இராசிபுரம் அம்மன் கோயில்கள்

தம்பி மகள் (மறுவீட்டுக்கு 20. 2. 2019 )மாப்பிள்ளை வீட்டில்  திருமண வரவேற்பு வைத்து இருந்தார்கள். மாப்பிள்ளையின் ஊரான  இராசிபுரத்திற்குப் போய் இருந்தோம். மருமகளுக்கு அலங்காரம் செய்துகொண்டு இருந்தார்கள்.

உறவினர்களிடம் பேசிக்கொண்டு இருந்தபோது கோவில்களைப் பற்றி விசாரித்தேன்.  வரவேற்பு ஆரம்பிக்கும் முன்  வரும் வழியில் பார்த்த அனுமன் கோவில் போய் வருகிறோம் என்றோம், (வரவேற்பு நேரம் மதியம் 12 மணி முதல் 3 மணி வரை- நாங்கள் மீண்டும் ஊர் திரும்ப வசதியாக வைத்து இருந்தார்கள்.) அவர்கள் அந்தக் கோவில் சீக்கிரம்  அடைத்து விடுவார்கள், அதனால் நித்தியசுமங்கலி மாரியம்மன் கோவில் போய் வாருங்கள் அருமையான கோவில் என்றார்கள். அப்படியே  அங்காளபரமேஸ்வரி கோவிலும் போய் வாருங்கள் என்றார்கள், மாப்பிள்ளையின் அப்பா. எங்களை அழைத்துச் சென்று கோவில்களைக் காட்ட அவர் தம்பியை உடன் அனுப்பினார்கள்.

கிளம்பி விட்டோம் கோவிலுக்கு

நித்திய சுமங்கலி மாரியம்மன் திருக்கோவில்

11ம் ஆண்டு காய்கறி  அலங்கார உற்சவ விளம்பரம்

கோவில் உள் அமைப்பு

பக்க வாசலில் பிள்ளையார்

ஊஞ்சலில் அம்மன் பாதம்  பதித்து வைத்து இருக்கிறார்கள்..

அந்த ஊஞ்சலை ஆட்டி விட்டால்  நினைத்த காரியம் நடக்கும் என்றார்கள் , ஊஞ்சலை ஆட்டிக் கொண்டு இருந்த அம்மா.  நாங்களும் எல்லோரும் நலமாக இருக்க வேண்டி ஆட்டி வந்தோம்.

தலவரலாற்றில் குழந்தைச் செல்வம் பெற அந்த ஊஞ்சலை ஆட்டிவிட வேண்டும் என்று படித்தேன்.

ஊஞ்சல் மண்டபத்திற்கு இருபுறமும் குதிரைகள் அழகாய் இருக்கிறது.

சேணத்தில் கால் வைத்து ஏறும் வசதியாகச் சிலையை வடித்து இருக்கிறார்கள்.

பூக்குழி இறங்கும் இடம் இருக்கிறது

அம்மன் சன்னதி செல்லும் வாசல் மேல் விதானத்தில் அழகிய காட்சி

அம்மன் மிக அலங்காரமாய் இருந்தார். அம்மன் முன் இருப்பது சுயம்பாக வயல்வெளியில் கிடைத்தவள் . ஒரு விவசாயி தன் நிலத்தை உழும் போது ஏதோ தட்டுப்படுவது போல இருந்ததாம். நிலத்தில் இரத்தம் பீறிட்டு வந்ததாம். அவர் ஊர் மக்களைக் கூவி அழைத்து அந்த இடத்தைத் தோண்டிப் பார்க்க,  சுயம்பாய் அன்னை காட்சி தந்தாளாம், பக்தர் ஒருவர் மேல் அருள் வந்து இங்கு கோவில் அமைக்கச் சொன்னாராம்.

சுயம்பு மட்டுமே வைத்து ஆலயம் அமைத்து இருக்கிறார்கள், பிற்காலத்தில் அம்மன் சிலை வடித்து வைத்து வழிபட்டு இருக்கிறார்கள். முதலில் சுயம்புக்கு அபிஷேகம், பூஜை ஆனபின் தான் அம்மனுக்கு ஆகுமாம்.

சதுர வடிவ ஆவுடையார் மேல் அம்மன் தோற்றம் இருக்கும். சுயம்பு  சிவன் மாதிரி தோற்றம் அளிப்பது இங்கு விசேஷம். இந்தக் கோவில் 600 ஆண்டு பழைமையானது என்றார். 

என் தங்கை போட்டோ எடுத்துக் கொள்ளலாமா என்று கேட்டாள். நான் மிக அழகாய் அலங்காரம் செய்து இருக்கிறீர்கள். மண்டபத்தில் இருக்கும் உறவினர்களுக்கு காட்ட வேண்டும் எடுத்து கொள்ளலாமா என்ற போது அம்மா வந்தா எடுத்துக் கொள்ளுங்கள் என்றார். சுற்று வட்டார ஜனங்கள் எல்லாம் இவர் செய்யும் அலங்காரம் போல் யாராலும் செய்ய முடியாது என்று பாராட்டிச் செல்வார்கள் என்றார்.

அம்மா வந்தா எடுத்துக் கொள்ளுங்கள் என்றாரே குருக்கள்,  அலைபேசியில் அம்மாவை வணங்கி எடுத்தேன்.

