பனிச்சிற்பங்கள்

பனி மழை  பொழிகிறது  பதிவில்  அடுத்த நாள் பனியில் சிற்பங்கள் செய்து மகிழ்ந்தோம் வேறு ஒரு இடத்தில். அது இன்னொரு பதிவில், என்று சொல்லி இருந்தேன். இந்த பதிவில் பனிச்சிற்பங்கள் செய்த காட்சிகள்.

மரத்திற்கு அருகே வரை நடந்து போக வெகு நேரம் ஆனது எனக்கும், மருமகளின் அம்மாவுக்கும் கடற்கரை மணலில் கால் புதைய புதைய நடப்பது போல இருந்தது. "இங்கு பயம் இல்லை அதனால் மெதுவாக நடந்து வாங்க" என்று சொல்லி அவர்கள் முன்னால் நடந்து சென்றார்கள். , நாங்கள் மெதுவாக அவர்களை தொடர்ந்து நடத்தோம்.

மகன் செய்ய ஆரம்பித்து விட்டான்

மகன் செய்த சாய்பாபா

நானும், மகனும் செய்த பனிச்சிற்பங்கள்

என் கால்கள்  பனியில் புதைந்து இருக்கிறது,  மருமகள் படம் எடுக்க வசதியாக நகர்ந்து  நின்ற போது  இடது கால் நல்ல ஆழமாக பனிக்குள் சிக்கி கொண்டது, மகன் வந்து கை கொடுத்து தூக்கி விட்டான்.

நான் செய்த கேதாரநாத்  

 

மகன்  ஏதாவது செய்யுங்க என்றான், மனதில் ஒன்றும் நினைக்காமல் செய்ய ஆரம்பித்தேன், முடிந்தவுடன்  எனக்கு கேதாரநாத் இறைவனை நினைவுக்கு கொண்டு வந்தது. நாங்கள் கேதார்நாத் போன நினைவுகள் மனதில் வந்து போனது. திருகேதார்நாத் தலப்பயணம்-7 உங்களுக்கும் நேரம் இருந்தால் படித்து பாருங்கள், படங்கள் கொஞ்சம் தான் போட்டு இருக்கிறேன், முன்பு இருந்தவை இப்போது இல்லை வெள்ளம்  கோவிலின் வெளிச்சுற்றில் இருந்தவற்றை எல்லாம் அடித்து சென்று விட்டது. பழைய கேதார்நாத் கோவிலை பார்க்கலாம்.

கேதாரநாத்

பேரன் தன் விளையாட்டு பொம்மைகளை வைத்து கதை காணொளி செய்தான்,  கையில் கரடி பொம்மை வைத்து இருப்பது கவின், புத்தகம் வைத்து கொண்டு இருப்பது அவன் ஆச்சி கோமதி அரசு, அடுத்த மூன்று பாத்திரங்கள் ஹாரிபாட்டர் கதை பாத்திரங்கள், பின்னால் அலாவுதீனும் அற்புதவிளக்கும்  கதை பாத்திரம் அலாவுதீன், பூதம்சீனி .

கார்  புதைந்து இருக்கிறது இரண்டு படங்களும் பேரன் தன் ஐபேடில் எடுத்த படம்

கதை உருவாகி கொண்டு இருக்கிறது

மருமகள் செய்த மிக்கி

மருமகளின் அம்மா செய்த  பனி மனிதன்

சூரியன்  எட்டிப்பார்த்தார், ஆனால் அவர் வெப்பம் தரவில்லை

மரங்களுக்கு நடுவில் பனி மனிதன் செய்து போய் இருக்கிறார்கள். எத்தனை எத்தனை கால் தடங்கள்!

கழுகாரும் காக்காவும் பறந்து கொண்டே இருந்தது போட்டோ எடுக்கும் போது கழுகார் மட்டும் சிக்கினார். நீலவானில் பறப்பது அழகு.

இரண்டு  நாள் பொழுது பனிமழையை ரசித்து எங்கும் பனியை கண்டு மகிழ்ந்தோம்.

பல நாடுகளில் , இந்த பனிச் சிற்ப திருவிழா நடந்தாலும் சீனாவில் குளிர் பிரதேசமான "ஹார்பின் நகரில்" பனிச்சிற்பம் விழாவில் உலக அதியங்களை செய்வார்களாம், அதிலும் காதலர்கள் எப்போதும் செய்வது தாஜ்மகால் சிற்பம்தானாம்.  தாஜ்மகால் செய்து அதன் முன் ஜோடியாக நின்று படம் எடுத்து கொள்வார்களாம். இந்த செய்தியை படிக்கும் போது  நமக்கு பெருமைதான் இல்லையா!

 முட்டையிட்டு அடைகாக்கும்  கழுகை  நேரடி ஒளிபரப்பாக  பார்த்து கொண்டு இருக்கிறேன்.  அவை படும் பாடு சொல்லி முடியாது,  பனி விழுந்து மூடுகிறது.  ஆண், பறவையும், பெண்பறவையும் மாறி மாறி அடைகாக்கிறது, உணவு தேடி வந்து தன் இணைப்பறவையை அழைத்து நீ கொஞ்சம், நான் கொஞ்சம் என்று உண்ணும் காட்சி கண்ணில் நீர் வரவழைக்கிறது. ஒரு நாள் காகம்,  அடுத்த நாள் பக்கத்து ஏரியிலிருந்து மீன்  அதற்கு உணவு  கிடைத்தது. 

நல்லபடியாக குஞ்சு பொரித்து மகிழ்ச்சியாக பறப்பதை பார்க்க வேண்டும்.

 

வாழ்க வையகம் வாழ்க வையகம்! வாழ்க வளமுடன்!

-------------------------------------------------------------------------------------------------