கப்பல் பயணம் க்ரூஸில் சுற்றுலா

கப்பல் பயணத்தின்   மூன்றாம் நாள்.எங்கள் கப்பல் இந்த துறைமுகத்தில் நின்றது. 

மே 31 தேதி   (Cruise Trip  Aboard Carnival  ) கடற்பயண  சுற்றுலாவிற்கு  ஏற்பாடு செய்து இருந்தார் மகன். லாஸ் ஏஞ்சலஸ்  ஊரிலிருந்துகிளம்பி  மெக்சிகோ வரை பயணம்.

   CARNIAL RADIANCE  என்ற கப்பலில் பயணம் செய்த அனுபவங்கள்  தொடர் பதிவாக   வருகிறது. 

கப்பல் பயணம் பகுதி -1

கப்பல் பயணம்  பகுதி -2  

கப்பல் பயணம் பகுதி -3

கடல் பார்க்க பார்க்க  ஆசையாக இருக்கும் . கடலில் போய்  கொண்டே இயற்கையை ரசிப்பது ஆனந்தம் தான்.

இந்த பதிவில் கப்பல் மேல் தளத்தில் விளையாடும் இடம், மற்றும்  நடைப்பயிற்சி செய்யும் இடங்களின்படங்கள் இடம்பெறுகிறது.

மேல் தளம்

நீர் சறுக்கு விளையாடும் இடம், மற்றும் நீந்தி களிக்கும் நீச்சல் குளங்கள், சூரிய குளியல் எடுக்க ஆசனங்கள்.

மகன் எடுத்த இந்த  படத்தில் நீர் சறுக்கு விளையாடும் இடம் நன்றாக தெரியும் மஞ்சள் கலரில் வளைவாக வருகிறதே அதுதான்

சதுரங்கம் விளையாடும் இடம்

அமர்ந்து  விளையாட்டை ரசிக்கும் ஆசனங்கள் பழுது பார்க்கப்படுகிறது

கயிற்று பாலத்தில் நடத்தல்

 நடைப்பயிற்சி செய்ய  பாதை. கப்பலை ஒரு முறை  சுற்றி வந்தால் ஒரு மைல்

கூடை பந்து விளையாட்டு

 

சிலர் விளையாடி கொண்டு இருந்தார்கள் 

குடை நிழலில் அமர்ந்து கொண்டு பறவைகளை விளையாட்டை ரசிக்கலாம்

கரும்பலகை துடைக்கும் டஸ்டர் (சிறு கற்கள் அடைக்கப்பட்டது)  போன்றதை பலகையில் உள்ள துவாரத்தில் சரியாக போட வேண்டும். அந்த விளையாட்டு.

நான் caravan   பயணத்தில் விளையாடினேன்,(நின்று கொண்டு இருக்கும் கேரவனில் தங்கி பல இடங்களை சுற்றிப்பார்த்தோம். அங்கு தான் விளையாட  இந்த பலகை இருந்தது)  இரண்டு வருடங்களுக்கு முன்   விளையாடிய காணொளி  இருக்கிறது அதை போடுகிறேன், இன்னொரு பதிவில்.

நிறைய விளையாட்டு கருவிகள் இருக்கிறது. நான் காலை  7 மணிக்கு போனேன் அதனால்  யாரும் விளையாடுவதை பார்க்க முடியவில்லை, ஒரு சிலர் நடைப்பயிற்சி மட்டும் செய்து கொண்டு இருந்தார்கள்.

மகனிடம் யாரும் விளையாடுவதை எடுக்க முடியவில்லை என்றவுடன் மகன் விளையாடினான் படம் எடுத்தேன்

இரண்டு தளங்கள் மட்டும் போய் பார்த்தேன்,  அதற்கும் மேல் ஒரு தளம் உள்ளது அதற்கு நான் போகவில்லை.
 

அடுத்து  துறைமுகத்திற்கு அருகில் உள்ள இடங்கள், கடைத்தெரு பார்க்கலாம்.

