எல்லாம் இருக்கு ஆனால் இல்லை!

கொரோனாவால் வெளியே போக முடியாமல்   இருந்தது. வெள்ளிக்கிழமை  சந்தை கிடையாது.  அத்தியாவசிய பொருட்கள் வாங்குவது மிகவும் கஷ்டமாக இருந்தது. மூன்று நாட்களுக்கு முன் கார்ப்பரேஷன் ஏற்பாடு செய்த  காய்கறி வண்டி நாங்கள் இருக்கும் வளாகத்திற்கு வந்தது.

ஒரு மூட்டை 250 ரூபாய் . யாரையும் காக்க வைக்காமல் உடனே கொடுத்து அனுப்பிவிட நல்ல யோசனை.

அவர்கள் தேவைப்படும் எல்லாவற்றையும் அருமையாகத் திரட்டிக் கொடுத்து இருந்தார்கள். நாம் வாங்கப் போனால் கூட சிலவற்றை மறந்து வந்து விடுவோம். அவர்கள் தேவையானதைக் கொடுத்து இருந்தார்கள்.

தக்காளி மட்டும் மூட்டையில் இல்லை தனியாக நம் பையில் தந்தார்கள்.

என்ன காய் இருக்கிறது என்று நீங்களே பாருங்ககள்.நான் காய் வாங்கிய வண்டியைப் படம் எடுக்க முடியவில்லை, காய் வாங்கப் போகும் அவசரத்தில்  செல்லை எடுத்துச் செல்ல மறந்து விட்டேன்.நான் வாங்கிய வண்டியில் நிற்கவே வேண்டாம் பையைக் கொடுத்துக் காசை வாங்கி உடனே அனுப்பி விட்டார்கள். இது நல்ல யோசனை. ஸ்கூட்டரில் வண்டியை தொடர்ந்து  வந்த இரண்டு பெண்கள் அவர்கள் தன் ஆர்வலர்களாம் , உதவி செய்தார்கள். உப்பு, மஞ்சள் கலந்த தண்ணீரில் காய்களைக் கழுவி உங்கள் பார்வைக்கு வைத்து இருக்கிறேன்.

இன்னொரு  காய் வண்டியை என் வீட்டு பால்கனியிலிருந்து எடுத்தேன்

இயற்கை உரம் போட்ட காய்வண்டி. தனியார் சேவை. போதுமான இடைவெளி விட்டு வாங்கிச் செல்கிறார்கள். 

அடுத்து இதே போல் ஒரு மாத மளிகை சாமான்களும்  கொண்டு வந்து கொடுத்தால் நன்றாக இருக்கும்.

நம் வீட்டுக்குப் பலசரக்குச் சாமான்கள் தந்து கொண்டு இருந்தவர்களே இப்போது தர மாட்டேன் என்கிறார்கள் . போய் தான் வாங்க வேண்டும் கதவை மூடி வைத்துக் கொண்டு நம் கொண்டு போன லிஸ்டை வாங்கி சென்று பொருட்களைக் கொடுக்கிறார்கள் வெளியே வந்து . நாம் கேட்ட கம்பெனி இருக்காது ,வேறு இருக்கும் அல்லது அந்தப் பொருளே இருக்காது .

அவர்கள் கொடுப்பதை வாங்கி வர வேண்டும்.

 முன்பு வாங்கி வைத்து இருந்த மாவுகளை முதலில் காலி செய்கிறேன்.

கொரேனா வருவதற்கு முன் வாங்கிய பொருட்களை முதலில் காலி செய்வோம் என்று  தேடியதில் கிடைத்த கோதுமை  இடியாப்ப மாவு.

முதன் முதலில் இதைச் செய்கிறேன்.

 பாக்கெட் மாவில் பாதியை எடுத்து (ஒன்றரை கப் மாவு இருக்கும்) எடுத்துக் கொண்டேன். 

 மாவை சூடான வெந்நீர் விட்டுப் பிசைந்து இடியாப்ப உழக்கில் போட்டு முதல் ஈடு பிழிந்த போது  எளிதாக இருந்தது. அடுத்துப் பிழியும் போது கை சிவக்க வலி வந்து விட்டது. கஷ்டமாய் இருந்தது. 

இரண்டு தட்டு மட்டும் பிழிந்து விட்டேன் மீதி மாவை  எடுத்து வைத்து விட்டேன் பிரிட்ஜில். இரவு உணவுக்குப்  பச்சைமிளகாய், இஞ்சி கருவேப்பிலை போட்டுத் தாளித்து 

பிழிந்த இடியாப்பங்களை  பச்சைமிளகாய், இஞ்சி கருவேப்பிலை, தேங்காய் பூ போட்டு தாளித்துச் சாப்பிட்டோம். ருசியாக இருந்தது.

நமக்கு ஏதோ கிடைத்துக் கொண்டு இருக்கிறது பொருட்கள்.

தினக்கூலி பெற்று அன்றாடம் சமையலுக்குப் பொருட்கள் வாங்கிச் செல்வோரின் நிலையை நினைத்துப் பார்க்க  வேண்டும் . கட்டிட வேலைக்குப் போவோர், வயல்வேலைக்குப் போவோர்களின் நிலை மிகவும் கவலை அளிக்கிறது.

பால் கீழே கொட்டப்படுகிறது, பழங்கள் வீதியில் வீசப்படுகிறது. இதை எல்லாம் காட்சியாகப் பார்க்கும்போது மனம் பதைபதைக்கிறது அந்த ஊர் மக்களுக்கு கொடுக்கலமே  என்ற எண்ணம் வரும். யார் போய்க் கொடுப்பது?

யார் வந்து வாங்குவார்கள்?  அவைகளை முறையாக  எல்லோருக்கும் வழங்க ஏதாவது வழி இருக்கா என்று ஆராய்ந்து செயல்படலாம்.

வயல்களில் அறுவடைக்குக் காத்து இருக்கும்  பயிர், மரங்களில் பழங்கள்  அதுவாக வெடித்து கீழே விழுகிறது.வேலைக்கு ஆள் இல்லாமல் .பூக்கள் வாடி விழுகிறது பறிக்க ஆள் இல்லாமல்.

 இயற்கைகொடுத்ததை மனிதன் பெறமுடியவில்லை. எல்லாம் இருந்தும்  சாப்பாட்டுக்கு ஒன்று இல்லாததை (கிடைக்காததை)    நினைக்கும் போது மைதாஸ்  கதை நினைவுக்கு வருது. தொட்டதெல்லாம் தங்கமாக வேண்டும் என்ற வரம் கேட்ட நிலை இப்போது நமக்கு.  எல்லாம் இருக்கு ஆனால் இல்லை என்ற நிலை.

இறைவன் அருளால் எல்லோரும் நலம் அடைய வேண்டும் பழையபடி உலகம் இயங்க வேண்டும்.  அனைத்து வளங்களும், நலங்களும் மக்களுக்கு கிடைக்க வேண்டும். இறைவன் அருளவேண்டும். அவர் உணர்த்திய விஷயங்களை மக்கள் உணர்ந்து கொண்டார்கள்.

எல்லோருடைய பிரார்த்தனைகளும் பயனளிக்கும். நம்புவோம். நம்பிக்கை ஓளி பரவட்டும். அச்சம் இன்றி வாழ்வோம்.

                         வாழ்க வையகம் ! வாழ்க வையகம் ! வாழ்க வளமுடன்!