தஞ்சை பெரிய கோவில் பகுதி - 2

தஞ்சை பெரிய கோவிலுக்கு  2022  டிசம்பர் மாதம் 11 ம் தேதி போய் இருந்தோம். அப்போது நான் எடுத்த படங்கள் தொடர் பதிவாக இடம் பெறுகிறது.

தஞ்சை பெரிய கோவில்  முந்திய பதிவு

நந்தியை பக்கத்தில் போய் பார்க்கவில்லை, கீழ் இருந்தே  எடுத்தேன், கூட்டத்தைப் பார்த்து விட்டு மேலே போகவில்லை.

அப்போது தொடர் பயணத்தால் கால் வலி வேறு.

நந்தி மண்டபத்தில் மேல் விதானத்தில் ஓவியங்கள் அழகாய் இருக்கும் போய் இருந்தால் நன்றாக எடுத்து இருக்கலாம். ஒரளவு தெரிகிறது. கொடிமரத்தை தாங்கும் மனிதர்களும், யானைகளும் அழகு.

மூலவரை பார்க்கவில்லை,  இவரை வணங்கி கொண்டேன்

"சிவபாத சேகரன்" என்று பட்ட பெயர் பெற்ற இராஜ ராஜன் வணங்கியது 

நால்வர்

மூவர் பாடிய தேவாரத்தை புற்றிலிருந்து இராஜ ராஜன்  மீட்டு கொடுத்து  "திருமுறை கண்ட சோழன்" என்ற பட்ட பெயர்பெற்றது   நினைவுக்கு வரும்.

அருங்காட்சியகம்  இருக்கும் இந்த கட்டிடத்தில் முன்பு பார்த்து இருக்கிறோம். அன்று திறக்கவில்லை.

ஒருவர் நிம்மதியாக அமர்ந்து படிக்கிறார், இருவர் நிம்மதியாக தூக்கம்

இந்திரன்

சந்திரன்

ஒரு கை உடைந்து  இருக்கிறது, இன்னொரு கையில் ஓலைச்சுவடி கலைமகள் என்று நினைக்கிறேன்

துர்க்கை

குழந்தையை ஒரு கையில் தூக்கி விளையாட்டு காட்டுகிறார், பயமில்லாமல் குழந்தையின் அம்மா படம் எடுக்கிறார், எனக்குத்தான்  மனம் திக், திக் என்றது.

இந்த வாசல் வழியாக மூலவரை பார்க்க மக்கள் கூட்டம் போனது நானும் போய் பார்க்கலாம் என்று படிகளில் ஏறி போனால் பெண் காவலர் விட மாட்டேன் என்றார், இந்த வழியாக மக்கள் போனதை பார்த்து நான் வந்தேன் என்றேன், அவர்கள் எல்லாம் வி.ஐ.பி  க்கள் என்றார்.

சுப்பிரமணியர்  வள்ளி தெய்வானையுடன் இருக்கும் சன்னதி.

சுப்பிரமணியர் சன்னதிக்கு போகும் படி பக்கவாட்டில் இருக்கும்     ஆறுமுகர்

யானை சிலை  பல தூண்டுகளாக செய்து இணக்கப்பட்டு இருக்கிறது. கயிறு  மேலே உடகார்ந்து இருப்பவர்,  யானை துதிக்கையால் ஒருவரை இழுத்து போவது எல்லாம்  மிக  அற்புதமாய் இருக்கிறது, யானையின் கழுத்தில் காலில் அணிகலன்கள் எல்லாம் அழகு.

யானையின்  துதிக்கையில் அவரின் கை, கீழே அவரின் கழுத்து தொங்கல் எல்லாம் அருமை.  இன்னொருவரும்  கீழே இருக்கிறார்

மண்டபத்தை குதிரை  இழுப்பது போல

குதிரையின் பற்கள்,  கடிவாளம் , கழுத்துமணிகள்  எல்லாம் அழகு குதிரை பல கல் துண்டுகள் இணைப்புதான்

குதிரையும் அழகிய வேலைப்பாடு

படிக்கட்டுக்கு இந்த பக்க யானை தந்தம் உடைந்து இருக்கிறது, துதிக்கையில் ஒருவர், அதற்கு கீழ் ஒரு குதிரை, குதிரையின் காலடியில் ஒருவர் இருக்கிறார், யானையின் வால், அணிகலன்கள் , கழுத்து மணி எல்லாம் அழகு.

முருகன் சன்னதி பக்கசுவரில் உள்ள தூண்கள் பன்னீர் செம்பு போல அதன் தலைபகுதியில் சின்ன கோபுரம் அதில் ஒரு பக்கம் பிள்ளையார், இன்னொரு பக்கம் நடராஜர் ! தூண்களில் எத்தனை நுணுக்கமான வேலைப்பாடுகள்!  சிற்பிகளை வணங்க வேண்டும். 

