சனி, 2 டிசம்பர், 2017

ஜோதி வழிபாடு, தீபத்திருநாள்

அண்ணாமலை உறை அண்ணா போற்றி!

கண்ணார் அமுதக் கடலே போற்றி!

அருட்பெருஞ்ஜோதி அருட்பெருஞ்சோதி
தனிப்பெருங்கருணை அருட்பெருஞ்சோதி


அக்னிஜுவாலை சொரூபமாகிய இறைவனை வழிபடும் நாள் கார்த்திகைத் தீபத்திருநாள்.  ஐசுவரியம், வீரம், தேஜஸ், செல்வம், ஞானம், வைராக்கியம் எனும்    ஆறுகுணங்களும்   ஆறுமுகங்களாய்  கார்த்திகைப்  பெண்களால்  வளர்க்கப்பட்ட முருகப் பெருமானை வணங்கும் நாளும் இந் நாளே.  கார்த்திகை நட்சத்திரத்தில் சரவணனை விரதமிருந்து  வணங்குவோர் நலம் பல பெற்று நற்கதி அடைவார்கள் என்று கந்த புராணம் சொல்கிறது.

அறிவை ஒளிக்கு உதாரணமாய் சொல்கிறார்கள். ‘சித்தமிசை குடி கொண்ட அறிவான தெய்வமே, தேஜோமய ஆனந்தமே!’ என்று தாயுமானவர் குறிப்பிடுகிறார்.

’அருளானோர்க்கு அகம்புறம் என்று உன்னாத
பூரண ஆனந்தமாகி இருள் தீர விலங்கு பொருள் யாது? அந்தப்
பொருளினை யாம் இறைஞ்சி நிற்பாம்.’

‘தூய அறிவான சுகரூப சோதிதன்பால்
தீயில் இரும்பென்னத் திகழுநாள்எந்நாளோ?’ 

என்றெல்லாம் தாயுமானவர் ஜோதிமயமான இறைவனைப் பாடுகிறார்.
காயத்ரீ மந்திரம் :-  நம்முடைய உயிராற்றலாகவும் துக்கத்தை அழிப்பதாகவும்  இன்பமே வடிவமாகவும் உள்ள சூரியனைப் போன்ற ஒளிமயமானதும், தன்னை விட மேலாக ஒன்றும் இல்லாததும். நம் பாபங்களை அழிக்கக் கூடியதுமான தெய்வீகப் பரம் பொருள் நமது அறிவை நல்வழியில் ஈடுபடுத்தட்டும்.’என்று இறைவனை ஒளிக்கடவுளாய் உணர்த்துகிறது.

’எவர் நம் அறிவைத் தூண்டி பிரகாசிக்கச் செய்கின்றாரோ அந்த ஜோதிமயமான இறைவனைத் தியானிப்போமாக’ என்று அந்த மந்திரம் கூறுகிறது.

அருணகிரிநாதர் திருப்புகழில் ’தீபமங்கள ஜோதி நமோ நம’ என்று 
முரு கனைப்பாடுகிறார். 

வள்ளலார் தீப வழிபாடு செய்தார். 

’ஏகாந்த மாகிய ஜோதி--என்னுள்
என்றும் பிரியா திருக்கின்ற ஜோதி
சாகாத வரந்தந்த ஜோதி--என்னைத்
தானாக்கிக் கொண்டதோர் சத்திய ஜோதி!

அருட்பெருஞ் ஜோதி! அருட்பெருஞ் ஜோதி!
அருட்பெருஞ் ஜோதி! அருட்பெருஞ் ஜோதி!

அருள் ஒளி என் தனி அறிவினில் விரிந்தே 
அருள் நெறி விளக்கெனும் அருட் பெருஞ் ஜோதி ’


’அருள் விளக்கே அருட்சுடரே அருட்சோதிச் சிவமே
அருள் அமுதே அருள் நிறைவே அருள் வடிவப் பொருளே
இருள்கடிந்தென் உளமுழுதும் இடங்கொண்ட பதியே
என் அறிவே என் உயிரே எனக்கினிய உறவே 
மருள் கடிந்த மாமணியே மாற்றறியாப் பொன்னே
மன்றில் நடம் புரிகின்ற மணவாளா எனக்கே 
தெருள் அளித்த திருவாளா ஞான உருவாளா
தெய்வநடத் தரசே நான் செய்மொழி ஏற்றருளே.’

