மலர்ந்தது மார்கழி

இன்று காலை போட்ட கோலம்

 

மார்கழி மாதம் வந்து விட்டால் வீடு தோறும் பக்தி மணம் கமழும். அதிகாலை எழுந்து கொள்ளாதவர்களும் மார்கழி மாதம் எழுந்து விடுவார்கள், அனைத்து கோயில்களிலும் பாடல்கள்   வைத்து விடுவார்கள். மார்கழி குளிரும் இப்போது குறைந்து இருக்கு, முன்பு போல குளிரவில்லை.

தெருவெங்கும் பஜனை செய்து போவோர்   உண்டு. இல்லங்களில் திருப்பாவை, திருவெம்பாவை பாடல்களை பாடுவோர் உண்டு. அதிகாலை கோலம் போட்டு , விளக்கு வைத்து  குளித்து கோயில் போய் வழி படுவது  மகிழ்ச்சியான விஷயம். இந்த பதிவில் திருப்பாவை, திருவெம்பாவை பாடலை பகிர்ந்து இருக்கிறேன்,  சில நினைவுகளை எழுதி இருக்கிறேன், படித்துப்பாருங்கள். 

முன்பு மார்கழி மாத சிறப்புக்களைப்பற்றி. ஓவ்வொரு மார்கழியிலும் பதிவு போட்டு இருக்கிறேன். அவற்றில் சில இங்கு.

 பாவை நோன்பு,

பழைய கோலங்கள்

மார்கழி கோலங்கள்

  மார்கழி நினைவுகள் , 

மார்கழி மாத நிகழ்வுகள்

சின்ன சின்ன கோலங்கள்

மார்கழி கோலமும் , மகரிஷி கவிதையும்

மார்கழியின் சிறப்பு

மார்கழித் திங்கள் மதி நிறைந்த நன்னாளால்

 நீராடப் போதுமீர் போதுமினோ நேரிழையீர்

சீர் மல்கும் ஆய்ப்பாடிச் செல்வச் சிறுமீர்காள்

கூர்வேல் கொடுந்தொழிலன் நந்தகோபன் குமரன்

ஏரார்ந்த கண்ணி யசோதை இளஞ்சிங்கம்

கார்மேனிச் செங்கண் கதிர்மதியம் போல் முகந்தன்

நாராயணனே நமக்கே பறை தருவான்

பாரோர் புகழப் படிந்தேல் ஓர் எம்பாவாய்

- ஆண்டாள் அருளியது

ஆதியும் அந்தமும் இல்லா அருபெருஞ்

சோதியை யாம்பாடக் கேட்டேயும் வாள்தடங்கண்

மாதே வளருதியோ வன்செவியோ நின்செவிதான்

மாதேவன் வார்கழல்கள் வாழ்த்திய வாழ்த்தொலிபோய்

வீதிவாய்க் கேட்டலுமே விம்மி விம்மி மெய்மறந்து 

போதார் அமளியின் மேல் நின்றும் புரண்டிங்ங்

ஏதேனும் ஆகாள் கிடந்தாள் என்னே என்னே

ஈதேயெந் தோழி பரிலோர் எம்பாவாய்

- மாணிக்கவாசகர் அருளியது

மாயவரத்திலிருந்து மதுரை வந்த போது கலைநகர் என்ற இடத்தில் இருந்தோம், அந்த வீட்டுக்கு அருகில் இருந்த கோயில் ஸ்ரீ காளத்தீசுவரர், அம்மன் பேர் ஞானப்பிரசுனாம்பிகை (ஞானப்பூங்கோதை).

அங்கு மார்கழி மாதம் அதிகாலையில் திருவெம்பாவை, திருப்பள்ளியெழுச்சி , மற்றும் திருப்பாவை பாட போவேன், என் கணவர் என்னை அந்த கோயிலில் அதிகாலை விட்டு விட்டு அவர்கள் நடைப்பயிற்சிக்கு போவார்கள்.

முன்பு இந்த கோயிலுக்கு மார்கழி மாதம் பதிவு போட

வலையேற்றி இருந்து இருக்கிறேன், ஏனோ போடாமல் விட்டு இருக்கிறேன், இப்போது என் பழைய மார்கழி பதிவுகளை படித்து கொண்டு இருந்த போது இந்த பதிவு டிராப்டில் இருந்தது படங்களுடன். உடனே இந்த வருட மார்கழி பதிவாக  என் மலரும் நினைவுகளுடன் மலர்ந்து விட்டது.

  

காலை பாடுகிறோம்

 

பாடி முடிந்ததும் பூஜை

இருள் விலகா நேரம்  நாங்கள் பாடி முடித்து விடுவோம்,பாடி முடித்தவுடன்  பூஜை ஆகிவிடும் 

 பாட வந்தவர்களுக்கு கோயில் நிர்வாகம் சூடாய் பசும் பால் கொடுப்பார்கள்.

அபிசேகம், அலங்காரம் , முடிந்து பூஜை ஆனதும்  சில நேரம் நடைபயிற்சி முடித்து வந்து என்னை அழைத்து போவார்கள். பால் அருந்தி கொண்டு இருந்தால்  , "விடிந்து விட்டது  மெதுவாக வா"  என்று சொல்லி போவார்கள்.

ஒரு நாள் எங்களை எல்லாம் படம் எடுங்கள் என்ற போது எடுத்த படங்கள் இவை. மேலே ஸ்வாமி படங்கள் நான் எடுத்த படங்கள்.

என்னைப்பார் என்று சொன்ன போது முகம் தூக்கி சிரிப்புடன் பார்த்தபோது

தினம் என் இடம் அந்த சுவற்றுப்பக்கம் தான், சாய்ந்து உட்கார வேண்டும், கால் வலித்தால் சிறிது நிற்பேன், யாருக்கும் இடைஞ்சல் இல்லாமல் என் இருக்கையை வைத்துக் கொள்வேன்.

