மயிலாடுதுறை துலா கட்டம்

முழுக்குத்துறை போகும் வழி. 

மயிலாடுதுறையில் ஐப்பசி மாதம் முழுவதும்  சுவாமி தீர்த்தம் கொடுக்கும் நிகழ்ச்சி நடைபெறும். பல ஊர்களிலிருந்தும் மக்கள் துலா ஸ்தானம் செய்ய வருவார்கள். 

ஐப்பசி மாதம் சூரியன் துலா ராசியில் பிரவேசம் செய்கிறார் அதனால் "துலாமாதம் " என்று ஐப்பசி மாதத்தை சொல்வார்கள். அந்த மாதம் முழுவதும் மயிலாடுதுறை ஜே! ஜே! என்று இருக்கும். வீடுகள் தோறும் உறவினர்கள் இருப்பார்கள். எங்கள் வீட்டுக்கும் அந்த சமயம் உறவுகள், நட்புகள் வருவது உண்டு துலாஸ்தானம் செய்ய. "கடை முழுக்கு" வர முடியவில்லை என்றால் கார்த்திகை ஒன்றில் நடக்கும் "முடவன் முழுக்கில் "கலந்து கொள்வார்கள்.

மயூரநாதர் கோவில் கும்பாபிஷேக திருப்பணிகள் நடப்பதால் இந்த மண்டபமும் பழுது பார்க்கப்படும் என்று நினைக்கிறேன்.

துலா உற்சவம் நடைபெறும் போது தீர்த்தவாரிக்கு வரும் திருவாடுதுறை ஆதினத்திற்கு சொந்தமான அபயாம்பிகை சமேத மயூரநாதர், அறம்வளர்த்த நாயகிசமேத ஐயாரப்பர், 

தருமபுர ஆதீனத்திற்கு சொந்தமான காசி விசாலாட்சி , விஸ்வநாதர் கோவில்களிலிருந்து சுவாமிகள் பஞ்சமூர்த்திகளுடன் இந்த மண்டபத்தில்  எழுந்தருளுவார்கள்.

இந்த முறை மயூரநாதர் கோவில் கும்பாபிஷேக திருப்பணி நடைபெறுவதால்  துலா உற்சவத்திற்கு  சுவாமி வரவில்லை.

காசி விஸ்வநாதர் கோவில், ஐயாறப்பர் கோவில் சுவாமிகள் மட்டும் தீர்த்தவாரிக்கு வந்தார்கள்.

தீர்த்தவாரி கொடுக்கும் படித்துறை மண்டபம்  (வெளிபக்கம்)

படித்துறை மண்டபம் (உள்பக்கம்)

பிள்ளையார் சன்னதி எதிர் பக்கம் முருகன் இருப்பார் என்று நினைக்கிறேன், எடுக்க மறந்து விட்டேன்.

காவிரி வரக் காரணமான பிள்ளையார் , அகத்தியர்  இருக்கிறார்கள்  காவிரி அம்மனும் இருக்கிறார்.

நீர் வரத்து இல்லை நீர் வற்றி உள்ளே உள்ள கிணறுகள் தெரிகிறது

தருமபுரம் ஆதீனத்திற்கு சொந்தமான ஞானாம்பிகை சமீத வதான்யேஸ்வரர் கோவில் (வள்ளலார் கோவில் என்று அழைக்கப்படும்) பஞ்சமூர்த்திகள் எழுந்தருளும் மண்டபம் எதிர்கரையில் இருக்கிறது. மண்டபத்தில் விழா சமயம் மட்டும்  உபயோகபடுத்த கதவு போட்டு இருக்கிறார்கள்.  எதிர் கரையிலும் மூன்று கோவில்கள் இருக்கிறது. விழாகாலங்களில் அங்கும்  சிறப்பாக கச்சேரிகள் நடக்கும்.  உற்சவர்கள் எழுந்தருளுவது எல்லாம் உண்டு.

தீர்த்தவாரி நடக்கும் போது  சுவாமி கிட்ட பக்தர்கள் வந்து விடாமல் இருக்க கம்பி தடுப்பு புதிதாக போட பட்டு இருக்கிறது. முன்பு கிடையாது . கொஞ்ச தூரம் சிமெண்ட் கலவை  நடைபாதை வேறு போட்டு இருக்கிறார்கள்.

