பழங்கதை பேசி கொலு பார்த்தல்

என் தங்கை வீட்டுக் கொலு இந்த பதிவில் இடம் பெறுகிறது.

பழைய கால  பொம்மைகள்  இடம் பெறும் இந்த கொலுவில்.

நவராத்திரி விழா முடிந்தாலும் கொலு பதிவு தொடர்கிறது.

கருணை செய்வாய் கற்பகமே ! ;-  எங்கள் வீட்டு சரஸ்வதி பூஜை படங்கள் , மற்றும் சரஸ்வதி பூஜை வாழ்த்துகள் பதிவு.

 பழைய பதிவு படிக்கவில்லை என்றால் படிக்கலாம்

தெப்பக்குளத்தில் விளக்கு போடும் முன் 

விளக்கு போட்ட பின்

இரண்டு பக்க தட்டில் தாமரைகள் வரைந்தவர் தங்கை பேத்தி

"நான் தாமரை போடுகிறேன்" என்று தாமரை கோலப்பொடியில் போட்டு வண்ணம் கொடுக்கிறாள்

சென்னை மருந்தீஸ்வரர் கோயிலில் செப்டம்பர் 22ம் தேதி  நவராத்திரி விழாவில் ஆடினாள். அதை நாங்கள் எல்லாம் பார்க்கவில்லை அதனால்  அதை ஆடு என்று கேட்டோம் ஆடி காட்டினாள்.

மேலே அரிசி போட்ட கண்ணாடி குடுவை என்ன என்று தெரிகிறதா? அது  பழைய கால லாந்தர் விளக்கின் கண்ணாடி குடுவை. அதை கீழே ஒரு கிண்ணத்தில் வைத்து அதற்குள் அரிசையை நிரப்பி  அன்னபூரணியை மேலே வைத்து இருக்கிறாள்.

அமிர்தாஞ்சன் பாட்டில்களை சேகரித்து அதில் தானியங்களை நிரப்பி  வியாபாரம் செய்ய வைத்து இருக்கிறார் செட்டியார்

நல்ல கனமான அட்டை பெட்டிகளை டிரா மாதிரி செய்து இருக்கிறார்

கல்யாணத்திற்கு வந்த உறவுகளுக்கு  தாம்பூல பை இவை எல்லாம் உல்லன் நூலில் செய்தவை. தேங்காய், வாழைபழம், குங்குமசிமிழ், வெற்றிலை பாக்கு எல்லாமே  உள்ளன் நூல்.

தேங்காய் பழ தட்டும் உல்லன் நூலில் பின்னியது

உல்லன் நூலிலும், ஓயரிலும் பின்னி இருக்கிறது 

தங்கையின் ஓர்படி பின்னியது, என் அம்மா பின்னியது எல்லாம் இருக்கும் தங்கை வீட்டு கொலுவில்.

கல்யாண செட்டில் மிஞ்சியது மாப்பிள்ளை, பெண் மட்டும், அவர்களை சுற்றி சுவரில் , நிலை வாசலில் அந்தக்காலத்தில் மாட்டி வைக்கும்  தாம்பூல தட்டுகளை வைத்து இருக்கிறாள் என் அம்மாவீட்டு கொலுபொமைகள்,  மற்றும் தங்கையின் ஓர்படி வீட்டு கொலு பொம்மைகளும் இந்த கொலுவில் இருக்கும்.

மேலே உள்ள கலச குடத்திற்கும், மாவிலையும்  உல்லன் நூலால் பின்னி இருக்கிறார்கள். 

சந்திரலேகா டிரம் நடன பொம்மை, கல்யாண நலுங்கில் பெண், மாப்பிள்ளை உருட்டி விளையாடும் தேங்காய் வைத்து இருக்கிறாள் சின்ன உருளியில்,  கண்ணன் ராதா ஊஞ்சல்  முன்.

கண்ணன் நடுவில் கோபியர் சிறிமியர்

இந்த கண்ணணை சுற்றி நிற்கும் கோபியர் அழகு.   

தாம்பூல தட்டுக்கள் தான் வித விதமாக இருக்கிறது

தங்கையின் தோழி  மிஷினில் பின்னிய திரை சிலை  பீரோ போன்ற கொலு படி ஒரு பக்கம் இப்படி திரை சிலை ஒன்னொரு பக்கம் செயற்கை பூக்களால் அலங்கரித்து கதவு தெரியாமல் வைத்து இருக்கிறாள்.