கற்கோயில் என்போமோ! கலைக்கோயில் என்போமோ! என்று போன பதிவில் புலவர் பாடிய பாடல் பகிர்வு  நினைவுக்கு வந்தது., கலைக்கோவில்தான்.

 சும்ப , நிசுமனுடன் போர்புரியும் தேவி துர்க்கை

மகிஷ வதம், ஆடைகள் பறக்குது, மூக்கு சேதம் அடைந்து  இருக்கிறது

துர்க்கை

முருகனின் இரண்டு கைகளும்  உடைந்து இருக்கு

முருகன் சன்னதியில் இன்னொரு பக்கத்தில் உள்ள  படியில் யானை

பெரிய கோபுரத்தின் பின் இருப்பது கருவூரார் சன்னதி . சன்னதிக்கு பின் புறம் இருக்கும் வேப்ப மரத்தில்  மரத்தில் மூன்று  மரபல்லிகள் இருக்கும் . பல்லிகளை தேடிப் பார்ப்பது கோவில்  போகும் போது எல்லாம் வாடிக்கை. ஆனால் இந்த முறை கண்ணில் தட்டுப்படவில்லை.  மரத்தின் பட்டை போலவே  பல்லியின்  உடல் இருக்கும், அதன் கண் மற்றும்  அசைவு வைத்து தான் கண்டுபிடிக்க முடியும். சில நேரம் சத்தம் கொடுக்கும். கூட்டம் இருந்ததால் மரத்தில் ஒளிந்து கொண்டது போல. மகன் மரத்தை குளோஸ் அப்பில்  நிறைய போட்டோ எடுத்தான்,

  பல்லி தெரிகிறதா என்று பார்க்க  தெரியவில்லை.

இராஜ ராஜ சோழரின் நண்பர் என்று நாம் சினிமாவில் பார்த்து இருப்போம். மன்னருக்கு நிறைய ஆலோசனைகள் சொல்வார்.

சதய திருநாளில் மன்னருக்கு  பிறந்தநாள் வாழ்த்து சொல்ல கருவூரார் வரும் போது மன்னர் சொல்வார்  சில நாட்களுக்கு முன் கருவறையில் லிங்கத்தை பிரதிஷ்டை செய்யமுடியாமல் அவதிபட்டபோது தாங்கள் வந்து உதவினீர்கள் என்ற வசனம் வரும்.  பாடல் கேட்டு பல வருடம் ஆச்சு, இப்போது பாடுங்கள் கேட்கலாம் என்று சொல்லி விட்டு அவர் சொல்வார். அதை பாடுவார் கருவூரார்.

https://www.youtube.com/watch?v=q09dYjrH2LU&t=2s

சிவாஜியும்  டி.ஆர் . மகாலிங்கமும் பாடும் பாடல் நன்றாக இருக்கும். கேட்டு பாருங்கள்.

இருவரும் நிற்பது போல ஓவியம் கோவிலில் இருக்கிறது. 

 பெருவுடையாருக்கு அஷ்டபந்தன மருந்து சாத்திய போது மருந்து  சரியாக இறுகவில்லை . அதை கேள்வி பட்ட   கருவூர் சித்தரின் குரு போகமுனிவரின் அழைப்பின் பேரில் தஞ்சை வந்தார் கருவூர் சித்தர்.

 வந்து அஷ்டபந்தனமருந்தை இறைவனை வேண்டி வைத்தார். மருந்தை இறுகும்படி செய்து அரசனின் கவலையை போக்கினார் என்று சொல்லுவார்கள். சித்தர் சக்தி வாய்ந்தவர். கருவூரார் பெருமையை மக்களுக்கு உணர்த்தவே பெருவுடையார் இப்படி லீலை செய்தார் என்றும் சொல்லபடுகிறது, நிறைய சித்துக்கள் செய்வராம் மக்களை ஆன்மீகத்திற்கு கொண்டுவர.  அதில் வெறுப்பு ஏறபட்ட மக்கள் அவரை கொலைசெய்யவும் துணிந்து விட்டார்களாம், இனிமேல் இவர்கள் மத்தியில் வாழ வேண்டாம் என்று கருவூர் ஆனிலையப்பர் கோவிலுக்குள் சென்று லிங்கத்தை தழுவி  இறைவனுடன் இரண்டற கலந்தாராம்.

அவரின் மறைவுக்கு பின் அவரின் பெருமைகள் மக்களுக்கு தெரிந்து இருக்கிறது.

