நவராத்திரி கொலுவும், பேரனின் பக்தபிரகலாதா நாடகமும்

மீனாட்சி கல்யாணம் போல அமைப்பு கொலுப்படிகள் இந்த முறை. 

அரிசோனாவில் மகன்  வீட்டு கொலு படங்கள் இந்த பதிவில் இடம் பெறுகிறது.

மணமகன், மணமகள் வீட்டார்  போல படிகளை அமைத்து  இருந்தாள், நடுவில் கல்யாண செட்.

மருமகளின் அக்கா மகனுக்கு திருமணம் நவம்பர் மாதம் 8ம் தேதி .  அதனால்  இப்படி அமைத்து இருந்தாள். 

ஒரு படியில் பட்டு வேஷ்டியும், இன்னொரு படிகளில் பட்டுப்புடவையும் போட்டு பொம்மைகளை அடுக்கி வைத்தாள். நண்பர் குடும்பம் மற்றும் நாங்களும் பொம்மைகளை அடுக்கினோம்.

மருதாணி வைக்கும் விழா அலங்காரம்  மருமகள் செய்தாள்.

கொலுவுக்கு முன் வருடா வருடம்  ஐந்து குடும்பங்களை அழைத்து  மருதாணி வைத்து விடுவாள் . மருமகளின் தோழி மற்றும் அவர்கள் வீட்டுக்கு வந்து இருந்த பெற்றோர்களும் (தாய்மார்கள்) வந்து ஆசையாக வைத்து கொண்டார்கள்.  குஜராத்தி பெண் ஒருவர் வைத்து விடுவார்.

பேரன் தயார் செய்த நவராத்திரி அழைப்பிதழ் மிக சிறிய காணொளிதான்

இரட்டை நாயனம் வைத்து தடபுடலாக கல்யாணம்

ஒரு நாகசுரம் குழு கீழே அமர்ந்து வாசிக்கிறார்கள், ஒரு குழு நின்று கொண்டு வாசிக்கிறார்கள். சின்ன தட்டுகளில் முந்திரி, பாதாம், பப்பர்மிண்ட் மிட்டாய்,  உலர்ந்த திராட்சை(கிஸ்மிஸ் பழம்) வைத்து இருப்பது தெரிகிறதா?

நின்று கொண்டு வாசிக்கும் நாகசுரம் (நாதஸ்வரம்) செட், பாவைவிளக்கு எங்கள் வீட்டு பழைய  பொம்மைகள்.

வெள்ளைப்பூ வைத்து இருக்கும் கிண்ணம் சுழலும்

கல்யாண செட், மற்றும் தசாவதாரம் செட்  இந்த முறை புதிது.

கீழ் வரிசையில் இருக்கும் இராமயண செட் போன வருடம் வாங்கியது, அதில் உள்ள இராவணனை எடுத்து விட்டதால் (ராவணணை இரண்யகசிபு வாக ஆக்கி விட்டதால் ) மீண்டும் வாங்கியது.

மதுரை எங்கள் வீட்டு பொம்மைகள், மற்றும் சம்பந்தி வீட்டு பொம்மைகளும்  இந்த முறை  கொலுவில் உள்ளது.
 

கல்யாணவீட்டு வாசலில் ஜவ் மிட்டாய் விற்பவர், அவரிடம் கைகடிகாரம்,  ஜஸ்கிரீம் போல மிட்டாய் வாங்கி  இருக்கும் பிள்ளைகள். 

https://www.youtube.com/watch?v=F4Cfx5S9O4Q&t=299s

பேரனின் நாடகம் பாருங்கள் பார்த்து விட்டு சொல்லுங்கள் எப்படி இருக்கிறது என்று ,அவனிடம் சொன்னால் மகிழ்வான்.

இந்த முறை புரஜக்டர்  மூலம் "கவின் திரையரங்கில்" அவன் பொம்மைகளை வைத்து நாடகம் தயார் செய்ததை   காட்டினான்.

எப்படி எடுத்தான் என்பதை நாடகத்தின் கடைசியில் காட்டுவான் , கடைசி வரை காணொளியை பாருங்கள்.

10 நாட்களும் நாரயாண மந்திரம் காதில் ஒலித்து கொண்டே இருந்தது. அவன் நாடகம் தயார் செய்த நாளிலிருந்தும் வீட்டில் நாராயண மந்திரம் பாடல் ஒலித்தது.  

இரட்டை குழந்தைகள் வந்து இருந்தார்கள் , வந்தவர்கள் எல்லோரிடமும் ஆசையாக போனார்கள்,  எல்லோரும் தூக்கி வைத்து மகிழ்ந்தார்கள். 