என் அம்மா செட்டியார் முன் நவரத்தினகள் விற்பதாக அந்த காலத்தில் கவர் செய்து அதில்  கலர் பாசிகளை போட்டு ஒட்டி வைத்து இருப்பார்கள். அப்போது மின்னிய பாசிகள் வருடங்கள் ஆனதும் ஒளி இழந்து இருக்கிறது. தாயம் விளையாட காய்களில் பாசி பின்னி இருப்பார்கள் நான்கு காய்கள் இருக்கிறது பாருங்கள், ஒரு காய்க்கு பாசி பிய்ந்து போய் விட்டது. 

பச்சை கலரில் கால் மடித்து இருக்கும் செலுலாய்ட் பொம்மை நிறைய இருக்கும் அதை பூங்கா , வீட்டு வாசலில் வைப்போம், நிறைய இருந்தது, இப்போது ஒரு பொம்மை தான் இருக்கிறது. பீனாக்கா டூத் பேஸ்ட் வாங்கினால் பறவைகள், விலங்குகள் கொடுப்பார்கள், அதில் மிஞ்சியது வாத்து , பூனைதான். வாத்து தெப்பக்குளத்தில் போட்டு இருக்கிறாள்.

மாக்கல் ,மரசெப்பு எஞ்சியது தட்டில் உள்ளது. போன் இருக்கிறது.

கொலு பார்த்து விட்டு நாங்கள் மூன்று பேரும் அம்மாவின் நினைவுகளை பேசி மகிழ்ந்தோம். 

மதியம் கூட்டாஞ்சோறு , தயிர்சாதம், கொத்தமல்லி துவையல் , அப்பளம், வடகம் வறுத்து இருந்தாள் உறவுகளுடன் கதை பேசி கூட்டாஞ்சோறு உண்பது மகிழ்ச்சியாக இருந்தது.

பிறகு  மாலை பாடல்களை பாடி சுண்டல் வைத்து பூஜை செய்து கும்பிட்டோம் . தங்கை வீட்டில் குடி இருக்கும் பக்கத்து வீட்டு அம்மா கேசரி சூடாய் செய்து கொண்டு வந்தார்கள் 'இதையும் வைத்து கும்பிட்டு    கொடுங்க உங்கள் அக்கா  , தங்கைகளுக்கு' என்றார்கள்.  மகிழ்வாய் கொலு பார்த்து மாலை வீடு வந்து சேர்ந்தேன்.

தங்கை வீட்டு கொலு எப்படி இருக்கிறது என்று சொல்லுங்கள்.

2018 ல் போட்ட என் தங்கை கொலுவுக்கும் இப்போதும் பார்த்த கொலுவுக்கும் நிறைய வித்தியாசம் இருக்கிறது. நிறைய பொம்மைகள் உடைந்து விட்டது, கொஞ்சம் கோயிலுக்கு கொடுத்து விட்டாள். அம்மா, அக்கா  கைவேலைகள் நிறைய இருக்கும்  இப்போது பழைய வீட்டை இடித்து புதுசு செய்த போது கொலு பொம்மைகள்  பழுது பட்டு விட்டது.

பழைய நினைப்பில் விடமால் வைக்க வேண்டும் கொலு என்ற நினைவில் வைக்கிறாள்.

அன்றும், இன்றும் அவள் வீட்டு கொலு எப்படி இருக்கிறது என்று பார்த்து சொல்லுங்கள்.

பழைய பதிவில் தங்கை  வீட்டுக்கு அருகில் இருக்கும் செந்தில் ஆண்டவர் அனுமன் கோயிலை பல வருடங்களாக பார்க்க வேண்டும் என்று நினைத்தது  தங்கை வீட்டுக்கு கொலுப்பார்க்க போன போது  கைகூடியது. தங்கை பெண் அழைத்து சென்றாள்.  இந்த கோயில் மதுரை சேதுபதி பள்ளி பேரூந்து நிறுத்தம் பக்கம் இருக்கிறது .புரட்டாசி சனிக்கிழமை அந்த கோயில் கொலுவையும் பார்த்து விடலாம் பழைய பதிவின் மூலம்.

வாழ்க வையகம் ! வாழ்க வையகம்! வாழ்க வளமுடன்!