மேலும் கருவூர் சித்தர்  எழுதிய நூல்கள், அவர் வாழ்ந்த காலம், அவர் செய்த சித்துகள்   விவரம் எல்லாம்    தினமலர்  கோவில்கள் பகுதியில்.

கருவூரார் சன்னதி  சிறிது நேரம் அமர்ந்து தியானம் செய்தேன்

கருவூரார் சன்னதியில் அமர்ந்து இருந்தாலே மன அமைதியும் நிம்மதியும் கிடைக்கும். 

தேங்கி நிற்கும் மழை நீரில் கோபுரம் தெரிந்தது , எனக்கு அதை படம் எடுக்க ஆசை

தரையில் தேங்கி இருக்கும்  மழை நீரில் தெரிகிறதா கோபுரம்? என்னால் ஓரளவுதான் எடுக்க முடிந்தது.

தண்ணீரில் கிடக்கும் வெள்ளை புறாவின்  இறக்கைகள் கொஞ்சம் மறைக்கிறது.

 பல வருடங்களுக்கு முன்பு கோபுரத்தின்  உட்பக்கம் பார்க்க அழைத்து சென்று இருக்கிறார்கள் சாரின் அண்ணா.  சிறப்பு விருந்தினராக அவர்கள் மதிக்கப்பட்ட காலம் அது. இப்போது எந்த சிறப்பு விருந்தினருக்கும் அனுமதி இல்லை  . உள்ளே மாரட்டிய ஓவியம் மற்றும்  நாட்டிய சிற்பங்கள் இருந்தன. கோபுரம் உட்பக்கம் பார்க்க அழகாய் இருந்தது. பல வருடங்களுக்கு முன் பார்த்தது இப்போது சரியாக சொல்லமுடியவில்லை. 1975 ம் வருடம்  என்று நினைக்கிறேன்.

தூரத்தில் தெரிவது சண்டிகேஸ்வரர் சன்னதி

மகன்

வராகி சன்னதிக்கு பின்னால் உள்ள இடத்தில் பீரங்கி தரையில் வைத்து இருக்கிறார்கள் கல் ஆசனங்கள் இருக்கிறது.

வராகி அம்மனை பார்க்க முடியவில்லை திரையிட்டு மறைத்து இருந்தார்கள். எப்போது அலங்காரமாக கம்பி கதவு வழியாக பார்க்கலாம் . சிறப்பு பூஜைகள் எப்போதும் நடந்து கொண்டு இருக்கும். மதிய  நேரம் போனதால் நடை திறக்கவில்லை.

இப்படி கோவிலை சுற்றி உள்ள மண்டப வாயில்களில் நின்று பெரிய கோபுரத்தை படம் எடுத்தான். மகன் எடுத்த படங்களை ஒரு பதிவில் போட வேண்டும். அவன் பார்வை வேறு. அவன் ஐபோனில் மேலும் பல வசதிகள் உள்ளது. மகனுக்கு படம் எடுக்கும் திறமையும் அதிகம்.

நான் எனக்கு எடுக்க தெரிந்த மாதிரி என் ஐபோனில்  எடுத்தேன்.

நடை திறக்கும் வரை மக்கள் புல்வெளியில் ஆடி, பாடி, உரையாடி மகிழ்ந்து இருக்கிறார்கள்.

பின் பக்கம் ஒரு பெண் பரதநாட்டியம் ஆடி கொண்டு இருக்கிறார், முன்னால் நிற்கும்  சின்னக்குழந்தைக்கும் ஆட ஆசை வந்து விட்டது

உடனே குழந்தை சினிமா பாடலுக்கு நடனம் ஆடுகிறாள் அம்மா காணொளி எடுக்கிறார். பின் பக்கம் சுவர் முழுவதும் கல்வெட்டுதான்.

"சோழர் வரலாறு" என்ற புத்தகம் படித்து பார்த்தேன். ஆசிரியர் . டாக்டர் மா. இராசமாணிக்கனார்  எழுதியது. மகன் கொடுத்தான் படித்துபார்க்க  படித்தேன்.

 தமிழ்நாட்டில் வியத்தகு  முறையில் கற்கோவில்கள் பலவற்றை அமைத்த பெருமை சோழர்க்கே உரியது.வானளாவிய விமானங்கொண்டகோவில்களை கட்ட ஆசைபட்டு அப்படியே கட்டினர்கள் என்றும், கோவில் சுவர்கள், தரையில், ஏராளமான கல்வெட்டுக்கள் வெட்டப்பட்டன என்றும்உள்ளது.

