வைக்கம் மகாதேவர் கோயில்

ஜூன் மாதம்   மகன் குடும்பத்துடன்  ஆலப்புழா படகு வீட்டில் பயணம் சென்றோம், அதன்பின்  18 தேதி வைக்கம் மகாதேவர் கோயில் போனோம். கோட்டயம் மாவட்டத்தில்  அமைந்து இருக்கிறது  கோயில். கோட்டயத்திலிருந்து 40 கி.மீட்டர் தூரத்தில் இருக்கிறது.

கோயில் பல வரலாற்று சிறப்புகளை  கொண்டது. 

               வைக்கம்  வைக்கத்தப்பன் கோயில்

வேண்டுபவர்களுக்கு , விரும்பியதை வழங்கும் தலமாக கோட்டயம் மாவட்டம் வைக்கம் ஊரில் உள்ள வைக்கத்தப்பன் கோயில் திகழ்கிறது என்று சொல்லப்படுகிறது.

தல வரலாறு:-

சிவபெருமானின் பக்தனான கரன் என்ற அசுரன் , முக்தி வேண்டிக் கடுந்தவம் செய்தான்.   சிவபெருமான் மூன்று சிவலிங்கங்களைக் கரனுக்கு கொடுத்து அதை மூன்று இடங்களில் நிறுவி வணங்கினால் முக்தி கிடைக்கும் என்று சொல்லி அனுப்பி வைத்தார். கரனை பின் தொடர்ந்து செல்ல புலிக்கால் முனிவரான வியாக்ரபாதரை அனுப்பி வைத்தார்.

கரன் ஒரு லிங்கத்தை வலது கையிலும், மற்றொரு லிங்கத்தை இடது கையிலும் , மூன்றாவது லிங்கத்தை வாயிலும் எடுத்து சென்ற அசுரன் பயண களைப்பால் சிறிது ஓய்வு எடுக்க ஒரு லிங்கத்தை கீழே  ஒரு இடத்தில் வைத்தான், மீண்டும் எடுக்கும் போது எடுக்கமுடியவில்லை.

அப்போது தொடர்ந்து வந்த வியாக்ரபாதரிடம் அந்த சிவலிங்ககத்தை வழிபட வேண்டி கொண்டான். அவர் அங்கே இருந்து  அந்த லிங்கத்தை வழிபட்டார்.  எனவே வைக்கத்தப்பனுக்கு வியாக்ரபுரீசுவரர் என்ற பெயரும் உண்டு. வைக்கம் ஊருக்கு வியாக்ரபுரி என்ற பேரும் உண்டு.

அசுரன் மீதமிருந்த இரண்டு சிவலிங்கத்துடன் பயணம் செய்து இடது கையில் கொண்டு போனதை "மானுர்" என்ற இடத்தில்  மேற்கு நோக்கி வைத்து வழிபட்டான். 

பின் வாயில் உள்ளதை "கடித்துருத்தி" என்ற இடத்தில் கிழக்கு நோக்கி   வைத்து வழிபட்டான். இதனால் அவனுக்கு முக்தி கிடைத்தது. என்று புராண வரலாறு சொல்கிறது.

 பிற்காலத்தில்  பரசுராமர் வான் வழியில் வடதிசை நோக்கி பயணம் செய்து கொண்டிருந்த போது ஓரிடத்தில் கீழே பார்த்தார் அங்கு நாவல் பழ நிறத்தில் ஒரு சிவலிங்கம்  நீரில் பாதியளவு மூழ்கிய நிலையில் இருப்பது  தெரிந்தது. உடனே கீழே இறங்கி வந்த பரசுராமர் அந்தச்சிவலிங்ககத்திற்காக பீடம் ஒன்றை அமைத்து அந்த பீடத்தில் சிவலிங்கத்தை நிறுவி வழிபாடுகளைச் செய்யத் தொடங்கினார். இது கரன் வலது கையில் எடுத்து வந்து  வியாக்ரபாத முனிவரால் பூஜிக்கப்பட்ட சிவலிங்கம் .

 மூன்று கோவில்களையும் ஒரே நாளில் வணங்கினால் நமக்கும் நல்லது நடக்கும் என்று சொல்கிறார்கள். நாங்கள் வைக்கம் மட்டும் பார்த்தோம்.