நாங்கள் இருந்த தளத்தின் மேலே உள்ள பால்கனி பகுதி . இதில் நின்று கடலை பார்ப்பது ஆனந்தம். கடலில்  இங்கு தான் இரண்டு  குட்டி டால்பின் துள்ளுவதை பார்த்தேன், படம் எடுக்கமுடியவில்லை, சிறிது நேரம் காத்து இருந்து பார்த்து விட்டு  வந்து விட்டோம்.

11 மணிக்கு எங்களை கடைத்தெருக்கு அழைத்து செல்ல  பஸ் வந்து விடும் அதனால் காலை ஆகாரத்தை முடித்து கிளம்ப வேண்டும்.

காலை ஆகாரம், ஆரஞ்சு ஜூஸ் , சீஸ் பாஸ்தா, பிரட் , waffles

கப்பலை விட்டு கீழே இறங்கும் போது பயங்கர பாதுகாப்பு சோதனை நடத்தப்பட்டு தான்  நம்மை  அனுப்புகிறார்கள்.

எனக்கு அங்கு ஒரு சோதனை காத்து இருந்தது. என் அடையாள அட்டையை கழுத்தில் தொங்க போட்டு கொண்டே இருந்தேன். அதை  மேல் தளம் சென்று விட்டு வந்து உடைமாற்றும் போது கைப்பையில் வைத்தேன்.  அது கொஞ்சம் பெரிய பை.

எங்கள் அறை கதவை அடைத்து விட்டு வெளியே வரும் போது மருமகள் "அத்தை சின்ன கைப்பை கொடுத்தேனே! கடைத்தெருவுக்கு, கப்பலில் உள்ளே எடுத்து போக என்று அதை  எடுத்து கொள்ளுங்கள்  உங்களுக்கு நடக்க எளிதாக இருக்கும் " என்றாள், மீண்டும் கதவை திறந்து  அதை எடுத்து கொண்டு  குளிருக்கு ஒரு அழகான ஸ்கார்ப்,  தண்ணீர் பாட்டில், காமிரவை மட்டும் எடுத்து இந்த பைக்கு மாற்றியவள் அடையாள அட்டையை எடுக்க மறந்து விட்டேன்.

அங்கு எனக்கு முன்னே எல்லோரும் அடையாள அட்டையை காட்டி முன்னே போய் விட்டார்கள், நான் கைப்பையில் எடுக்க தேடிய போது கிடைக்கவில்லை. என்னை வெளியே செல்ல அனுமதிக்கவில்லை, மகன் திரும்பி பார்த்தவன் "பதட்டப்பட வேண்டாம் நான் வருகிறேன்", என்று அங்கிருந்து சைகை செய்தான். வேறு வழியாக அவனை அனுமத்தித்தார்கள்

அதன் பின் மீண்டும் அறைக்கு வந்து என் அடையாள அட்டையை கழுத்தில் தொங்க விட்டுக் கொண்டு வந்தேன்.

  ஏன் இப்படி கடுமையான சோதனை என்று வரும் வழியில் மகனிடம் கேட்டேன்,  அமெரிக்காவுக்கு மெக்ஸிகோவில் இருந்து அனுமதி இன்று யாரும் உள்ளே நுழைந்து விடக் கூடாது என்பதற்குதான்.  கப்பலுக்கு மீண்டும் திரும்பி வரும் போது மேலும் அதிகபடியான சோதனை உண்டு என்றான். 

அந்த இடத்தில் என் அழகான ஸ்கார்ப் கீழே விழுந்து விட்டது எனக்கு தெரியவில்லை.  (மருமகள்  மலேஷியா பயணத்தில் வாங்கி கொடுத்தது. )அடையாள அட்டையை கைப்பையில் தேடும் போது   கையில் தொங்க விட்டு இருந்தேன், வழு வழு என்று இருந்த காரணத்தால் வழுகி கீழே விழுந்து இருக்கிறது.

