மீனாட்சி சொக்கர் திருவிழா! 2019

நேற்று 8/4/2019 காலையில் மீனாட்சி சுந்தரேஸ்வரர் கோவிலில் சித்திரைத் திருவிழா கொடியேறியது .
இரவு 7மணிக்கு  வீதி உலாக் காட்சிகளைக் கண்டோம். அவை இந்தப் பதிவில் இடம் பெறுகிறது.

பக்தர்களை வரவேற்கும் வண்டி முதலில் வருகிறது. அன்னை வரும் பாதையை சரி செய்து கொண்டே வரும்.

இப்போது இரண்டு வருடமாய் யானை மட்டும் சாமி முன் வருகிறது. முன்பு, காளை இரண்டு முரசுகளுடன் வரும், அப்புறம் ஒட்டகம் இரண்டு வரும், அப்புறம் யானை வரும். அதன் பின் தான் பஞ்சமூர்த்திகள் பவனி வருவார்கள்.
சித்திரைப்பெருவிழா முதல் நாள் காட்சிகள்:-


அம்மன்  சன்னதி கோபுரம்

அம்மன் சன்னதி மண்டபம்  வாசல் முன் ஒரு புறம் பிள்ளையார், மறுபுறம் முருகன்.
 மக்கள் கூட்டம் மீனாட்சி, சொக்கரை எதிர்பார்த்துக் காத்து இருக்கும் கூட்டம்.


பஞ்சமூர்த்திகள் வீதி உலாக் காட்சியில் அலங்காரப் பந்தலின் கீழ் முதலில் பிள்ளையார்  -பிறகு எல்லா சாமிகளும் சிறிது நேரம் நின்று போவார்கள். அதனால் அங்கே நின்றே சாமிகளைப் பார்த்தோம். சன்னதி முன் நாகப்பட்டினம் மிட்டாய்க் கடை என்ற பிரபலமான மிட்டாய்க் கடை இருக்கிறது,  அதற்கு அடுத்த கடை அலங்கார கைப் பைகள் விற்கும் கடை  வாசலில் நின்று  தரிசனம் செய்தோம்.

யானை முன்னே வர, சிவ பக்தர்கள் இசைக்கருவிகளை வாசிக்க , நாதஸ்வரம் முழங்க,

.பொய்கால் குதிரை, காளைகள், மயில், உயர்ந்த கட்டைகளின் மீது நடப்பவர்கள் முன்னே போக,  கோலாட்டக் குழந்தைகள் , கண்ணன் போல் உடை அணிந்த குழந்தைகள் பவனிவருகிறார்கள்.

சாம்பிராணிப்புகையின் பின் மீனாட்சியம்மன் சொக்கநாதர் வருவது அழகு

கற்பக விருட்ச வாகனத்தில் சுந்தரேஸ்வரர்-பிரியாவிடை,

 மீனாட்சி - சிம்ம வாகனத்தில்.

சாமி வரும் நேரம் அவசர அவசரமாய் உடை அணிந்து கொண்டார்கள்.
நான் நின்று கொண்டு இருந்த இடத்திற்கு நேர் புறம் அவர்கள் நின்று கொண்டு இருந்தார்கள். ஜூம் செய்து  என் அலைபேசியில் எடுத்த படம் சுமாராக தான் இருக்கும் மன்னித்துக் கொள்ளுங்கள்.
காமிரா எடுத்துப் போகவில்லை.

கட்டைக் கால் மேல் நின்று கொண்டு  நடனம்

இந்த வெயிலில் உடல் முழுவதும் மூடிக் கொண்ட காளை வாகனம்  ஆடுபவர்கள் பாவம்.

 இடை இடையே காளை முகத்தை வைத்து  எல்லோரையும் பார்த்துச் சிரித்துக் குழந்தைகளை முட்ட வருவது போல் விளையாடி தங்களை ஆசுவாசப் படுத்திக் கொண்டார்கள்.


மயில் நடனம் ஆடுபவருக்கு அலங்காரம் செய்கிறார். மஞ்சள் உடை அணிந்தவர்.

 மயில் நடனம் புரிபவர் தன் தலையை திருப்பி பேசுவது  மயில் சண்டையிடுவது போல இருக்கிறது.

 மயிலும்  முகத்தை மூடிக் கொள்வதால்  அந்த வேடம் அணிந்தவருக்கும் கஷ்டம் தான். தாத்தா, பாட்டி முகமூடி அணிந்தவர்களும்  தங்கள் கஷ்டத்தை பொருட்படுத்தாமல் மற்றவர்களை மகிழ்வித்தார்கள்.

ஆடிக் கொண்டு போன மயில்கள்

'சாமி வருது! ஓடுங்க1 ஓடுங்க!' என்கிறார் அலங்காரம் செய்தவர்



கோலாட்டக் குழந்தைகள் சாமிகள் வரவை எதிர் நோக்கி- "எப்போ வருவாரோ!"

கண்ணன் போல் உடை அணிந்த குழந்தைகள் பவனிவருகிறார்கள்.
அவர்கள் அம்மாவிடம் அனுமதி பெற்று குழந்தைகளைப் படம் எடுத்துக் கொண்டேன்.

ஜவ் மிட்டாய் இல்லாத திருவிழாவா?

அதுவும் உண்டு , ஜவ் மிட்டாய் பிடித்தவர்கள் இருக்கிறார்களே!

ஜவ்மிட்டாய் விற்பவர், வாங்காமல் இப்படிப் படம் மட்டும் எடுத்துக் கொள்கிறார்களே என்று நினைத்து இருப்பார்.

திருவிழாப் பார்க்க வந்தவர்கள் பொங்கல் பானை வாங்கிப் போகிறவர் சாமி வரும் போது சாமியைப் பார்க்க விடாமல் தலைமேல் வைத்து கொண்டு திட்டு வாங்கினார்கள்.

சாமி பார்த்து விட்டு " பங்குனி போயி சித்திரை வந்தால் கல்யாணம் வருமே! மகளுக்கு அப்படியே பொங்கல் பானை   வாங்கி விடலாம்" என்று வாங்கிப் போகிறார்.
முதல் நாள் என்பதால் கருப்பசாமி வேஷம், மீனாட்சி வேஷம் போட்ட குழந்தைகளைப் பார்க்க முடியவில்லை.

தினம் பார்க்க ஆசைதான், அடுத்து   எப்போது போவேன் என்று தெரியாது. போன ஆண்டு' பூம் பல்லாக்கு' திருவிழா பதிவு போட்டேன்.

இந்த ஆண்டு முதல் நாள் திருவிழா கற்பக விருட்ச வாகனம். கற்பக விருட்சம் கேட்பதை எல்லாம் கொடுக்கும். கற்பகவிருட்சம் போல்  அன்னையும் அப்பனும் அனைவருக்கும் கேட்பதைக் கொடுக்க வேண்டும். வந்த மக்கள் எல்லோரும் கேட்டதைத் தர வேண்டும்.

இந்தக் கோடை காலத்தில் அன்னை நல்ல மழையை தரத் வேண்டும்.  தண்ணீர்ப்

பஞ்சம் தீர வேண்டும்.  அனைத்து உயிர்களும் நலமாக இருக்க வேண்டும் மீனாட்சி கருணையில்.

                                                                 வாழ்க வளமுடன்.

======================================