மேலே உள்ள  படத்தை பெரிது செய்து பார்த்தால் உண்மை என்று விளங்கும் . சுவர்  மற்றும் கீழ் பகுதி , தரை எல்லாம் கல்வெட்டுதான். சோழர் பெருமையை அறிந்து கொள்ள அவர்கள் கட்டிய கோவில்கள், அவர்கள் கற்கோவில்களாக மாற்றி அமைத்த கோவில்கள் மூலம் அறிந்து கொள்ள முடிகிறது.

வெளி வாசல் தோட்டம்

இந்த குழந்தை வெளி வாசல் பக்கம் முதல் கோவிலை சுற்றி பார்த்து முடிக்கும் வரை என்னை கவர்ந்தாள். அவள் குறும்பு, சிரிப்பு நடனம், என்று மனதை கவர்ந்து விட்டாள்.

அம்மன் சன்னதி வாசல் தூணில் சுவற்றில் உள்ள சிற்பங்கள். மார்கழி தனூர் பூஜை கலந்து கொள்ள கட்டண பலகை.

தஞ்சையில் அம்மன் சன்னதி வாயில் பகுதியில் வலபக்கம் சுவரில்  இருக்கிறது இந்த அற்புத சிலை.

திருப்பழையாறு வட தளியிலிருந்து பட்டீஸ்வரம் கோவில் அருகில் அமைந்து இருக்கும் " திருச்சக்தி முற்றம்" கோவிலில் அன்னை இப்படி சிவனை  தழுவி இருப்பார் .

சக்தி காவிரிக்கரையில் லிங்கம் செய்து வழிபட்டுக் கொண்டு இருக்கும் போது காவிரி ஆற்றில் வெள்ளம் வந்தது, அப்போது  லிங்கத்தை அடித்து சென்றுவிடாது இருக்க இப்படி ஆரத்தழுவியதாக தலவரலாறு சொல்லும்.   மேலும் சக்தியை  சோதிக்க ஜோதிபிழம்பாய் சிவன்  காட்சி கொடுத்தார் என்றும் அதையும் சிவனே என்று தழுவி முத்தமிட்டதால் "சக்திமுத்தம்" "சக்திமுற்றமாக ஆச்சு" என்றும் சொல்வார்கள். கருவறை பக்கம்  ஆரதழுவிய சக்தி சிலையைப்பார்க்கலாம்.

சிவன் பேர்  சிவக்கொழுந்தீசர், அம்மன் பேர் பெரியநாயகி.

நிறைய தடவை மாயவரத்தில் இருக்கும் போது போய் இருக்கிறோம்.

 செம்பியன்மாதேவி செங்கற்களால் கட்டபட்டிருந்த சக்தி முற்ற கோவிலை கற்கோவிலாக மாற்றி கட்டினார் என்றும், முதலாம் ராஜ ராஜ சோழன் காலத்தில் கட்டியகோவில் என்றும் வரலாறு சொல்லும்.

 கடைசியில் அம்மன் சன்னதிக்கு சென்றோம்.  அன்னை பெரியநாயகியை நன்றாக வெகு நேரம் வணங்க முடிந்தது. யாரும் நம்மை போக சொல்லவில்லை. நல்ல அலங்கரமாக இருந்தார்.

மூலவர் பெருவுடையாரை பார்க்கவில்லையே என்ற மனக்குறை நீங்கியது.அன்னைதான் இறைவனின் சரிபாதி ஆயிற்றே!  அன்னையை மனதார வேண்டி மனநிறைவு பெற்றோம்.

https://www.youtube.com/watch?v=5DhrsSQ-2aY&t=2s

தமிழில் முதல் சினிமாஸ்கோப் திரைப்படம்

ஏ.பி நாகராஜன்  இயக்கத்தில் பாடல் காட்சி அற்புதமாக இருக்கும். தஞ்சை கோவில் செட் வியக்க வைக்கும்.

டி.ஆர், மகாலிங்கம் கருவூரார், சீர்காழி கோவிந்த ராஜன், எஸ் . வரலட்சுமி பாடிய பாடல் நன்றாக இருக்கும்.

மேலே உள்ள "ராஜ ராஜசோழன்" படத்தில் வரும் பாடலில்  சொல்லியது போல 

தஞ்சைபெரிய கோவில் பல்லாண்டு வாழ்கவே! 

தாரணியில் தமிழ் போல நிலை நின்று வாழ்கவே!

 

மகன் எடுத்த தஞ்சை கோவில் படங்கள் இன்னொரு  பதிவில் பார்க்கலாம்.

வாழ்க வையகம்! வாழ்க வையகம்! வாழ்க வளமுடன்!

---------------------------------------------------------------------------------------------------