அப்புறம் நான் படும் சிரமத்தைப்பார்த்து கோவில் நிர்வாகத்தினர் எனக்கு நாற்காலியை கொடுத்து விட்டார்கள், எனக்கு மிகவும் கஷ்டமாக இருக்கும்,   நான் மட்டும் நாற்காலியில் அமர்ந்து பாடுவது. அதனால் பரவாயில்லை என்று சொன்னேன், எழுந்து கொள்ள  கஷ்டபடுவதை பார்த்து மற்றவர்கள் என்னை சமாதானம் செய்து நாற்காலியில்  அமர வைத்தார்கள். அந்த அன்பானவர்களை நினைத்து கொள்கிறேன் இப்போது.

வீட்டில் என் கணவரும்  காலை விளக்கு முன் அமர்ந்து திருப்பாவை 30 பாடல்களும், திருவெம்பாவை , திருப்பள்ளியெழுச்சி  அத்தனை பாடல்களையும் தினம் படித்து விடுவார்கள், அப்புறம்  நான் பிரசாதம் செய்து வைப்பதை  வைத்து அனைத்து படங்களுக்கும் மலர் சாற்றி பூஜை செய்து விடுவார்கள். 

பிரதோஷத்திற்கும் தேவாரம், திருவாசகம் படிப்போம் அப்பொதும் நாற்காலி கொடுத்து விடுவார்கள் எனக்கும் என் கணவருக்கும்.

சின்ன கோவிலாக இருந்தாலும் எல்லா விஷேகங்களும் நடக்கும். ராகு கால பூஜைக்கு பாடபோவேன், பைரவர் ராகு கால பூஜைக்கு  பாட போவேன், சதுர்த்தி, பெளர்ணமி பூஜை என்று எல்லா வற்றுக்கும் கூட்டு வழிபாடு நடக்கும் போவேன்.

அங்கு இருந்த இரண்டு ஆண்டு காலம் அருமையான காலங்கள். இந்த வீட்டுக்கு வந்து பக்கத்தில் ஐய்யனார் கோவிலுக்கு மார்கழி மாத பூஜைக்கு போவோம் நானும் என் கணவரும்..  இந்த கோயிலில் அதிகாலை கோலம் போடும் சிறு பெண்களைப் பற்றி பதிவு போட்டு இருக்கிறேன்.

பிரதோஷ பூஜை நன்றாக நடைபெறும்

பிரதோஷ சாமி   கோவிலை வலம் வரும். சக்கரம் வைத்த சிறு வண்டி இழுத்துக் கொண்டு வருவார்கள்.

ஆடி மாதம்  அம்மனுக்கு கஞ்சி வார்த்தல் உண்டு

தேய்மிறை அஷ்டமி, ஞாயிறு ராகு கால வழிபாடு உண்டு பைரவருக்கு

புதிதாக அரசமரம், வேப்பமரம் கீழ் மேடை கட்டி விநாயகரும், ராகு , கேதுவும் வைத்தார்கள் அப்போது அந்த விழாவில் 

என் கணவர்  தேவாரம் பாடினார்கள்.

ஐப்பசி அன்னாபிஷேகம் 

ஐப்பசி அன்னபிஷேகம் நடக்கும்  அன்று அனைவருக்கும் அன்னதானம் உண்டு. நாம் காய்கறிகள், அரிசி மளிகைப் பொருட்கள் கொடுக்கலாம்.

கார்த்திகை மாதம் சங்காபிஷேகம் நடக்கும்

மாத சதுர்த்தி சங்கடகர சதுர்த்தி இவை சிறப்பாக நடக்கும். சனிபகவான் தனி சன்னதியில் இருப்பார் அவருக்கு சனிக்கிழமை, சனி பெயர்ச்சி சமயம் சிறப்பாக நடக்கும்.

படங்கள் எல்லாம் பழைய கைபேசியில் தூரத்திலிருந்து எடுத்த படங்கள் தெளிவு குறைவாக இருக்கும்.

இப்படி எல்லா விழாக்களுக்கும் கோயில் போய் வந்தவள் இப்போது தொலைக்காட்சியில் எல்லா விழாக்களையும் நேரடி காட்சியாக பார்த்து கொண்டு இருக்கிறேன்.

இறைவன் கால்களுக்கு நல்ல பலத்தை கொடுத்தவுடன் கோயில்களை வலம் வர வேண்டும். மருத்துவரிடம் காட்டி மருந்துகள் எடுத்து கொள்வதால்  வலி குறைந்து வருகிறது.

இன்று காலை மார்கழி மாதம் என்பதால் எங்கள் வளாக பிள்ளையாரை வணங்கி வந்தேன், குருக்கள் வரவில்லை எட்டுமணிக்கு தான் வருவாராம், நான் 6 மணிக்கே போய் விட்டேன்.  பிள்ளையாரை வணங்கி வலம் வந்து வீட்டுக்கு வந்து   விட்டேன். 

வானொலியில் எம். எல் வசந்தகுமாரி அவர்களின் திருப்பாவை, திருவெம்பாவை பாடல்களை கேட்டேன். 

யூடீயூப்பில்  எம். எல் வசந்தகுமாரி அவர்களின் திருப்பாவை, திருவெம்பாவை பாடல்கள் முழுதும் கேட்டுக் கொண்டே காலை வேலைகளை தொடர்ந்தேன்.

பாசிப்பருப்பு பாயாசம் செய்து இறைவனை வணங்கினேன்.

வாழ்க வையகம்! வாழ்க வையகம்! வாழ்க வளமுடன்!.

 

---------------------------------------------------------------------------------------------------