கருணை மிகுந்தவள் அல்லவா! வந்துவிட்டாள், என் கண்ணிலும்    அலைபேசியிலும். தேடுகின்ற கண்களுக்குள் ஓடி வரும் தாயி.

அலங்காரம் செய்யச் சொன்னவர் கொடுத்த 100 ரூபாய் போலும் அம்மன் தாலிக்குக் கீழ் இருக்கிறது.

காமதேனு புடவை கட்டிக் கொண்டு,- வெள்ளைகலர் தூசி ஆகாமல் இருக்கப் போட்டு இருக்கிறார்கள் போலும்

அம்மனுக்குப் பின்புறம் மண்டபத்தில் ஒரு பக்கம் பிள்ளையார்

மறுபக்கம் முருகன்

குதிரை வாகனம்

திருவிழா

 

திருவிழாக் காலங்களில்  இப்படிக் கம்பம் நட்டுப் பூஜை செய்வார்கள் , ஆனால் இங்கு எப்போதும் நிரந்தரமாய் இருக்கிறது. கம்பம் அம்பாளின் கண்வராகக் கருதப்படுகிறது. அம்மன் தன் எதிரில் இருக்கும் தன் கணவரை பார்த்தபடியே இருப்பதால் தான்  அம்மனுக்கு பேர் நித்திய சுமங்கலி . 

கம்பத்தின் அடியில் உள்ள கல் பீடத்தில் நான்கு  திசையிலும் அழகான சிம்மத்தின் தலை இருக்கிறது.

ஐப்பசி மாதம் திருவிழாக் காலத்தில் இந்தக் கம்பத்தை எடுத்துவிட்டுப் புதுக் கம்பம் நடுவார்களாம். பழைய கம்பம் கிணறு இருக்கும் இடத்திற்கு கொண்டு வந்து வைத்து அதற்குத் தயிர்சாதம் பிரசாதம் செய்து வைத்து எலுமிச்சைவிளக்கு ஏற்றி  வழிபட்டுத் தயிர்சாதத்தைப்  பெண்கள் சாப்பிடுவார்களாம். (குழந்தைப் பேறு வேண்டி.)

வரும் பக்தர்கள் எல்லாம் சின்ன பிளாஸ்டிக் குடத்தில் தண்ணீர் பிடித்து  கம்பத்தின் மேல் ஊற்றி பூப் போட்டு வணங்கிச் செல்கிறார்கள்.

மாட்டின் உருவச் சிலைகள் நிறைய இருக்கிறது, மணி, வேல், சூலாயுதம் எல்லாம் வேண்டிக் கொண்டு காணிக்கையாகக் கோவிலுக்குக் கொடுத்தது.

சிமெண்ட் தொட்டியில் உப்பு மிளகு கொட்டி இருந்தது.  முகத்தில் மரு, பரு, மற்றும் சரும நோய்கள் தீர வேண்டிக் கொண்டு கொட்டுவார்களாம்.

கோவில் மிகச் சுத்தமாகப் பராமரிக்கப்படுகிறது.

============================================

அருள்மிகு ஸ்ரீ அங்காளபரமேஸ்வரி கோவில்

பிள்ளையார் இருக்கிறார்

                                                                                                        அம்மன் சன்னதி கோபுரம்

                          
 

மேல் விமானம் தங்கம் போல பிரகாசமாய் இருக்கிறது- தங்க கலசம் மின்னுகிறது

                                   
முருகன் பழனி முருகன் போல் ராஜ அலங்காரத்தில் காட்சி அளித்தார். அவ்வளவு அழகாய் பார்த்துக் கொண்டே இருக்கலாம் போல , விபூதி அலங்காரம் முகத்திற்கு. படம் எடுக்கக் கூடாது என்றார்கள். வெளிப் பக்கம் மட்டும் கேட்டுக்கொண்டு எடுத்த படங்கள்.
                                    
வெளிப்பக்கம் தெரியும் விமானத்திற்குக் கீழ பெரிய வலம்புரிப் பிள்ளையார் இருக்கிறார். அவர் பக்கத்து மண்டபத்தில் மதுரை வீரன், தன் இரு மனைவியருடன். அப்புறம் பரிவார  தெய்வங்கள்.

ஒரு அழகான மண்டபத்தில் நாகாஆபரணம் தலையில் அணிந்து படுத்து இருக்கும் கோலத்தில் அங்காளபரமேஸ்வரி. நாகாபரணம், கால், கைகளுக்கு வெள்ளிக் கவசம் அணிந்து இருந்தார்கள்.

அர்த்த மண்டபத்தில் அம்மன்   பத்மாசனத்தில் அமர்ந்த கோலத்தில் சந்தனக் காப்பில் பச்சைப் பட்டு உடுத்தி அழகாய் காட்சி தந்தார். விபூதி கொடுத்தார்கள் முதலில், பின் அழகான குங்குமச் சிமிழ்  வெண்கலத்தில் -அழகிய வேலைப்பாடு நிரம்பியது -அதை முதலில் நம் தலையில் வைத்தனர்,(சடாரி போல்) பின் குங்குமம் தந்தனர்.

எல்லோருக்கும் எல்லா நலமும் அம்மன்கள் தருவார்கள் என்ற நம்பிக்கையுடன் , மகிழ்ச்சியுடன்  திருமணவரவேற்பு மண்டபத்திற்குத் திரும்பினோம்.

                                                            வாழ்க வளமுடன்.