குரு பூர்ணிமாவும்,குரு வணக்கமும்

முழு நிலவு 

சனிக்கிழமை  குரு பூர்ணிமாவுக்கு முந்தின நாள் அரிசோனாவில் இருக்கும் சாய் கோவில் போய் இருந்தோம். 

அங்கு நடந்த நிகழ்வுகள் படங்கள், மற்றும் குருமார்களை பற்றிய செய்திகளும்  இந்த பதிவில் இடம் பெறுகிறது.

இரவு  9 மணிக்கு எடுத்த நிலவு படங்கள்.

குரு பூர்ணிமா அன்று முழு நிலவையும்,  நமக்கு கற்றுக் கொடுத்த  குருமார்களையும்  வணங்கும் நாள்.

முதல் குரு நம் தாய், தந்தை பின் நமக்கு கல்வி கற்றுக் கொடுத்த குருமார்கள். பின் நாம் குருவாக ஒருவரை ஏற்றுக் கொண்டவர், நாள் தோறும் நமக்கு ஒவ்வொருவரும் பாடம் கற்றுக் கொடுக்கிறார்கள் அவர்கள் அனைவருக்கும் நன்றிகளும், வணக்கங்களும். 

வானத்தில் ஒளிரும் நிலவின் ஒளியும், சாய் கோவில் வாசலில் தெரியும் குழல் விளக்கின் ஒளியும்.

விழா காலங்களில் சுவாமி எழுந்தருள  செய்ய பலகை,   பிரசாதம் வைக்கும் பலகை  இரண்டையும் மகனும், மருமகளும்   இணைந்து செய்து இருந்தார்கள். அதை நேற்று குருகாணிக்கையாக கோவிலுக்கு கொடுத்தார்கள். காரிலிருந்து கோவிலுக்கு எடுத்து வர மகனின் நண்பரும் அவர் துணைவியும் உதவி செய்தார்கள்.

அனுமன், லட்சுமணன், ராமர் , சீதை  உற்சவ மூர்த்திகள்  முன் வைத்தோம்.

பலகையில்  தாமரை மலர் வரைந்தது மருமகள்.

பெருமாள், முருகன் வள்ளி தெய்வானையுடன் , சிறிய முருகன் வள்ளி, தெய்வானை 

முன்பு இருந்த  சாய் பாபா, தத்தாத்ரேயர், பெரிய பாபா முன் பிள்ளையார், சிவன், நடராஜர், கண்ணன் ராதை  உண்டு. அனைத்து  விழாக்களும் நடக்கிறது இந்த கோவிலில். 

பஜனை பாடல்கள் நன்றாக பாடினார்கள் 

https://www.youtube.com/watch?v=zGBZ3GetiW0

அங்கு நடந்த நிகழ்வுகளை  இந்த காணொளியில் காணலாம். நேரம் இருந்தால் பாருங்கள்.  பஜன் இருக்கும், தெரிந்த பாடல்களை பாடினார்கள். 

இது மகன் எடுத்த சிறிய காணொளி

சாய் படத்தை பல்லாக்கில் வைத்து   ஊர்வலமாக கோவிலை சுற்றி வந்தது இந்த காணொளியில் இருக்கும்.

தியான கூடத்தில் உள்ள சாய்

கோவில் வாசலில் அழகாய் போட்டு இருந்த கோலம்

மருமகள் பாபாவுக்கு  சிவப்பு, பச்சை, வெள்ளை கல்லால் செய்த செயற்கை   ஆபரணம் வாங்கி   கொடுத்தாள். ஞாயிறு காலை  அணிவித்தனர்.

சனிக்கிழமை கோவிலுக்கு போன போது இரவு பல்லாக்கு ஊர்வலம் முடிந்து இரவு ஆரத்தி ஆரம்பித்து விட்டது. ஞாயிறு குரு பூர்ணிமா அன்று சாற்றுகிறோம் என்று கோவில் அறங்காவலர் பொறுப்பில் இருந்தவர்கள் சொன்னார்கள். ஞாயிறு காலை அணிவித்து விட்டார்கள். 

innUyir

இன்னுயிர் யாவும் பெருமாள் அகமே 

 இந்த பதிவை படித்து பாருங்கள் குரு பூர்ணிமாவுக்கு சிறந்த பதிவு.

காட்கே மஹராஜ் என்ற உயர்ந்த கர்மயோகியை பற்றி கபீரன்பன்   அவர்கள் எழுதிய பதிவு படித்து பாருங்கள். 

மன ஆறுதலை தரும். கீழே வருவது அவர் பதிவிலிருந்து கொஞ்சம் கொடுத்து இருக்கிறேன். முழுவதையும் பதிவில் சென்று படித்து பாருங்கள் பிடிக்கும்.