இன்னொரு வரலாறும் இந்த கோவிலுக்கு இருக்கிறது.:-

வைக்கம் போராட்டம்

வைக்கம் மகாதேவர் கோயிலை  முன்பு பக்தர்கள் வழிபடுவதற்கு  கடும் கட்டுப்பாடு விதிக்கப்பட்டு இருந்து இருக்கிறது. குறிப்பிட்ட 108 குடும்பங்களின்  வழிபாட்டுக்கு உரிய கோயிலாக இருந்து இருக்கிறது.

கோயில் அமைந்து இருக்கும் வீதியில்  ஈழவர்களும்  தாழ்த்தப்பட்டவர்களும் நுழையத் தடை விதிக்கப்பட்டு இருந்தது. இதனை எதிர்த்துக் கேரளத்தில் மிக பெரிய போராட்டங்கள் நடைபெற்றன. இப்போராட்டக்காரர்களின் வேண்டுகோளை ஏற்றுத் தந்தை பெரியாரும் இப்போரோட்டத்தில் கலந்து கொண்டார். கைது செய்யப்பட்டு சிறையில் அடைக்கப்பட்டார்.

தாழ்த்தப்பட்ட மக்கள்  கோவில் அமைந்து இருக்கும்  தெருவில் நடக்க  உரிமை பெற்றனர் அதனால்தான் தந்தை பெரியார் "வைக்கம் வீரர்"  என்று திரு.வி.க வால் பட்டம் சூட்டப்பட்டு அழைக்கப்பட்டார்.

 

இந்த கோயிலில் அம்மனுக்கு என்று தனியாக சன்னதி இல்லை. கோயிலின் பின்புறம் உள்ள விளக்கில் எண்ணெய் ஊற்றி "அம்மா பகவதி" என்று வழிபடுகிறார்கள்.

உள்ளே உள்ள கடையில் கலர் குங்குமம், எண்ணெய் விற்கிறார்கள் அதை வாங்கி கலர் கோலம் போட்டு எண்ணெய் ஊற்றி விளக்கேற்றி வழிபடுகிறார்கள்.

வனதுர்க்கை சன்னதி மேற்கூரை எதுவும் இல்லாமல் இருக்கிறது. இங்குள்ள வனதுர்க்கைக்கும் வரலாறு இருக்கிறது. வனதுர்க்கையை வழிபட்டால் மனிதர்களிடம் இருக்கும் அரக்க குணங்கள் அனைத்தும் விலகும் என்ற நம்பிக்கை.

வெளிப்பிரகாரத்தில் தென்கிழக்கு மூலையில் ஒரு ஆலமரம் மேடையோடு  இருக்கிறது, அங்கு ஸ்ரீ வியாக்ரபாதருக்கு மகாதேவர் காட்சி கொடுத்தாராம் அம்மேடையை "வியாக்ரபாதர் மேடை" என்கிறார்கள்.  

மழை பெய்து சில இடங்களில் தண்ணீர் தேங்கி நின்றது.

சுவாமியை சுற்றி வரும் வழியில் (வெளிபக்கம்) கீழே விழுந்து கும்பிடும் உருவங்கள் உள்ளன.

கோவில் முன் பக்கம் உள்ள  மண்டப மேல் விதானம்

மகாதேவரை தரிசிக்க செல்லும் வழி. உள்ளே சுவாமி சன்னதியில் நன்றாக மகாதேவர் தரிசனம் கிடைத்தது.வரிசையில் வந்து  சுவாமி முன் கொஞ்ச பேர் தரிசனம் செய்தபின் மற்றவர்களை அனுப்புகிறார்கள்.

நாங்கள் போன போது அலங்காரம் முடிந்து கதவு திறந்து பூஜை ஆனது. எல்லோர் மேலும்  தீர்த்தம்  தெளித்தார் குருக்கள். உள்ளே நிறைய விளக்குகள் ஒளிர்ந்தன. அழகான அலங்காரம்.

கொடிமரம்  முன்னால் ஒரு பெரிய பாத்திரத்தில் விளக்கு இருக்கிறது

கொடிமரம் விளக்கு பக்கம் நுனி இலை மேல்   மரக்கால் போல ஒரு பாத்திரம் நடுவில் கை பிடி இருக்கிறது நெல்லை அளந்து கூடையில் போடுவார்கள் போலும்.