என்று கூறி வள்ளலார் இறைவனை வழிபட்டார்

அறியாமை இருளைப் போக்கி அறிவு ஒளியைத்  தந்த இறைவா எனப் பாடுகிறார்.

கருங்குழியில் வீட்டில் ஒருநாள் இராமலிங்க அடிகள் எழுதிக் கொண்டு இருக்கும் போது விளக்கு மங்கவே, எண்ணெய்ச் செம்பென நினைத்துத்  தண்ணீர்ச் செம்பை எடுத்து விளக்கில்  ஊற்றினார். விளக்கு இரவு முழுவதும் நன்கு எரிந்தது. தண்ணீரில் விளக்கெரிந்த இந்த  அற்புதத்தை ஒரு பாடலில் குறிப்பிடுகிறார் வள்ளலார்.

அப்பாடல்:-:

’மெய் விளக்கே விளக்கல்லால் வேறுவிளக்கில்லை என்றார் மேலோர் நானும்
பொய்விளக்கே விளக்கென உட் பொங்கிவழி கின்றேன் ஓர் புதுமை அன்றே
செய்விளக்கும், புகழுடைய சென்னநகர் நண்பர்களே செப்பக் கேளீர்!
நெய்விளக்கே போன்றொருதண்ணீர் விளக்கும் எரிந்தது சந்நிதியின் முன்னே.’

அறுபத்து மூன்று நாயன்மார்களில்  ஒருவரான கணம்புல்லர் கார்த்திகை மாதம் கார்த்திகை நட்சத்திரத்தில் பிறந்ததால் தான் என்னமோ அவர் தான் பிறந்த இருக்குவேளூர் இறைவனுக்கு விளக்கெரித்துத் தொண்டு செய்தார்.வறுமை வந்த போதும் கணம்புல் என்னும் ஒருவகைப் புல்லை அறுத்து விலைக்கு விற்றுத் திருவிளக்கு ஏற்றி வந்தார்.ஒரு நாள் புல் விற்கவில்லை அதையே திருவிளக்குக்கு இட்டு எரிக்கமுற்பட,அதுவும் போதாமையால் தம் திருமுடியை விளக்கில் மடுத்து எரித்து மகிழ்ந்து இறைவனின் அருள் பெற்றார்.

நமி நந்தி அடிகள் என்னும் நாயனார் தண்ணீரில் விளக்கு எரித்து இருக்கிறார்.

மசூதியில் விளக்கேற்றி அது விடிய விடிய எரிவதைப் பார்ப்பதில் ஷீரடி சாய்பாபாவிற்கு மகிழ்ச்சி. அதற்காக பக்கத்தில் உள்ள இரண்டு கடைகளில் இலவசமாக எண்ணெய் பெற்று வந்தார். ஒருநாள் அந்த வியாபாரிகளின் எண்ணம் மாறியது. ‘நாம் இலவசமாக எண்ணெயைக் கொடுத்து பக்கிரி என்ன விளக்கேற்றுவது? இனி நாம் எண்ணெய் கொடுக்கக் கூடாது. எண்ணெய் இல்லை என்று சொல்லிவிடவேண்டும்’என்று அவர்கள் பேசி வைத்துக் கொண்டார்கள். வழக்கம் போல் எண்ணெய் வாங்கும் தகரக் குவளையை எடுத்துக் கொண்டு
பாபா அக் கடைகளுக்குப் போனார்.’ஒரு துளி எண்ணெய் கூட இல்லை. இனி மேல்தான் வர வேண்டும்’ என்று அந்த வியாபாரிகள் கூறினார்கள்.

பாபா கிணற்றடிக்குச் சென்று நீர் இறைத்து அந்த குவளையில் ஊற்றி நன்றாகக் கழுவினார். பின்,அதில் தண்ணீரை எடுத்துக் கொண்டு மசூதிக்குச் சென்றார். அந்த தண்ணீரை விளக்கில் ஊற்றி ஏற்றினார்.

முன்னிலும் பிரகாசமாய் விளக்கு எரிந்ததாய் சாயி சரிதம் கூறுகிறது. 

இசை மேதை தான்சேன் தன் இசையால் விளக்குகளை ஏற்றியதாக வரலாறு உள்ளது.


