கிருஷ்ணாபுரம் அருள்மிகு ஆஞ்சநேயர் திருக்கோவில்

தம்பி மகள் வளைகாப்பு விழாவிற்கு தென்காசி போனோம் 12ம் தேதி.  அப்போது போகும் வழியில் உள்ள கிருஷ்ணாபுரம் என்ற ஊரில் உள்ள அனுமன் கோவில் போனோம்.

கடையநல்லூர்  தாலுகாவில் இருக்கிறது. தென்காசியிலிருந்தும் சங்கரன் கோவிலிலிருந்தும் போகலாம்.

எந்தக் கோவில் போவதாய் இருந்தாலும் அதைப்பற்றி தெரிந்து கொண்டு போவோம். இந்தக் கோவில் போகும்போது அண்ணி  சொன்னார்கள் அனுமன் கோவில் இருக்கிறது பார்க்கலாமா என்று கேட்டார்கள் அதனால் விவரம் ஒன்று தெரியாமல் பார்த்த கோவில்.

பட்டரிடம் கேட்கலாம் என்றால் அவர் அபிஷேகம் முடித்து திரை போட்டு அலங்காரம் செய்து கொண்டு இருந்தார். திரை விலக்கியவுடன்  அர்ச்சனை இருக்கா என்று கேட்டு எல்லோரிடமும் அர்ச்சனை சாமான்கள், வெற்றிலை மாலை எல்லாம் வாங்கிக் கொண்டு போய்விட்டார்.

9.30க்கு   விழா ஆரம்பித்துவிடும்எங்களுக்கும்   அதற்குள்  தென்காசி போக வேண்டும்.

காரில் இறங்கியவுடன்  -  ஏரி போல குளம்  இருந்தது.

குளத்தின் ஓரத்தில்  பூத்த மலர்

நாங்கள் வந்த கார் மேலே இருக்கிறது பாருங்கள், கீழே   சாய்வாக தளத்தில் நடந்து வந்தால் பின் சிலபடிகள் உடைந்து காணப்படும் அதில் இறங்கினால் இப்படி  சிமெண்ட் பாதை இருக்கிறது. எல்லாப் பக்கமும் பச்சைப்பசேல் என்று வயல் இருக்கிறது . ஒரு பக்கம் மட்டும் வேலி இருக்கிறது, அந்த வேலியில் கொடி படர்ந்து இருந்தது  அதில் பூத்த மலர்.

தைமாதம் அறுவடை இருக்கும் போல! திருப்பாவையில்  இன்றைய பாடலின் "ஓங்கு பெருஞ்செந்நெல்"  என்ற வரிகளை நினைவுபடுத்துகிறது இல்லையா?

காலை நேரம் பனித்துளியோடு கதிர்கள் பள பள என்று  மின்னியது.

நெற்கதிர்கள்

கோவிலைச் சுற்றி கண்ணுக்கு  எட்டிய தூரம் வரை வயல்கள்தான்.

அனுமன் விமானம்

அனுமனுக்கு நேரே குளம் இருக்கிறது. அதன் கரையில் நவீன முறையில் சமையல் கூடம் இருக்கிறது. தினம் அன்னதானம் நடக்கிறது.  100 பேர் சாப்பிட சமைக்கிறார்கள். அவர்கள் நிறைய செய்யவேண்டும் என்றால் மட்டும் நவீனமாக சமைப்பதில் சமைப்பார்கள் போலும் . கொஞ்ச பேருக்கு என்றால் பெரிய அலுமினியப் பாத்திரத்தில் சமைத்துக் கொண்டு இருந்தார்கள்.  புடலங்காய் கூட்டுக்கு  நறுக்கிக் கொண்டு இருந்தார்கள்.

ரயிலைவிட்டு இறங்கினால் 2 கிலோ மீட்டர் தூரத்தில்  இருக்கிறது இந்த அனுமன் கோவில்  வரும் பக்தர்கள், குளிக்க  குளியல் அறை, கழிவறை எல்லாம் சுத்தமாகப் பராமரிக்கப்படுகிறது. சாவி  ஆபிஸ் அறையில் இருக்கிறது.