மகன் "பதட்டப்பட வேண்டாம் "என்றாலும் பதட்டப் பட்டு இருக்கிறேன், அதுதான் அறைக்கு சென்று அடையாள அட்டையை எடுக்க போகும் அவசரத்தில் கீழே விழுந்ததை கவனிக்கவில்லை.

சோதனைகள் முடித்து வெளியே வந்தால்  நம்மை வரவேற்க மாறுவேடம் தரிந்தவர்கள்  மகிழ்ச்சியாக வரவேற்றார்கள்.அவர்களை பார்த்ததும் என் பதட்டம் காணாமல் போய் விட்டது.

மெக்சிகோ கிராமிய உடை

மெக்சிகோ நாட்டின் பாரம்பரிய உடை அணிந்தவர்கள் மலர்ந்த முகத்துடன்  நான் படம் எடுக்க போஸ் கொடுத்தார்கள்.

பேசும் கிளி வைத்து இருக்கிறார்

கப்பலின்  கீழ் இருந்து இரண்டு வரிசை  ஜன்னல்கள் தெரிகிறது அல்லவா?  அதில் கீழ் இருந்து மேலே தெரியும்    ஜன்னல்களில்      எங்கள் அறை ஜன்னல்களும் இருக்கிறது.. அதற்கு மேல் பால்கனி  அதற்கு மேல்  அவசர காலங்களில் மக்களை ஏற்றி கீழ் இறக்கப்படும்  உயிர் காக்கும்  படகுகள்.

அதற்கும் மேலூம்  தங்கும் அறைகள் உண்டு.

மேலே பால்கனியில் நிற்கும் படம் அங்கு எடுத்தது. அங்கு நின்றுதான் கடலை பார்த்து ரசித்தேன்.

நாம் பயணம் செய்யும் பஸ் வரும் போது அறிவிப்பு செய்வார்கள் அதுவரை அங்கு போட்டு இருக்கும் ஆசனங்களில் அமர்ந்து போகிற வருபவர்களை வேடிக்கைப்பார்த்து கொண்டு இருந்தோம்.

108 ம் நம்பர் பஸ் வந்தது, அதற்கு போகும் முன் மீண்டும் சோதனை , மோப்ப நாய் கூட நிற்கிறது , சோதனை செய்யும் இடத்தில் 

எங்களை அழைத்து செல்லும் வழிகாட்டி பெண் தன் பேர் அச்சடித்த சிறு சீட்டை நம் சட்டையில் ஒட்டிக் கொள்ள சொன்னார், என் புடவையில் ஒட்ட வில்லை அதனால் கைபையில் ஒட்டிக் கொண்டேன். 

பேரன் சட்டையில் ஒட்டி கொண்டான்.  தன் பேர் இசாபெல் என்றார் இசபெல் என்று சிலர் உச்சரித்தபோது இல்லை, என்பேர் இசாபெல் என்றார். அவர் பேச்சு சிரிப்பு எல்லாம் நன்றாக இருந்தது.  நல்ல சுறு சுறுப்பான பெண்.

என் சம்பந்தி மற்றும் என்னுடைய  புடவையை பாராட்டிக் கொண்டே இருந்தார்,  கலர் நன்றாக இருப்பதாக சொன்னார். கடைத்தெருவில் எங்களுடன் படம் எடுத்துக் கொண்டார். 

அடுத்த முறை வரும் போது அவருக்கு புடவை வாங்கி வரும் படி சொன்னார். அவரும் கட்டிக் கொள்ள வேண்டுமாம்.

அவருக்கு புடவை கட்ட  ஆசையாக இருப்பதாக சொன்னார்.

அவருடன் கடைத்தெருக்களை, மற்றும் சில வரலாற்று சிறப்பு மிக்க இடங்களை சுற்றிப்பார்த்தது அடுத்த பதிவில் வரும். 

வாழ்க வையகம்! வாழ்க வையகம்! வாழ்க வளமுடன்!

_----------------------------------------------------------------------------------------------