தீபத்திருநாள், 

தீபங்கள் ஒளி வீசும் நாள். கார்த்திகை மாதத்தில் மாலையில் சீக்கீரம் இருட்டி விடும். மாலை  நேரத்தில் வீட்டு வாசலில் இரண்டு விளக்கு வைத்து இருளை நீக்கினார்கள். மார்கழி மாதத்தில் அதிகாலை நேரத்தில் வாசலில் இரண்டு விளக்கு வைப்பார்கள். தை மாதம் பொங்கல் வரை விளக்கு வைப்பது தொடரும். தீப வழிபாடு இங்கு மிகவும் போற்றப் படுகிறது. 


சர்வாலய தீபம்:

சிவபெருமானின் சன்னதியில் இருந்த ஒரு விளக்கின் ஒளி குறைந்த போது,எண்ணெய் உண்ண வந்த ஒரு எலி தன்னை அறியாமல் திரியைத் தூண்டி,விளக்கை பிரகாசப்படுத்தியது. இந்த சிவ புண்ணியத்தால் அந்த எலி மறு பிறவியில் மாவலி (மகாபலி)சக்கரவர்த்தியாக, அந்த மாபலி சக்கரவர்த்தி சிவால யத்தில் ஒரு சமயம் செருக்குடன் வலம் வந்த போது அவன் மீது தீபம் விழுந்து உடம்பு புண்ணாகி வருந்தினான்.சிவபெருமான் அசரீரியாகி “நீ செருக்குற்றதால் இப்படி செய்தோம் இன்று முதல் எல்லா சிவாலயங்களிலும், இருள் சூழ்ந்த மற்ற இடங்களிலும் நீ தீபம் ஏற்றினால் சாயுச்சய பதவி அடைவாய்” என்று கூறினார். அவ்வாறு ஏற்றி வரும் போது, கார்த்திகை மாதம் வளர் பிறை கிருத்திகை நட்சத்திரத்தில் உக்கிர வடிவத்தில் சிவன் பேரொளியாகத் தோன்றினான். அஞ்சிய திருமால் முதலியோர் உக்கிரம் தணிய, பொரி, அவல் முதலியவற்றை நிவேதனம் செய்து வழிபட்டனர் என்று அபிதான சிந்தாமணி கூறுகிறது.

இந்த நிகழ்வை நினைவுகூரும் படியாக எப்போதும் திருக்கார்த்திகை விழாவாக மக்கள் கொண்டாடி வருகின்றனர்.பொரி அவல் முதலியவற்றைப் படைத்து வழிபடுகின்றனர்.இந்த கார்த்திகைத் திருவிழாவை 1000 ஆண்டுக்கு முன்பே கொண்டாடி இருக்கின்றனர்.திருஞானசம்பந்தர் எலும்பிலிருந்து பூம்பாவையை மீண்டும் பெண்ணாக்கிய போது ’விளக்கீடு காணாது போதியோ பூம்பாவாய்’ என்று பாடினார்.அந்தக் காலத்தில் கார்த்திகை தீப விழாவை விளக்கீடு என்று வழங்கினார்கள்.




விஷ்ணுதீபம் :-



விஷ்ணு ஆலயங்களில் இவ் விழா நடப்பதற்கு காரணம் விரதமகாத்மியத்தில் பின் வருமாறு கூறப்படுகிறது: திருமகள் ஒரு அசுரனுக்கு பயந்து ஒரு காட்டில் ஒளிந்து இருக்க அவ் அசுரன் அக் காட்டை கொளுத்தினானாம் அப்போது திருமகள் அந்தரத்தில் சென்று மறைந்தாளாம் அதனை நினவுபடுத்தும் வகையில் தீ ஏற்றுவார்கள்.



ஒளி படும் இடங்களிலெல்லாம் மகாலட்சுமி தேடி வந்து நின்று அருள் புரிவாள்.அந்த வீட்டில் லட்சுமி கடாட்சம் ஏற்படும் என்று கூறப்படுகிறது.



கார்த்திகை விரதம்:

முருகனைக் குறித்து மேற்கொள்கின்ற விரதங்களில் கார்த்திகை விரதமும் ஒன்றாகும். பரணி நாளில் முருகனின் பெருமையை கேட்டுக் கொண்டும் பாடிக்கொண்டும் இருந்து, மறுநாள் முருகனை வழிபடுவது இந்த விரதமாகும்.கார்த்திகைப் பெண்கள் ஆறு பேரும் முருகக் கடவுளுக்குப் பாலூட்டி விரத பலத்தை அடைந்ததை இவ் விரதம் குறிக்கும்.