அரசியலுக்கு அப்பாற்பட்ட சீர்திருத்தவாதியான காட்கே மஹராஜுக்கு 1954 ஆம் ஆண்டு பத்ம பூஷண் விருது  கொடுத்து அந்த விருதிற்கு பெருமை சேர்த்தது இந்திய அரசு. 

//அவர் பிறந்தது  பிப்ரவரி 23, 1876

குடிப்பழக்கத்திற்கு அடிமைப்பட்ட அவருடைய தந்தையை இளவயதிலேயே இழந்த அவருள்  சமுதாய மாற்றத்திற்கான அவசியம் ஆழப்பதிந்தது.

பதினெட்டு வயதில் திருமணமாகி மூன்று குழந்தைகளுக்கு தந்தையுமானார். 

தாய்மாமனுடன் விவசாயத்தில் கடினமாக உழைத்து குடும்பத்தைக் காப்பாற்றிய போதும் தன் கீர்த்தனங்களை நிறுத்தவில்லை.  அவரது 29 வது வயதில் ஒரு  கடன் பத்திர மோசடி மூலம் தன் நிலத்தையும் இழக்க நேர்ந்த போது எழுத்தறிவுக் கல்வியின் அவசியம் புரிந்தது. அதற்கெனவே வாழ்க்கையை அர்பணித்துக் கொண்டு குடும்ப வாழ்வை துறந்தார்.

ஊர் ஊராக சென்று தனி மனித விழிப்புணர்வு பிரச்சாரம் செய்யத் தொடங்கினார். கையில் எப்பொழுதும் ஒரு விளக்குமாறு,  தலைமேல் கவிழ்க்கப்பட்ட -உடைந்த -மண் ஓடு (காட்கே- Gadge).  இதுதான் அவருடைய அடையாளங்கள். (தற்கால மொழியில் சொல்வதானால் 'பிராண்ட் இமேஜ்' ).

ஒரு கிராமத்தை அடைந்ததும் தெருவுகளையும்,  சாக்கடைகளையும் சுத்தம் செய்ய ஆரம்பிப்பார். உடன் சேர்ந்து கொள்பவர் இருந்தாலும் இல்லாவிட்டாலும் கவலைப் படுவதில்லை. யாரேனும் உணவளித்தால் மண் ஓடு பிட்சை பாத்திரமாகும்.  மாலையில் கீர்த்தனங்கள். இடையிடையே கேள்வி பதில் பாணியில் சீர்திருத்தக் கருத்துகள். இவை மக்களிடையே பெரும் வரவேற்பை பெற்றன. அடுத்த நாள் மற்றொரு கிராமம்.

அவர் கோவிலுக்கு சென்று வழிபாடு செய்வதில் ஈடுபாடு கொள்ளவில்லை. ஆனால் கோவில் விழாக்களில் கலந்து கொண்டு நலிந்தவருக்கும் வறியவர்களுக்கும் சேவை செய்வதில் அக்கறை காட்டினார். 

அவர் கபீரைப் போலவும் வள்ளலாரைப் போலவும் தெய்வத்தை உயிருள்ள ஜீவனில் கண்டார். கல்லில் காணவில்லை.  அவருடைய கீர்த்தனங்களில்  நாமதேவரின் அபங்கங்களும்  கபீரின் தோஹாக்களும்  மிக அதிகமாக இடம் பெற்றன.  

கபீர் சொல்வது போல பேசாத சிலைகளை விட நடமாடும் ஆத்மாக்களிடையே இறைவனைக் காண்பாய் என்பதை அவர் நடைமுறையில் செய்து காட்டினார்.

விவேகானந்தரின் சொற்பொழிவுகள் காட்கே மஹராஜரினுள் ஆழ்ந்த தாக்கத்தை ஏற்படுத்தி இருந்தது. மானவ சேவையே  மாதவன் சேவை  என்பதில் அவர் குறியாக இருந்தார். தனக்குக் கொடுக்கப்பட்ட காணிக்கைகள் அனைத்தையும் பள்ளிக்கூடங்கள் கட்டுவதிலும்,  யாத்திரிகர்களுக்கு அன்ன சத்திரங்கள், மருத்துவ மனைகள், கோசாலைகள், தொழுநோயாளிகளின் சிகிச்சை கூடம், அபலையர் நலிவுற்றோர் இல்லம் கட்டுவதில் செலவிட்டார்.

ஏழைகளோடு ஏழையாகவே வாழ்ந்தார்.//

நல்லாரிணக்கம் எப்போதும் வேண்டும் நமக்கு

பாரதியாரின் பிறந்த நாளை "பாரதீய பாஷா திவாஸ்" என்ற பெயரில் பல அமைப்புகள் மூலம் பள்ளி கல்லூரிகளில் நாடெங்கும் கொண்டாடி  உள்ளனர்.

