வரலாறு முக்கியம்

அனைவருக்கும் வணக்கம் , வாழ்க வளமுடன்  இந்த பதிவில் பதிவு செய்யப்பட்ட  படங்கள் பல வருடங்களாக நான் பாதுகாத்து வைத்து இருப்பது.  நான் 10 வது படிக்கும் போது(1971)விருப்பபாடமாக வரலாற்றை தேர்ந்து எடுத்தேன். அப்போது தயார் செய்தது.

நம் சக பதிவர் நெல்லைதமிழன் அவர்கள்  எங்கள் ப்ளாக்கில் 

நாங்கள் தரிசனம் செய்த  கோயில்கள் என்று ஒவ்வொரு ஞாயிறும்    பதிவு போட்டு வருகிறார்.   வரலாறு  சொல்லி அவர் பார்த்த கோயில் படங்களை பதிவிட்டு வருகிறார். இந்த வார பதிவில்  சோழர் வரலாறு சொல்கிறார்.  யாருக்கு பின் யார் என்று  அவர்கள் ஆண்ட காலம் எல்லாம்   வரிசை படுத்தி இருந்தார்.

உங்கள் பதிவை படித்தவுடன் (அவருக்கு கொடுத்த பின்னூட்டத்தில்)  நான் 10ம் வகுப்பில் வரலாற்றை விருப்பபாடமாக எடுத்த போது இப்படி அரசர்கள்  ஆண்ட காலத்தை  இந்திய வரைபடத்தில் அவர்கள் ஆண்ட பகுதிகளை குறித்ததும், யாருக்கு பின் யார் என்று அட்டவணைபடுத்தியதும் நினைவுக்கு வந்து பகிர ஆசை என்றேன்.  நெல்லைத்தமிழன் அவர்கள் 

//நீங்கள் ஆவணப்படுத்தி வைத்திருப்பீங்க , நிச்சியம் பகிருங்கள்'// என்றார். அதுதான்  இந்த  பதிவு பிறந்த கதை.

அக்கா வரைந்து தந்தது

வரலாற்றை அறிந்து கொள்ள உதவிய அடிப்படை சான்றுகள்

பழைய கற்கால மனிதர்கள், புதிய கற்கால மனிதர்கள் பற்றி எழுதி இருக்கிறேன். படிக்க முடிகிறதா என் எழுத்து நன்றாக இருக்காது.

சிந்துவெளி நாகரீகம்

பழைய , புதிய கற்கால மனிதர்கள் பயன்படுத்திய ஆயுதங்கள்

இந்த படத்தையும் என் அக்கா வரைந்து தந்தார்கள்.

சிந்துவெளியில் 600க்கும் அதிகமான முத்திரைகள் கிடைத்தைப்பற்றி, அவை எப்படி இருந்தது, அவர்கள் முத்திரையில் எழுதிய சித்திர எழுத்துக்கள், குறிப்புகள் காணப்படுகின்றன. முதலில் இடமிருந்து வலமாகவும், பின்பு வலமிருந்து இடமாகவும்   எழுதினார்கள். பிராமி வகையை சார்ந்த எழுத்துக்கள் என்று பேராசிரியர் வாங்கடன் கருதுகிறார், இன்னும் விளக்கப்படவில்லை.

சமயம் :-

சிவனையும் சக்தியையும் வணங்கினர், முத்திரை ஒன்றில் சிவன் தவக்கோலமுறையில் அமர்ந்து இருப்பது போல காணப்படுகிறது.  மீதியை படித்து பாருங்கள்

படிக்க முடியும் என்று நினைக்கிறேன்.

கம்பிளி ஆடைக்கு அம்மா சின்னதாக உள்ளன் நூல் வைத்து பின்னி தந்தார்கள். நானும் அம்மாவிடம் கற்றுக் கொண்டு ஸ்வெட்டர், உள்ளன் ஸ்கார்ப் போன்றவை பின்னி இருக்கிறேன். முன்பு ஒரு பதிவில் படம் போட்டு இருக்கிறேன்.

வேதகாலம், இதிகாச காலம்

பழைய இந்து இராச்சியங்கள்.

இந்தக் காலத்தில் திட்டப்பணி என்று குழந்தைகளுக்கு கொடுக்கிறார்கள். அவர்களுக்கு பெற்றோர்கள் உதவுகிறார்கள். அப்படி அந்தக்காலத்தில் எனக்கு என் அம்மா, அக்கா உதவினார்கள், அண்ணன் பழைய புத்தகத்தில் உள்ள படங்களை வெட்டி கொடுத்தார்கள். என் கணவர்  கூட படம் வரைந்து கொடுத்து  உதவி இருக்கிறார்.

இந்த படம் என் கணவர் வரைந்து தந்தது.  அப்போது அவர்கள் என் அக்காவின் கொழுந்தன். என் அக்கா கணவரின் தம்பி.