விளக்கு வழிபாட்டின் பயன்:



கள்ளன் அறிவூடுமே மெள்ள மெ(ள்)ள வெளியாய்க்
கலக்க வரு நல்ல உறவே.
-தாயுமானவர்

விளக்கு எரியும் வீட்டுக்குள் திருடர் புகத்துணியார். மனத்தினுள்ளே தெய்வத்தின் ஞான விளக்கேற்றி வைத்திருக்கும் பொழுது புல்லிய எண்ணங்கள் என்ற கள்ளர் புகுவதில்லை. 

கார்த்திகை விளக்கேற்றி இறையருள் பெறுவோம்.
அக இருளை விலக்கி அங்கு ஒளி பொருந்திய இறைவனைக் குடியேற்றினால் வாழ்வில் வளம் பெருகும்.




 எல்லோருக்கும் தீபத்திருநாள் வாழ்த்துக்கள் !

எல்லோருக்கும் கார்த்திகைத் திருநாள் வாழ்த்துக்கள் !
                                                                     வாழ்க வளமுடன் !


=========================================================================

35 கருத்துகள்:

  1. படங்களும் விளக்கங்களும் நன்று.
    தீபப்திருநாள் வாழ்ய்துகள்.

    பதிலளிநீக்கு
  2. நண்பர்கள் அனைவருக்கும் தீபத் திருநாள் வாழ்த்துகள்.

    பதிலளிநீக்கு
  3. அறியாத பல தகவல்கள். பகிர்வுக்கு நன்றி.

    கார்த்திகைத் திருநாள் வாழ்த்துகள்!

    பதிலளிநீக்கு
  4. வணக்கம் தேவகோட்டை ஜி, வாழ்க வளமுடன்.
    உங்கள் வாழ்த்துக்கும், கருத்துக்கும் நன்றி.

    பதிலளிநீக்கு
  5. வணக்கம் ஸ்ரீராம், வாழ்க வளமுடன்.
    வாழ்த்துக்கு நன்றி.

    பதிலளிநீக்கு
  6. வணக்கம் ராஜி, வாழ்க வளமுடன்.
    கருத்துக்கு நன்றி.

    பதிலளிநீக்கு
  7. வணக்கம் ராமலக்ஷ்மி, வாழ்க வளமுடன்.
    உங்கள் கருத்துக்கும், வாழ்த்துக்களுக்கும் நன்றி.

    பதிலளிநீக்கு
  8. ஜோதிப் பிழம்பாய் அந்த அகல் விளக்குக் கூட்ட படம் அற்புதம்..

    தீபத் திருநாள் வாழ்த்துக்கள்..

    பதிலளிநீக்கு
  9. வணக்கம் ஜீவி சார், வாழ்க வளமுடன்
    உங்கள் கருத்துக்கும் வாழ்த்துக்களுக்கும் நன்றி.

    பதிலளிநீக்கு
  10. நேற்று கார்த்திகை தீபங்களை வீட்டில் ஏற்றினோம். திருவண்ணாமலையின் தீப ஒளியை தொலைக்காட்சியில் நேரலையில் பார்த்தோம். அனைத்து நிலையிலும் பெருமைப்படவைக்கின்ற தொடர்புடைய செய்திகளை அறிந்தோம்.

    பதிலளிநீக்கு
  11. அழகிய படங்களுடன் மேலதிகமான செய்திகள்..

    இனியதொரு தரிசனம்..
    அனைவருக்கும் தீபத் திருநாள் நல்வாழ்த்துகள்!..

    பதிலளிநீக்கு
  12. அழகிய படங்களுடன்....


    சிறப்பான பல பல தகவல்கள் ...மிக நன்று

    பதிலளிநீக்கு
  13. ஆதியில் இருந்த சூரிய வழிபாடு வாழ்க்கைக்குதேவையான எல்லாப் பொருளையும் வணங்க வைத்தது தீ நீர் காற்று போன்றவை அத்தியாவசியம் வாழ்க்கைக்கு அவையே பலசொரூபங்களில் வழிபட வைக்கிறது வாக வளமுடன்

    பதிலளிநீக்கு
  14. தீபத் திருநாள் வாழ்த்துக்கள். எல்லாச் செய்திகளையும் கோர்த்த நீங்கள், கார்த்திகைக்குச் செய்யும் ஸ்பெஷல் உணவுகளைப்பற்றியும் கோடிகாண்பித்திருக்கலாம்.