வெற்றிகரமாக ஓடுகிறது  பக்த பிரகலாதா  4 டி நிகழ்ச்சி என்று மகன் தயார் செய்த  காணொளி அன்பர்களுக்கு அனுப்பினான். மிக சிறிய காணொளிதான் பாருங்கள்.

ஹோலோகிராம். முறையில் பிரம்மா, நாராயணன் பேசுவைதை பேரன் நாடகத்திற்கு மகன் செய்து இருந்தான். அவர்கள் பேசும் போது அதை இயங்க வைப்பது அவன் வேலை என்பதால் இந்த முறை தனியாக மகன் எதுவும் செய்யவில்லை.

நாடகம் பார்க்க அமர்ந்து இருப்பவர்கள்

அவன் அறைக்கு விரைகிறான்

நாடகம் முடிந்தவுடன் அவன்  படம்பிடித்த அறையில் அவன் கதாபாத்திரங்களை  குரூப் போட்டோ எடுப்பது போல   வைத்து இருந்ததை  காட்டினான். அதை நான் படம் எடுத்து உங்களுக்கு காட்டி இருக்கிறேன். 

 பிரம்மா   7 ம் வகுப்பு படிக்கும் போது வரைந்த ஓவியம்.  சாமரம் வீசும் பெண்கள், நாரதர் எல்லாம் பிரிண்ட்அவிட் எடுத்து வைத்து கொண்டான். அதற்கு பொம்மை இல்லை.

மற்றவைகள், போன ஆண்டு போட்ட இராமாயண பொம்மலாட்டம் நாடகத்திற்கு வாங்கிய  இராமாயண செட்டில் உள்ள பொம்மைகளை  இந்த நாடகத்திற்கு எடுத்து கொண்டான்,  ராவணனுக்கு ஒரு தலையை மட்டும் வைத்து கொண்டு மீதி   தலைகளை  வெட்டி   எடுத்து  இரண்யகசிபு   செய்தான். துணியில் செய்த பொம்மைகள் அவை.

 மருமகளும் அவள் அம்மாவும்   அவர் தலையை முடி எல்லாம் வைத்து தைத்து கொடுத்தார்கள். இரண்யகசிபு குடல் ரெடி செய்து கொடுத்தது அந்த ஆச்சிதான். நான் சில ஆலோசனைகள் சொன்னேன்,  மற்றும்  புயல் வரும் போது சருகுகள் பறப்பதற்கு  காய்ந்த இலைகள் எடுத்து வந்து  கொடுத்து உதவினேன்.  மகன் , மருமகள் அவன் கேட்பதை வாங்கி கொடுத்தார்கள்.  

பள்ளி விட்டு வந்து  வீட்டுப்பாடங்களை முடித்து பின்  இரவு தூங்க போகும் வரை நாட்கம் தயார் செய்வான். ஒருமாதம் காலம்   ஆனது  நாடகம் தயார் செய்ய. ஆனாலும் அவன் பல குரல்களில் முன்பு  போல பேசவில்லை  சினிமா வசனங்களை அப்படியே வைத்து விட்டான்.  அவனுக்கு நேரமில்லை 10 வது படிப்பதால்.

நரசிம்மர் வரும் தூண் செய்கிறான். நான் அவனுக்கு தெரியாமல் படம் எடுத்தேன், அவன் படம்பிடிப்பை பார்க்க கூடாது என்று சொல்லி இருந்தான்.

குழந்தைகள், பெரியவர்கள் பாடினார்கள் , அனைவரும் எங்களுடன் படங்கள் எடுத்து கொண்டார்கள்  10 நாட்களும்   எல்லோருடன்  கலந்துரையாடியது மகிழ்ச்சியாக இருந்தது. 

கொலுபார்க்க பாவடை தாவணியில் வந்த குழந்தை மனதை கவர்ந்தாள்

மகனும் மகனின் நண்பரும் பின்னனி இசையுடன்(கரோக்கி முறையில்) திருசெந்தூரின் கடலோரத்தில் பாடலை பாடினார்கள். நண்பர் முதலில் புல்லாங்குழல் கொடுத்த மூங்கில்களே பாடினார்.

சில நண்பர்கள் பாட்டு பாடி அனுப்பி வைத்தார்கள் வாட்ஸ் அப்பில். சிலர் வாட்ஸப்பில் நேரே கொலுவைப்பார்த்துபாடினார்கள்.