என் அக்காவிடம் சாஞ்சி ஸ்தூபி வரைந்து தர சொன்னேன், அக்கா தன் கொழுந்தன் நன்றாக படம் வரைவார் என்று அவர்களிடம் கேட்டு வரைந்து வந்து தந்தாள் அதை அப்படியே நோட்டில் ஒட்டி வைத்தேன்.

என் கணவர் வரைந்து தந்த அந்த படத்தினால் தான் 25க்கு 12 மார்க் கிடைத்தது. இல்லையென்றால் இன்னும் கூட மார்க் குறைவாக வந்து இருக்கும்.     என் எழுத்தை படிக்கவே ஆசிரியருக்கு  கஷ்டமாக இருந்து இருக்கும் நல்ல குண்டு குண்டாய் எழுதினால் என்ன என்று கேட்பார்கள்.  அப்படி எழுதவே வராது எனக்கு.

 

நெல்லை தமிழன் அவர்களிடம் பதிவு போட வேண்டும் என்று சொன்னேன், இங்கு இந்த பதிவில் அவர் சுட்டி கொடுத்தேன், அடுத்த பதிவு அவர் போடுவதற்குள் பதிவை போட்டு விட வேண்டும் என்று போட்டு விட்டேன்.

இன்று  எங்கள் திருமண நாள் அதனால் அவர்கள் நினைவுகளை தரும் இந்த பதிவை இங்கு பகிர்ந்து விட்டேன்.

வரலாறு முக்கியம் என்று என் வரலாற்றையும் இணைத்து விட்டேன்

திருமண நாள் 1973 ஆம்  ஆண்டு பிப்ரவரி 7 ஆம் தேதி.

படிப்பு தடை பட்டு திருமணத்திற்கு பிறகு என் கணவர்  பள்ளியில் சேர்த்து படிக்க வைத்த கதைகள் பழைய பதிவுகளில் படித்து இருப்பீர்கள். பள்ளிவிழாக்களுக்கு எனக்காக சாட்பேப்பரில் படங்கள் வரைந்து தருவார்கள்.

  என் கணவர்  கல்லூரியில் சுற்றுலா போன போது எழுதி வைத்து இருந்ததை நான் பதிவாக்கியது நினைவு இருக்கலாம் உல்லாசபயணம் - 2 என்ற பதிவில்  சாஞ்சி ஸ்துபியை வரைந்து இருப்பார்கள்.

நீங்கள் பார்த்து இருப்பீர்கள். சாஞ்சியில் அமைந்துள்ள ஸ்தூபிகள் ,புத்தவிகாரம்  பற்றிய வரலாறு  பதிவில் இடம்பெறுகிறது. 

இந்த அட்டவணை பதிவுக்கு 10க்கு 6 மதிப்பெண்கள் கொடுத்து இருக்கிறார்கள்

யாருக்கு பின் யார் ஆண்டார்கள் என்று அட்டவணை படுத்தி எழுதி இருக்கிறேன் என்று நெல்லைத்தமிழன் அவர்களிடம் சொன்னதற்கு   சான்று . அவர் மாமல்லபுரம் பதிவு போட்ட பொழுதே நான்பதிவு  போட வேண்டும் என்று நினைத்தேன் முடியவில்லை. பல்லவர்கள் பற்றி எழுதி வைத்தது இன்னொரு பதிவில்.

 சிந்துவெளி நாகரீகத்திற்கு பின் பாடத்தில் பண்டைய தமிழக அரசுகள் தான். அதை அடுத்த பதிவில்.

அடுத்த பதிவில் பண்டைய தமிழக அரசுகளை பற்றிப்பார்ப்போம். 

Deepa15 ஜூலை, 2009 அன்று 9:37 AM

//வணக்கம் அம்மா,
வலைப்பதிவுலகிற்கு உங்களை அன்புடன் வரவேற்கின்றோம்.
நீங்க ஸ்கூல்லே படிச்ச காலத்திலே நோட்டுபுத்தகத்டிலே கிறுக்கிந்தை இனிமேல் வலைப்பதிவுகள் மூலமாக பதியுங்கள்.. இது கிழியாது,செதிலரிக்காது..எப்பவுமே பர்மனெண்ட்..

வாழ்த்துக்கள்
மேலும் மேலும் பதியுங்கள்
தீபா கோவிந்த்//

இப்படி என் முதல் பதிவில் கிளிகோலத்தில் தீபா வந்து சொன்னார். அது இப்போதுதான் நிறைவேறி உள்ளது படிச்ச காலத்தில் நோட்டுபுத்தகத்தில் கிறுக்கியதை பதிந்து விட்டேன். நோட்டுப்புத்தகம் கிழிய ஆரம்பித்து விட்டது. அட்டை எல்லாம் போய் விட்டது. பக்கங்களும் கிழிய ஆரம்பித்து விட்டது. 

வரலாறு தொடர்வதை படிக்க விருப்பமா என்று சொல்லுங்கள்.

வாழ்க வையகம்! வாழ்க வையகம்! வாழ்க வளமுடன்!

----------------------------------------------------------------------------------------------------