அன்னதான வரலாறு:-

சூரபத்மனையும், தாரகாசூரனையும் அழிப்பதற்காக முருகப்பெருமான் புறபட்டார். அவர் சூரர்களை  வெற்றி பெற வேண்டும் என்பதற்காக, சிவபெருமான் வைக்கத்தப்பன் கோயிலில் வைக்கத்தஷ்டமி நாளில் அன்னதானம்  செய்தாக கோயில் தலபுராணம் சொல்கிறது. எனவே இத்தலத்தில் வைக்கத்தஷ்டமி தினத்தன்று  அன்னதானம் செய்தால் வேண்டிய பலன்களை  அனைத்தையும் பெறலாம் என்றும், அன்னதானத்தில் சிவனும் பார்வதியும் தம்பதி சமேதராக கலந்து கொண்டு ஆசி வழங்குவார்கள்  என்ற நம்பிக்கை உள்ளது.

விரும்புபவர்கள் முன்பதிவு செய்து கொள்ள வேண்டுமாம்.

கோவில் பற்றிய அனைத்து செய்திகளும் மாலை மலர் பத்திரிக்கையில் படித்தது. நன்றி மாலை மலருக்கு.

தூலாபாரம் கொடுக்கும் தராசு, வாழைத்தார் உள்ளது வண்டியில்.

சுவாமியை தரிசிக்க செல்லும் வழி

மூலவர் இப்படித்தான் இருப்பார்

எல்லா பக்கமும் ஓரத்தில் நந்தி  இருக்கிறது  

பூமாலையும் சிறு சிறு மணி மாலை நிறைய போட்டு இருக்கிறார்கள்.

அர்ச்சனைசாமான்கள்  கிடைக்கும் இடம் 

நாங்கள் கோயிலுக்குள் இருந்த நேரத்தை சொல்கிறது

கோயில் மதில் ஓரங்களில் மரங்கள் அழகாய் இருக்கிறது.

கோயிலில் நிறைய இடங்கள் மலையாள பேர் பலகையுடன் இருக்கிறது

இந்த கலா பீடத்தில் மட்டும் ஆங்கிலத்தில் பேர் பலகை இருக்கிறது. KSETRKALA PEEDOM

மண்ணில் நடப்பது மிகவும் கஷ்டமாக இருந்தது மணல் பூ மணல் இல்லை குத்தும் மணல். 

மணலில்  நடந்து விட்டு கல் தரையில் நடப்பதால் நடைபாதையிலும்  மணல் துகள்கள் காலை பதம் பார்க்கிறது. கல்லும், முள்ளும் காலுக்கு மெத்தை பாடலில் வருவது போல கல்லும் மணல் முள்ளும் காலை குத்துகிறது.  இறைவன் நாமத்தை சொல்லி நடந்து போனோம், சில இடங்களில் வெயில் வந்து விட்டது கொஞ்சம் சூடும் தெரிந்தது.

 

கோயில் முழுவதும் லாட்டரி சீட்டு விற்கும் வயதான ஆண்கள், பெண்கள் இருந்தார்கள். வாங்க சொல்லி கேட்கிறார்கள்.

உட் பிரகாரம்

உள்ளே மூலவர் மகாதேவர் இருக்கும்  இடம்.  உட் சுவரில் ஓவியங்கள்.

ஓவியங்கள் நன்கு தெரியும் இந்த படம்  விக்கிப்பீடியா படம். நன்றி.

மூலவர் இருக்கும் இடத்தை சுற்றி வேலி மாதிரி போட்டு இருக்கிறார்கள். மூலவர் இருக்கும் வெளிபக்க சுவர் முழுவதும் ஓவியங்கள்  புராண கதைகள்  வரையப்பட்டு இருக்கிறது.

இந்த கோயில் தினமும் காலை 5 மணி முதல் 12 மணி வரையிலும் , மாலை 5 மணி முதல் இரவு 8.30 வரையும்  திறந்து இருக்கும்.

வாழ்க வையகம்! வாழ்க வையகம்! வாழ்க வளமுடன்!

-__________________________________________________________________