையத்தில் உள்ள மரங்களில் எழுப்பும் ஒலியைக் கேட்டு இருப்பீர்கள் தானே! . 

                  

எங்கள் ஊர் ரயில்நிலையத்தில் உள்ள இந்த அரசமரத்தில் தான் பறவைகள் மாலையில் எழுப்பும் ஒலியை எடுத்தேன்.

கோயில் கோபுரங்கள், ஆலமரம், அரசமரம் இவைதாம் பெரும்பாலும் பறவைகளின் இருப்பிடம். 

வேப்பமரக் கிளி

தென்னைமரத்தில் புல் புல் பறவை

மாமரத்துக் கிளி

வேப்பமரக் கொக்கு

                                     

எங்கள் ஊர் ரயில் நிலைய அரசமரத்தில் மாலை நேரம் பறவைகள் எழுப்பிய ஒலியைத் தான் இப்போது இங்கு கொடுத்து இருக்கிறேன்.

வீடு திரும்பிவிட்டோம் என்று  மகிழ்ச்சி ஆரவாரத்தில் ஒலி எழுப்புகிறதா அல்லது,’என் இடம், உன் இடம்’ என்கிறதா? தெரியவில்லை. அமராமல் அங்கும் இங்கும் பறந்து கூச்சல் எழுப்புவதைப்பார்த்தால் அப்படி ஒரு சந்தேகம் வருகிறது.

                                                             வாழ்க வளமுடன்.

                                                                    ==============