    பதிலளிநீக்கு
  15. தீப வழிபாட்டின் ஒட்டு மொத்த தகவல்களையும் தொகுப்பாக பதிவில் பார்க்கும் போது ஏனோ மறைந்த இராஜ இராஜேஸ்வரி பதிவர் நினைவில் துளிர்க்கிறார்.

    பிரகாசமான தகவல்கள்... வாழ்த்துக்களும் நன்றியும் சகோ...

    பதிலளிநீக்கு
  16. தீபத் திருநாள் வாழ்த்துகள் அனைவருக்கும்.

    எத்தனை வகையான விளக்கங்கள்.!!! எத்தனை சிறப்பான தகவல்கள். விளக்கங்கள். புதிது மஹாபலிச்சக்கரவர்த்திக் கதை.

    மிக்க நன்றி கோமதிக்கா.

    கீதா

    பதிலளிநீக்கு
  17. வணக்கம் சகோ கரந்தைஜெயக்குமார், வாழ்க வளமுடன்.
    உங்கள் கருத்துக்கும், வாழ்த்துக்கும் நன்றி.

    பதிலளிநீக்கு
  18. வணக்கம் ஜம்புலிங்கம் சார், வாழ்க வளமுடன்.
    உங்கள் கருத்துக்களுக்கு நன்றி.

    பதிலளிநீக்கு
  19. வணக்கம் சகோ துரைசெல்வராஜூ, வாழ்க வளமுடன்.
    உங்கள் கருத்துக்கும், வாழ்த்துக்களுக்கும் நன்றி.

    பதிலளிநீக்கு
  20. வணக்கம் அனுராதா பிரேம்குமார், வாழ்க வளமுடன்.
    உங்கள் கருத்துக்கு நன்றி.

    பதிலளிநீக்கு
  21. வணக்கம் பாலசுப்பிரமணியம் சார், வாழ்க வளமுடன்.
    நீங்கள் சொன்னது சரிதான். முதலில் மனிதன் இயற்கையை தானே வணங்கினான்!
    பஞ்சபூத வழிபாடு பிருத்வி, அப்பு, தேயு, வாயு, ஆகாசம் என்று சொல்லபடும் நிலம், நீர், நெருப்பு, காற்று, விண் ஐந்து தத்துவங்களை வணங்கினார்கள்.

    அப்புறம் தானே மற்ற வழிபாடுகள் வந்தன.

    உங்கள் கருத்துக்கு நன்றி.

    பதிலளிநீக்கு
  22. வணக்கம் நெல்லை தமிழன், வாழ்க வளமுடன்.
    கார்த்திகை விரதமும் அம்மாவும் என்ற பதிவில் கார்த்திகை அன்று செய்யும் ஸ்பெஷல் உணவுகளைப் பற்றி சொல்லி இருக்கிறேன்.

    அடை, அப்பம்,அவல்பொரி, நெல்பொரி, அரிசி பொரி உருண்டைகள், உப்பில்லா கொழுகட்டை,( சின்ன் சின்னதாக கொழுகட்டை செய்து தேங்க்காய்பூ மட்டும் போட்டு செய்வோம்.) மாவிளக்கும் உண்டு.
    27 நடசத்திரங்க்களை குறிக்க 27 விளக்கு கொழுகட்டை செய்து அதை ஏற்றுவோம். நடுவில் உள்ள விளக்கிற்கு மட்டும் அடியில் தட்டு உண்டு.

    இங்கு ஊருலிருந்து கொண்டு வந்த அவல்பொரி, மாவிளக்கு மட்டும் செய்து கும்பிட்டு விட்டோம்.

    இந்த பதிவும் மீள்பதிவு பேரனுடன் நேரம் போகிறது. பின்னூட்டங்க்களுக்கு கருத்து உடனே போட முடியவில்லை. நேர வித்தியாசம் வேறு ஒரு காரணம்.

    உங்கள் கருத்துக்கும், வாழ்த்துக்களுக்கும் நன்றி.