அதில் ஒரு அங்கமாக சென்னையில் உள்ள

 செம்மொழி தமிழாய்வு நிறுவனம் ( Central Institute of Classical Tamil) தமிழக ஆளுனர் மாளிகையில் பல மொழி பெயர்ப்பாளர்களை அழைத்து கௌரவித்தது. 

அதில் இவர் எழுதிய "மக்குத்திம்மன் கவிதைகள்" மொழி பெயர்த்த நூல் தேர்வு செய்யப்பட்டதை மகிழ்வுடன் எனக்கு  தெரிவித்து  டிசம்பர் மாதம் மூன்று புத்தகங்களை அனுப்பி வைத்தார். 

அவை அங்கு விழாவில் கொடுக்க  அவசரமாக அச்சடித்த புத்தகம்   என்று சொல்லி இருந்தார்.  அதை முழுமையாக படித்து பகிர்ந்து கொள்ள வேண்டும் என்று நினைத்தேன் அவை ஊரில் இருக்கிறது.  

 கபீரின் கனிமொழிகள் என்ற   வலைத்தளம் வைத்து இருக்கிறார். "மக்குதிம்மான் கவிதைகள்" அவர் வலைத்தளத்தில் பகிர்ந்தவை . படித்து இருக்கிறேன். நன்றாக இருக்கும் அவர் வலைத்தளத்தில் படித்து பார்க்கலாம். 

மக்குதிம்மான்  கவிதைகளை இலவச மென் புத்தகத்தில் படிக்கலாம். 

இலவச மென்புத்தகம். Smart phone, Tablet, e-reader போன்றவற்றில் படிக்க ஏதுவாக பெரிய எழுத்துரு கொண்ட pdf கோப்பு.
இதை தரவிறக்கம் செய்ய கீழ்காணும் நிரலை copy &paste செய்யவும்.
https://goo.gl/uOfjt5

இவரின் வலைத்தளங்கள். 

1)kabeeran.blogspot.in

2)en-chithirangal.blogspot.in

3)nirmal-kabir.blogspot.in

4)adworldaroundus.blogspot.in

2006 ஆம் ஆண்டில் வலைத்தளம் ஆரம்பித்து  இருக்கிறார்.

குருபெருமை   என்ற பதிவில் 

//குரு கோவிந்த் தோஹூ கடே காகே லாகூம் பாய்
பலிஹாரீ குரு ஆப்னே கோவிந்த் தியோ பதாய்

குருவும் கோவிந்தனும் சேரவரின் பற்றும் சேவடி எவரதுவே
குருவின் கழலை வரித்திடு கோவிந்தன் வரவும் அவனருளே

கடவுளிடம் மனிதனை அழைத்துச் செல்வதே குருவின் திருவருள் தான். அதை எக்காலத்தும் மறக்கக்கூடாது என்பதை வேடிக்கையாகவும் நாசூக்காகவும் குறிப்பிடுகிறார் கபீர். கோவிந்தன் வடிவமாக கடவுளை உருவகித்து கபீர் சொல்வது என்னவெனில் கடவுளே நேரிலே வந்து விட்டாலும் குருவின் திருவடிகளை ஒருவன் மறக்கக் கூடாது என்பதே.//

குருவின் பெருமையை சொல்லும் பதிவு படித்துப்பார்க்கலாம்.

இவருடை பதிவுகள்  எனக்கு  பிடிக்கும். 

சில நேரம் என் கேள்விகளுக்கு விடை கிடைக்கும்.

மனையொட்டி மாமிசக் கடையோ ?

//கபீரன்பன் வெகு நாட்களுக்கு பின் வந்து அருமையான பதிவை தந்தமைக்கு முதலில் நன்றி.

சில நேரங்களில் நாம் நல்லவிதமாய் தானே நடந்து கொள்கிறோம்! நமக்கு ஏன் இந்த நிலை ! என்ற நினைப்பு எனக்குள் நடக்கும் அப்போது எல்லாம் இறைவனிடமிருந்து வரும் அருள்வாக்கு போல் நல்ல விஷயங்கள் காதில், கண்ணில் படும். அது போல் இன்று கபீரின் நற்சிந்தனை கிடைத்தது.//

இப்படி இந்த பதிவில் சொல்லி இருப்பேன்.

இவர் தளத்தை என் மகள் தான் அறிமுகபடுத்தி வைத்தாள் உங்களுக்கு பிடிக்கும் படித்து பாருங்கள் என்று. ஜீவி சார், ஜி. எம் . பாலசுப்பிரமணியம் சார்,  கீதா சாம்பசிவம் எல்லாம் அவர் வாசகர்கள். 

மனித குலத்திற்கு நல் வழி காட்டிய அனைத்து குருமார்களுக்கும் வணக்கம்

வாழ்க வையகம்! வாழ்க வையகம்! வாழ்க வளமுடன்!

---------------------------------------------------------------------------------------------------