ஜி.கே .கெளசிக் என்பவர் இந்தக் கோவிலைப்பற்றி விரிவாக எழுதி இருக்கிறார், படித்துப் பார்த்துச் செல்ல விருப்பப்பட்டவர்கள் செல்லலாம்.

//அனுபவம்
பயம் நீங்கி, தெளிந்த மனதுடன் சிந்தித்து செயல்பட இந்த க்ஷேத்திரத்தில் அருளும் ஶ்ரீஅபயஹஸ்த ஜயவீர ஆஞ்சநேயரை தரிசனம் செய்யுங்கள். கிட்டும் அவரது அருளை அள்ளிச் செல்லுங்கள் மனநிம்மதியுடன். //

இப்படி சொல்கிறார் கெளசிக்.

தண்ணீர் இல்லாத நேரம் குகை வாயில் போன்று இரண்டு வாயில்கள் காணப்படுகிறதாம் . தீர்த்தத்தின் பேர் 'அனுமன் தீர்த்தம்" என்றும் சொல்கிறார்கள். குளத்தின் படியில் "படிப் பாயசம்" சாப்பிட்டால் குழந்தைச் செல்வம் கிடைக்குமாம்.

தலவிருட்சம் நெல்லிமரம்   

அனுமன் முன் இருக்கும் வாசலில்  அலங்கார விளக்கு.



மூலவர்  ஆறடி உயரத்தில் வலது கை அபய முத்திரை காட்டி இருக்கிறார், இடது கையை இடுப்பில்  வைத்து இருக்கிறார். ஒரு கால் நம்மை நோக்கி அடி எடுத்து வைப்பது போல் இருக்கிறது.    அவரின் வால் தலைக்கு மேலாக வந்து அதில் சிறிய மணி தொங்குகிறது.

மூர்த்திகள் சிறிதாக இருந்தாலும் கீர்த்தி பெரிது

விளக்குப் போடுதல் பற்றிய விவரங்கள்.

 எண்ணெய் சேகரிக்கும் இடம்

அனுமன் கவசம்

இந்தக் கோவிலின் பெருமை சொல்லுகிறது.

இந்த மண்டபத்துக்குள் நாகர் இருக்கிறார், அவரைப் பற்றி செய்திகள் இல்லை.

 ஞானானந்த சரஸ்வதி, வி. கோபாலய்யா , பிரமாதிவருஷம் புரட்டாதி 10 தேதி சுக்ல சதுர்த்தி 26. 09.1939 என்று போட்டு இருக்கிறது.

 அவசரத்தில் எடுத்த படம் இவர்கள் பேர் எல்லாம் அந்த பக்கம் இருக்கிறது போலும் படங்களை வலைஏற்றியவுடன் தான் தெரிந்தது பேர்கள் இல்லை என்பது. இது போல் கோவிலைச்சுற்றி பத்துக்கு மேற்பட்ட ஜீவசமாதிகள் இருப்பதாய்  அர்ச்சனை சாமான்கள் விற்பவர் சொன்னார். கோவில் சிறப்புகளைச்  சொல்லும்  அறிவிப்புப் பலகையிலும்  இது இருக்கிறது வீட்டுக்கு வந்து தான் பார்த்தேன்.

 இராமாயணத்தில் இடம்பெற்ற புராண வரலாறு கொண்டது.  தினமலர் கோவில் பக்கத்திலும் இந்த அனுமன் கோவில்பற்றிய  தலவரலாறு  இருக்கிறது. பெரிய கதையாக இருக்கிறது .

இயற்கையை ரசிக்கவும்  இந்தக் கோவிலுக்குச் செல்லலாம்.  வயல்களுக்கு நடுவில் இருப்பது பார்க்கவே அழகு.மார்கழி மாதம் காலை நேரம் இன்னும் நன்றாக இருக்கும் தரிசனம் செய்ய.
                                                             வாழ்க வளமுடன்.
--------------------------------------------------------------------------------------------------------------------------