    பதிலளிநீக்கு
  23. வணக்கம் நிலாமகள், வாழ்க வளமுடன்.
    விழாக்கள், பண்டிகைகள் வரும் போது திருமதி. இராஜராஜேஸ்வரி அவர்களை நினைக்காமல் இருக்க முடியாது.
    தினம் ஒரு பதிவு என்று வியக்க வைத்தவர்.
    செய்திகள் சேகரிப்பு, படங்கள் என்று அருமையான பதிவுகளை கொடுத்தவர்.

    உங்கள் கருத்துக்கும், வாழ்த்துக்களுக்கும் நன்றி.

    பதிலளிநீக்கு
  24. வணக்கம் கீதா, வாழ்க வளமுடன்.
    உங்கள் கருத்துக்கும், வாழ்த்துக்களுக்கும் நன்றி.

    பதிலளிநீக்கு

  25. கார்த்திகையன்று சிறப்பான பதிவு.
    குறிப்பிட்டிருக்கும் விஷயங்கள், பாடல்கள் ப்ரமாதம். பலவற்றை முதன்முதலாய்ப் படித்தேன் - குறிப்பாக தாயுமானவர் ஸ்வாமிகள்.

    பதிலளிநீக்கு
  26. அருமையான பதிவு. அடிக்கடி திருவண்ணாமலை சென்று அண்ணாமலையாரை தரிசிக்கும் வழக்கமுண்டு. ஸ்மரணாத் அருணாசலம். நினைத்தாலே முக்தி கொடுக்கும் திருவண்ணாமலை. அழகான தொகுப்பு. அன்புடன்

    பதிலளிநீக்கு
  27. திருக்கார்த்திகை தீபப் பதிவும் விளக்கங்களும் அருமை! திருக்கார்த்திகை அன்று மாவிளக்குப் போடுவது பற்றி இப்போத் தான் தெரியும்! இலங்கையில் இருக்கும் மயூரகிரி சர்மா அவர்களும் இது பற்றி மாவிளக்கையே அகல் போல் செய்து விளக்கு ஏற்றுவதைப் படம் எடுத்துப் போட்டிருந்தார். இலங்கையில் அப்படி வழக்கம்னு நினைச்சேன். நீங்களும் சொல்லி இருக்கீங்க. நன்றி.

    பதிலளிநீக்கு
  28. வணக்கம் சகோ ஏகாந்தன், வாழ்க வளமுடன்.
    உங்கள் வரவுக்கும் கருத்தும் நன்றி.

    பதிலளிநீக்கு
  29. வணக்கம் காமாட்சி அக்கா, வாழ்க வளமுடன்.
    அடிக்கடி திருவண்ணாமலை தரிசனம் செய்வீர்களா? கேட்கவே மகிழ்ச்சியாக இருக்கிறது.
    உங்கள் அன்பான கருத்துக்கு நன்றி.

    பதிலளிநீக்கு
  30. வணக்கம் கீதா சாம்பசிவம், வாழ்க வளமுடன்.
    ஒவ்வொரு கார்த்திகை சோமவாரமும் விரதம் இருந்து மாவிளக்கு மாலையில் செய்து வழிபட்டு விரதம் முடிப்போம்.

    திருக்கார்த்திகை அன்று மாவிளக்கும்,
    மாவால் செய்யும் விளக்கும் உண்டு.
    அம்மாவீட்டு பழக்கம். மாமியார் வீட்டில் மாவால் செய்யும் அகல்விளக்கு செய்யமாட்டார்கள்.
    உப்பில்லா கொழுகட்டையும், மாவிளக்கும் , பொரி உருண்டை மட்டும் உண்டு.

    உங்கள் கருத்துக்கு நன்றி.

    பதிலளிநீக்கு
  31. அருமையான விளக்கமும் படங்களும். இப்போ பிள்ளையார்கதை விரதம் ஆரம்பமாகி இருக்கெல்லோ இதன் முடிவுக்கும் சிலர் ஊரில் மாவிளக்குப் போடுவார்கள் என நினைக்கிறேன்.

    பதிலளிநீக்கு
  32. வணக்கம் அதிரா, வாழ்க வளமுடன்.
    ஆமாம், நானும் கேள்வி பட்டு இருக்கிறேன்.
    பிள்ளையார் நோன்பு என்று நகரத்தார் கொண்டாடுவார்கள்.
    உங்கள் கருத்துக்கு நன்றி.

    பதிலளிநீக்கு