இக்கரையிலிருந்து அக்கரை போக வலப்பக்கம்  பாலம் இருக்கிறது, தூரத்தில் தெரிகிறதா? காமிரா கொண்டு போகவில்லை அலைபேசியில் எடுத்த படங்கள்.

புண்ணிய நதிகளில் எல்லாம் மக்கள் பாவத்தை போக்க நீராடியதால்  மக்களின் பாவசுமையால் நதிகள் கருமைநிறம் அடைந்ததாகவும் அனைத்து ஜீவ நதிகளும் காவிரி துலாகட்டத்தில் ஐப்பசி முழுவதும்  புனித நீராடி சிவனை வழிபட்டு தங்கள் பழைய நிலையை அடைந்ததாக புராண வரலாறு சொல்கிறது.

அப்படி பட்ட புனித நதியை மக்கள் குப்பைகளை கொட்டி மாசு செய்வதை பார்க்கும் போது மனது வேதனைப் படுகிறது.

                            தூரத்தில் பாலம் தெரிகிறது.

காவிரி அம்மன் குடத்தை கையில் வைத்து கொண்டு இருக்கிறார்

ஆடிபெருக்கு சமயம்  காவிரி அம்மனை வணங்கி பெண்கள் அரசமரத்தில் மஞ்சள் நூல் கட்டுவார்கள். நூல் கண்டு கொண்டு வந்து மஞ்சளில் நனைத்து மரத்தை சுற்றிக் கட்டுவார்கள். நாக தோசம் நீங்க நாக சிலைகள் கொண்டு வந்து வைத்து அதற்கு பால் அபிஷேகம் செய்வார்கள்.

எதிர்கரையில் மூன்று கோவில்கள் தெரிகிறதா?

இன்னும் பழைய காலத்து வீடுகள் இங்கு இருக்கிறது

படியில்  குப்பைகள் கிடக்கிறது.   என்று மகன் தீர்த்தம் எடுத்து வந்தான், தலையில் தெளித்துக் கொண்டேன், காவிரி அம்மனை வணங்கி. தொடர் பயணத்தால் கால்வலி இருந்தது, அதனால் கீழே இறங்கவில்லை நான்.

 நெகிழி குப்பைகளில் கவனமில்லாமல் கால் வைத்தால் வழுக்கிவிடும். கவனமாக இறங்க வேண்டும்.

கரையை ஒட்டிய வீடுகளின் கழிவு நீர், மற்றும் குப்பைகள் கொட்டபடும் முன்பு, இப்போது தடுத்து இருக்கிறார்களா தெரியவில்லை.

இந்த கடையில் மகன்  பூத முகம் சின்னது, பெரிது வாங்கினான் ஹாலோவின் சமயம் வீட்டில் தொங்கவிடலாம் என்று. இந்த கடையில் பூஜை பலகைகள், மற்றும் கோவிலில் நேர்ந்து கட்டும் தொட்டில்கள் , பிரம்பு, மூங்கில் கூடைகள் கிடைக்கும். பூஜைக்கு வேண்டிய அனைத்தும் வாங்கலாம்.

துலா கட்ட மண்டபத்தை சுற்றி உள்ள கடைகளில்  வீட்டுக்கு வேண்டிய அனைத்து சாமான்களும் கிடைக்கும். பழைய , புதிய சாமான்கள் கிடைக்கும்.

துலா கட்ட காசி விஸ்வநாதர்  பதிவு

//பக்கத்தில் இருக்கும்  துலா கட்டம் போனோம், அங்கு இருக்கும் கடைகள் போனோம், அந்த பதிவுகளும் பின்னர் வரும்.//  என்று போன பதிவில் சொல்லி இருந்தேன். இங்கு பதிவு செய்து விட்டேன்.

அடுத்த பதிவு மயூரநாதர் கோவில்.

வாழ்க வையகம்! வாழ்க வையகம்! வாழ்க வளமுடன்!

---------------------------------------------------------------------------------------------------