தென்குடித்திட்டை வசிட்டேசுவரர் கோயில்

21.4. 2022   வியாழன் அன்று திட்டை கோயில் சென்று வந்தேன். தங்கையின் கணவருக்கு "ஷஷ்டியப்த பூர்த்தி" (மணிவிழா) அதில் கலந்து கொள்ள   திருக்கடவூருக்கு உறவுகளுடன் சென்றேன் போகும் வழியில் சில கோவில் தரிசனம்.    திட்டை கோயில் தரிசனம் இந்த பதிவில்.  மாயவரத்தில் இருந்த போது போய் இருக்கிறோம். பழைய நினைவுகள் வந்து போயின.

தஞ்சை  மாவட்டத்தில் "தென்குடித்திட்டை"  என்ற  ஊரில் இருக்கிறது இந்த கோயில். தஞ்சாவூரிலிருந்து 10 கிமீ தூரத்தில் உள்ளது .

கோபுர கலசங்கள், விமானம் அனைத்தும் கருங்கல்லால் கட்டப்பட்ட கோயில்.

சிறப்பு தரிசனம் 50 ரூபாய்  கொடுத்து பார்த்தோம்  

மூலவரை படம் எடுக்க முடியாது . நன்றி  படம் - தினமணி 

மூலவர் வசிஷ்டேஸ்வரர் . அம்மன் உலகநாயகி அம்மை, 

சுவாமிக்கு பசுபதிநாதர், பசுபதீஸ்வரர், என்றும் அழைக்கபெறுகிறார். சுயம்பு மூர்த்தி. அதனால் ஸ்ரீசுயம்பூதேஸ்வரர் என்றும் அழைக்கபடுகிறார்.  

திருஞானசம்பந்தர் அவர்களால் தேவாரப்பாடல் பெற்ற தலம்.

நன்றி - தினமணி

 அம்மனுக்கு உலகநாயகி, சுகந்த குந்தாளம்பிகை , மங்களாம்பிகை என்ற பெயர்களும் உள்ளன.

அம்மனுக்கு முன் புறம் உள்ள நந்தி தாமிரத்தில் செய்யப்பட்டு இருக்கிறது. இந்த படத்தில் உள்ளது போல  நல்ல அலங்காரமாக சுவாமியும், அம்மனும் இருந்தார்கள். மிகவும் பக்கத்தில் பார்த்தோம். ஸ்வாமி, அம்மன் இருவருக்கும் நடுவில் குருவின் சன்னதி உள்ளது.  அனைவருக்கும் பூக்களுடன்  விபூதி, குங்கும பிரசாதம் கொடுத்தார்கள்.

 

நான் எடுத்த படம்.

குரு நின்றகோலத்தில் இருக்கிறார்  மலர் பந்தலில் அழகாய் காட்சி அளித்தார் வெள்ளி கவசம் அணிந்து. குருபெயர்ச்சி சிறந்த பரிகாரத்தலம் . ராஜ குருவாக இங்கு இருக்கிறார்.

நன்றி. பட உதவி -கூகுள் 

நான்கு முலைகளிலும் லிங்கம் உள்ளது , மூலவரை சேர்த்து ஐந்து லிங்கங்கள் இருக்கிறது. 

                                      பிரகாரத்தில்  இருந்த மகாலிங்கம். 

 வெளி பிரகாரம் சுற்ற அனுமதி இல்லை. கம்பு கட்டி தடுத்து உள்ளார்கள். குருவிற்கு விளக்கு போடும் இடம் மட்டும் வழி விட்டு இருக்கிறார்கள். தலவிருட்சம் முல்லை.

நந்தி வாகனம்

கோவில் முழுவதும் கருகல்லில் தான் கட்டப்பட்டு இருக்கிறது, கொடிமரமும் கருகல்லில் உள்ளது

கொடிமரத்திற்கு முன்னால் திருநீற்றுக் கோயில் என்று இருக்கிறது. அதில் திருநீறு இருக்கிறது.

  

சுவாமி சன்னதி

   சம்பந்தர் சிலை வித்தியாசமாக இருக்கிறது எங்கும் இப்படி பார்த்தது இல்லை.

திருஞானசம்பந்தர் அருளிய தேவாரம் கல்வெட்டில்

முன்னை நான் மறையவை முறைமுறை குறையொடுந்

தன்னதாள் தொழுதெழ நின்றவன் தன்னிடம்

மன்னுமா காவிரி வந்தடி வருடநற் 

செந்நெலார் வளவயல் தென்குடித் திட்டையே

ஊறினார் ஓசையுள் ஒன்றினார் ஒன்றிமால்

கூறினார் அமர்தருங் குமரவேள் தாதையூர் 

ஆறினார் பொய்யகத் தையுணர் வெய்திமெய் 

தேறினார் வழிபடுந் தென்குடித் திட்டையே

- திருஞானசம்பந்தர் தேவாரம்

திட்டை கோயில் பல சிறப்புகளை கொண்டது. அதில்  முக்கியமானது நெடு நாள் மருந்து மாத்திரை எடுத்து கொள்பவர்கள் இந்த தலத்து இறைவனை வணங்கினால்  உடல் நலம் பெறலாம் என்பது . எல்லோரும் ஆரோக்கியமாக வாழ வேண்டிக் கொள்வோம். 

காரின் பின்பக்க கண்ணாடி வழியே எடுத்த படம்

கோயிலின் முன்புறம் உள்ள திருக்குளம். காரிலிருந்து எடுத்த படம் 

குருபெயர்ச்சி நடந்தபோது வைத்த விளம்பர பலகையில் குரு அழகாய் காட்சி அளிக்கிறார். 

கார் நிறுத்தும் இடத்தில் கரிக்குருவியை கண்டேன், இரட்டைவால் குருவி என்றும் சொல்வார்கள் இரட்டைவால் தெரிகிறதா?

இறைவனை வணங்கி கொண்டு நிற்கிறது

கரிச்சான் குருவி நீண்ட நேரம் நின்றது.

அடுத்து திருக்கருகாவூர் போனோம். அது அடுத்த பதிவில்.

வாழ்க வையகம்! வாழ்க வையகம்! வாழ்க வளமுடன்!

--------------------------------------------------------------------------------------------