தினம் 5, 6 குடும்பம் வந்துப்பார்த்தார்கள். (25, 30  பேர்) வருவதை முன்பே சொல்லி விடுவதால் அதற்கேற்றார்  பிரசாதங்கள் தயார் செய்தோம். முன்பே சொல்லி விடுகிறார்கள் அவர்கள் பிரசாதம் கொண்டு வருவதாய் இருந்தால்.

ஒரு நாள் மட்டும் பிரசாத படம் எடுத்து இருக்கிறது, தினம் தினம் எடுக்கவில்லை நேரமில்லை. ரவா இட்லி சாம்பார், தேங்காய் சட்னி, சப்பாத்தி, தட்டைபயிறு கிரேவி, தயிர்சாதம் , பஞ்சாமிர்தம் , ராகி தோசை,  மருமகளும் நாங்களும் சேர்ந்து  செய்தோம்.  ராகி தோசை  தோசை மிஷினில் சுடச் சுட போட்டு கொடுத்தாள் மருமகள். ஆறினால் நன்றாக இருக்காது. உணவு கட்டுப்

பாட்டில் இருப்பவர்களுக்கு அது மகிழ்ச்சியை தந்தது. 

மைசூர்பாக் ஒருவர் செய்து தருகிறார் இப்படி விழாக்களுக்கு ,  அவரிடம் ஆர்டர்  செய்து வாங்கினோம். ஒரு நட்பு சேமியா கேசரி செய்து வந்தார். ஒருவர் காரட் ஹல்வா , ரவா கேசரி , ஒருவர் வெண்பொங்கல்  ஒவ்வொரு நாளும் யாராவது ஒருவர் பிரசாதம் கொண்டு வந்தார்கள். ஒருவர் கட்லட் கொண்டு வந்தார். மருமகளும் வித விதமாக பிரசாதங்கள் செய்தாள், எல்லோரும் விரும்பும் இட்லி  , சாம்பார் சட்னி இருக்கும்  சர்க்கரை பொங்கல், சப்பாத்தி  மற்றும்  சுண்டல் உண்டு.

சப்பாத்திக்கு வித விதமாக குருமாக்கள் உண்டு. வெங்காயம் சேர்க்காத பலகாரங்கள் உண்டு. சிலர் வெங்காயம் சேர்க்கமாட்டார்கள் விரதம் என்று. அவர்களுக்கு புளி சேவை, இனிப்பு சேவை, எலூமிச்சை சேவை இடை இடையே உண்டு.வெயில் காலம் என்பதால் ஜஸ்கீரீம் , ஜூஸ் உண்டு.

அடைபிரதமன். குழிபணியாரம்  ஒரு நண்பர் மனைவி செய்து  கொண்டு வந்தார்,  சோன்பப்டி ஒரு நண்பர் வாங்கி வந்தார் . சிலர் பழம், பூச்செடிகள் வாங்கி வந்தனர். மலர் கொத்து வாங்கி வந்தனர். பரிசு பொருட்களும் உண்டு. பெரியவர்கள் போல சிறியவர்களும் பழக்க வழக்கங்களை  கடைபிடிப்பது மகிழ்ச்சி தரும் விஷயம். நவராத்திரி விழா எல்லோரும் கூடி மகிழ்ந்து உரையாட ஒரு சந்தர்ப்பமாக அமைகிறது.

 நிறைய நண்பர்களின் பெற்றோர்களும்  வந்து இருந்தார்கள் அவர்களையும் அழைத்து வந்தார்கள். அவர்களை பார்க்கவும் ஒரு வாய்ப்பு. 

நிறைய பேர் கொலுவுக்கு அழைத்து இருந்தார்கள் அவர்களின் வீடுகளுக்கும் போய் வந்தோம். நம் வீட்டிலும் தினம் எல்லோரும் வருதால் அதற்கு ஏற்றார் போல அவர்கள் வீடுகளுக்கு போய் வந்தோம்.

மிக அழகாய் வைத்து இருந்தார்கள் கொலுவை. விருந்து உபசரிப்பு என்று அவர்களின்  அன்பு மழையில் நனைந்து வந்தோம் , அவற்றை அடுத்த பதிவுகளில் பார்ப்போம்.

வேலைக்கும் போய் கொண்டு கொலுவும் வைத்து சிறப்பாக 10 நாட்களும்  கொண்டாடி மகிழ்வதை பாராட்ட வேண்டும்.

வாழ்க வையகம்! வாழ்க வையகம்! வாழ்க வளமுடன்!

------------------------------------------------------------------------------------------------